منتدى استراحات زايد - سالفة عشاء الخطار

بسم الله الرحمن الرحيم
السلام عليكم ورحمة الله وبركاته
اخواني واخواتي المكشاتيه
أسعد الله أوقاتك بكل خير
واليكم هذه السويلفه
هذا الله يسلمكم يوم الناس تحج على البعارين هكالوقت قبل ما تجي السيارات
فيه ناس راجعين من الحج زي ما تقولون حمله المهم برجعتهم من الحج
وبالطريق نوخوا ركايبهم عند هكالبيت مسيان قبل المغرب
والاهم تعبانين وداخين والبيت لحاله ماعنده ولا حوله بيوت
قام راعي البيت وهلا ورحب بهم وصلوا المغرب مع العشاء وجلسو يتقهوون
هم يبون العشاء ميتين من الجوع وبعد ما تقهوو راح راعي البيت وغاب عنهم وابطا
قعدوا يهزون يحترون راعي البيت غديه يفيض عليهم بالعشاء لكنه ابطا عليهم ما جاء
الربع كلن على مركاه ومن التعب غطو بالنوم وخذ ياشخري
وعقب ساعتين او ثلاث تنبهوا والاهم يشوفون هكالصحن وعليه زبره بيضاء ما يشوفنه زين من الظلام
هلا بهم راعي البيت مره ثانيه وقالهم اقلطوا وسموا الله يحيكم على الميسور
يوم قربوا وقلطوا على الصحن وأثر اللي بالصحن زبرة بقل – اقط – يابس مدندن وصريب
قال واحد منهم عيار وجري ( لعنة الله على ابليس يوم ان عشاك مسوى قبل ثلاثة اشهر أو أربعه ورا ما جبته على طول وانت تخلينا نهز طول الليل نحتريه ) ضحك من ضحك وكتم الضحك من استحى
لمّسوا وخمّطوا من هالبقل شوي وقاموا الله يخلف عليك الله يخلف عليك وتسهلوا بدربهم
بعض خويا هذا العيار نقدوا عليه وقالوا مالك حق بهالكلمه
قال والله يالربع ما قلت الا الحقيقه وانا ما أخطيت عليه
انتهت السويلفه واتمنى انه تحوز على استحسانكم
محبكم
النبهاني