اتمنى من الاخوان التفاعل للفائده
 

السلام عليكم ورحمه الله

ومساكم الله بالخير وشلونكم يالغاليين عساكم طيبين يا جماعه الخير انا بطرح لكم مشكلتين او حالتين موجودات بسلقتين عند واحد من الشباب والرجال موصيني والله على اني اسال اهل الخبره اللي افضل مني وافضل منه في فنون التربيه ومعرفه صحه السلق


المهم يالربع الرجال عنده السلوقيه الاولى عمرها سنه وثمان شهور وكانت عند واحد قبل خويي والاول منتج منها ثلاث مرات والسلقه عربيه وفلا وممتازه ما شاء الله تبارك الله حاره في صيدها وتطلب الصيد والهدد وطبع ما شاء الله تبارك الله من افضل ما يكون ولكن فيها مشكله ما تقدر تقوم مع انها مشهود لها بالسبق لكن ما تقدر تركض تهرول وتركض اقل من خمس دقايق وتوقف ورجليها الله يكرمكم ما تحسونها متعافيه الحفا سليمه وانا مشيكه وخليت كم واحد افضل مني يشوفها وكلهم يقولون سليمه حفاتها عطيتها ابر مضاد حيوي وابر ديدان واكرمها الرجال الله يعطيه العافيه لمده شهرين وكل يوم يدفها بحليب الخلفات وله اللحين ثلاث اسابيع يجريها لمسافه كيلو ولكن للحين المشكله موجوده فيها يالربع السلقه ممتازه والله ما حلفت الا وانا صادق بكلامي
لكن يعيبها ممشاها وسبحان الله الزين ما يكمل وتكفون بالله نبي مشاركات نبي طرح للفايده وكسب المعرفه والخبرات



والثانيه يا طويلين العمر والسلامه سلوقيه ساحليه ما شاء الله تبارك الله سبوق ومهب حاره الا مجنونه ما شاء الله تبارك الله وتطلب مقانيص وهدد وعمرها سنه ونص ولا شبيت للحين طبعها حلو لكن احيانا تخورها احيانا تعاند وهي طبعا مدربه تدريب ممتاز لكن المشكله من يوم جت عند خوييي قامت تعاند ولا تجي اذا دعاها الا من بين خمس مرات يدعيها تجيه مره وحده والباقي يتحايل عليها والرجال مكرمها بالاكل لكن ما رضت تنفخ للحين ولها شهر ونص


وهذي امانه يالربع والرجال ما حوله لا صيدليات بيطريه ولا نت وبعيد مكانه فالخلا
وموصيني وتكفون الله الله بالمشاركات والعلوم الطيبه


ولكم مني جزيل الشكر والامتنان

تحياتي لكم