|
سالفة:المال الحلال..قوافي السلام عليكم ورحمة الله وبركاته حيا كم ربي جميعاً الامانه حمل لابد لحاملها ان يخاف الله لما بين يديه سواء له او لغيره باختلاف انواعها.. بسنه من السنين الماضيات فيه تاجر يبيع العود اللي هو البخور ويستورده التجار من الهند وجاوه وماليزيا .. اشترى هذا التاجر بضاعه بسعر عالي تقريبا صرف عليها ثلث راس ماله لطيب نوعه ومن أفخر انواع العود.. كان يساعده في محله رجل من جنسيه اسيويه وهو معه من كان دكان صغير والى ان كبر المحل واصبح مشهور بالسوق ويشتري منه كبار الشخصيات وعموم الناس .. وصلت البضاعه الثمينه للمحل بعد صلاة العشاء ونام المساعد بالمحل كالعاده عندما تكون البضاعه بالمحل إلى ان توضع بالمخزن او المستودع بمنزل التاجر .لكن بذاك اليوم كانت الدنيا مطر وبرد والبيت بعيد شوي عن السوق فحطوها بالمحل وبكره ينقلونها لبيت التاجر.. من الفجر صلى التاجر واخذ معه فطور لرفيق كده وتعبه وراح للسوق وفتح المحل .إلا وش يشوف المحل مافيه ولا كيس من البضاعه الجديده والمساعد مربوطه ايديه ورجليه ومكمم الفم !!!؟؟؟؟؟ فكه وسئله عن اللي صار وبلغو الشرطه وقامت الدنيا هاك اليوم على راس التاجر وما يدري وش يسوي وصار يضرب كف بكف والمساعد ما يدري وش يسوي لمواساة التاجر.. المشكله ان التاجر ماخذ من تجار صغار عربون حاجزين بخور او عود ويحترون البضاعه.. صار بمشكله ان رجع لهم عرابينهم ضاع اللي باقي من راس المال واللي سرق البضاعه لا حس ولا خبر.. قاله المساعد طبعا التاجر يثق فيه كثير ويمكن اكثر من نفسه باخذ اللي باقي من راس المال واروح واجيب بضاعه من المكان اللي هم يشترون منه بالعاده وبشرح لهم الوضع وبدفع لهم جزء من المبلغ والباقي بعد سنه نكون قد بعنا البضاعه الجديده وافق التجار وارسل المساعد كالعاده وراح وقعد حول اسبوعين ونكس مع حمولة العود على الباخره ورجله على رجل البضاعه من جده للرياض .. باعو وشرو ومشت الاحوال وسددت الديون .. بعد كم سنه راح المساعد لديرته يبي يعيد عند عياله واحفاده وصار عليه حادث وتعور وارسل للتاجر بانه ما يقدر يجي لان الاصبات قويه وصعب الحركه عليه.. التاجر قال لا هذا رفيق درب بروح لمه واشوف وش يحتاج واخذ عنوانه من نفس الرساله اللي جايه وحجز وراح وقال لا وصلت نشدت ..وصل للشارع اللي فيه بيت المساعد بس الشارع ذا شارع كشخه والبيوت قصور لا عشش وبيوت شعبيه مثل ماهو خابر كذب نفسه الين اكدوله ان هذا بيت فلان !!!!!! طق الباب ونشد عنه طبعا هو معه مرافق يتكلم لهجتهم ولا قالهم اسمه عشان هو الشك بدا يلعب به منين كل هالدنيا؟؟ المهم يوم جا بمجلس المساعد إلا والله هذا المساعد قاعد تقل امير من خدم وحشم والبيت قصر ناضره بعينه وما قدريقول ولاكلمه انحشر وقال بنفسه رفيق دربي هو من سرقني؟؟؟؟ المساعد حكا له وشلون نفذ السرقه مع واحد من اصدقاه وان البضاعه اللي نكس وجابه بالدين نص مدفوع ونص لا هي نفس البضاعه ولا سافر ولا شي والاسبوعين اللي غابهم كان بدار رفيقه بالسرقه وباقي البضاعه صرفوه شوي شوي على مدى السنين!! التاجر من المفاجئه قام ومن غير ولا كلمه ونكس لديرته وبعد كم شهر جته رساله وفيها شيك من المساعد بقيمة العود اللي سرقه واعتذار طول بعرض ومن ضمن ما كتب انه باع القصر والمزرعه وهو الحين مستريح انه رد المال وبيته الصغير الحين مريح اكثر كثير من قصره اللي هو كان ساكن.. تحياتي اختكم ..قوافي.. |
| الساعة الآن 11:49 PM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir