منتدى استراحات زايد - الشاعر ناصر بن حمادالمبزر النتيفات والشاعر محمد بن ضافي المصارير

هذي مداعبات بين الشاعرين ناصر بن حماد النتيفات ومحمدبن ضافي المصارير

بعد ماكبرو في العمر وتذكرو عصرهم اللي مضى

لان بينهم رفقه في اول حياتهم
ارسل محمد بن ضافي سلامه مع واحد من عيال ناصر بن حماد
وقال له اذاجيت ابوك فقله ينزل في الديرة
ويرتاح اخر عمره
ويصلي مع المسلمين في المساجد

ويترك الابل لآنه شيب

انانزلت وارتحت من البداوه
وصل السلام ناصر والوصيه وتهيض

وقال ناصر بن حماد:

ابوضافي جتني علومه مع الطرشان --- واناهاض مابي يوم رد الخبر منه

هيضني كلامه يوم هو عارفن فهمان --- وتجاهل علومن هقوتي مايغرنه

يقول البداوه عصرها فات من زمان --- وهو ضايع غلطان واخطا الهدف ظنه

هو مادرا ان الابل بتبقى مع العربان --- وتواريخها تقرا وعنده خبرهنه

وياعزتيله لاستوى العشب فاالصمان --- جذبنا لعربن نرفع الصوت يوحنه

يوم اول شبابه يطرد الغي والغزلان --- ويبرا لذودن كل قفرن يسجنه

ولدور لصيدن لقفها مع الطمان --- ويشوي لخويه من الجوازي لياجنه

وتالي شبابه راح ينزل مع الحضران --- عسا الله يعوض محمدن منزل الجنه

سمع محمد ان ناصر كتب قصيده وماوصلته

قال محمد بن ضافي:

راكب اللي من تمانيه قطع البيد --- على شمت الممتاز لمس القدم فنه

لاتعطي السرعة عميلي ماهوب بعيد --- لاجيت نزال الركا فانشدة منه

من الحمه السادى ليا الفرغ له شهيد --- ومن حدود خطما لسحق ذوده يجنه

تلقى صبي يفعل المرجله وكيد --- ويانعم ابو حماد ناصر على فنه

انا ابغيه للراحه وهو يقصد القصيد --- وترا للمعنى عادتن لاكبر سنه

عدانا ومشانا وجت الاطلاق فيها قيد --- وغدا اللي مضى ياناصر اليوم ماكنه

زل الشباب ومنزل القافر الجديد --- وطرد المها باللي غراها لها بنه

ترا اللي مضى اظن ياناصر مايعيد --- وعصرن مضى خل الهواجيس ينسنه

جانا النذير اللي لعمر الفتى ضديد --- مجاهيمنا عفر ودواهنا ونه

نزلنا وبنانا في ذرا مايل الجريد --- وبنانا المساجد نطلب الرب بالجنه

وصلت القصيدة ناصر بن حمادالنتيفات
وقال:
ابو ضافي حسب سنينه وقام يزيد --- وبقبل عذار القرم لامن رفع سنه

بقبل عذار القرم يومه لنا وليد --- احب الشلي واحب رد الخبر منه

ومن قبل يحذف طاح مابعد قربه حيد --- نواه المطاح وحسبت الكبر ماجنه

اشوفه مع الاطلاق يمشي بليا قيد --- ولاقيده يكون هاجوسه وظنه

ولاقيده يكون شعبيه الجديد --- على طول مترن حط ساسه على فنه

نصلي فروض الله لوكان فا ارضن بيد --- ولا كل من صلى مع الحضر فالجنه

مير اشكي عليه الحال من قلبي البليد --- تولع بحب الابل ولا ينتهي منه

وانا لا عذلت القلب مايسمع المفيد --- لاشاف وردات المجاهيم يشعنه

وسلامتكم