|
تو .. طين قصيدة للشاعر الإماراتي ساقي الشوق تو .. طين وش عاد يا دار ٍ بها صار ( توطين) و في مكتب التوظيف سوسن و ميسون ! مديرهم مدحت و نائبْته نسرين و على الرسبشن حمّص و فول و زيتون ! كل ما اتصلت اسمع ( الو مرحبا مين) ؟ بدّك وظيفه ؟ .. مين دلّك على هون ) أقول أنا لي اتصل صار شهرين و انتوا وعدتوني متى بس توفون اسمي ( مواطن ) ( جامعي ) طيب و زين كني أبخطب عندكم و اتّغلون ! عندي شهادة طايحه بجبدي سنين عشش عليها شي له ستة عيون !! لو للشهادة لسان قالت ( على وين) ناوي توديني .. تلف فيني الكون ؟ من كثر ما صورتها غارق بدين للهندي راعي المطبعه صرت مديون لا ليلي ليل ولا نهاري نوى يبين دقيت راسي لين ما صرت مينون ! مطلوب خبره عالأقل في مجالين ولا تجينا بواسطه و سير مدهون ! ولا انثبر في بيتك .. افرك بكفين يومك يشابه امسك و عيش مغبون تعدادنا ويّاهم أربع ملايين و أهل البلد للحين ما صاروا مليون !! ويلاه من باكر إذا وضعنا الحين و احنا اقل من الربع حالنا شجون ! و اللي ابتسم له حظه والله مسكين ! حصّل ووين... بس في وين .. تدرون ؟ ساكن في راس الخيمه .. حطوه في العين !! و اللي سكن في الذيد .. في السلع مدفون !! يشوف أهله بس في الأسبوع يومين و إذا حسبتوا الدرب كم ساعة .. تبكون يعني في كل أحواله ذاق الأمرين شغّال محزون و بلا شغل محزون و الأجنبي اللي راتبه فوق عشرين فله و سياره و تذاكر .. و طاعون عنده بدل كل شي عالراتب ألفين حتى بدل معجون أسنان و صابون ! و من بعد ما يجمع من بلادي فلسين و يربّي م لقعده على الكرسي بطون و يصير في بلاده غني و عنده برجين يرحل و هو جاحد .. و كم مثله ملعون ! و حتى الجماعه قوم مدحت و نسرين مردّهم لبلادهم لو يطولون يرضون بشوية دراهم .. و شفتين صبح و عصر .. لو حتى في الليل يرضون بس لو سمعتوا همسهم بينهم بين وسط القهاوي يلعنون و يسبون ! لا تحسبوني عنصري .. كلنا طين و الخل لو عاتب محبينه يمون داري و أنا أولى بها من الغريبين ما يوصلون لحبها لو يموتون و ( الأقربون أولى ) .. كلام ٍ من الدين ما جبته من شعري مع الهام و ظنون ولد البلد ما يبغي لبلاده الشين بالروح بالدم يفتديها ولا يخون لكن سؤاله يوم قلتوا له ( توطين ) يا كيف بيد الغرب توظيفه يكون ؟؟!! شعارهم معروف ( راجعنا بعدين ) و باين من التأجيل .. أنهم يخافون إذا معك خبره .. يا آهلين و سهلين و إذا شهادة بس .. عنك يصدون ما عندنا شاغر .. و بطلنا تعيين ولو تحرق الهاتف ترى ما يردون ! من وين أجيب الخبرة ؟ من وين من وين ؟ دام الوظيفة عند سوسن و ميسون ! عندي بمطبخ بيتنا خبره سنتين ! تنفع إذا صاروا المطاعم يوطنون ؟؟! ولا أهاجر و آخذ الخبرة في الصين ؟ صح العيون صغار .. لكن يقدْرون سؤال يا دار ٍ ..صراحة بترضين ؟ إني أسافر و اطلب الغرب لي عون ؟ و سؤال يا ناس ٍ على الرأس و العين صدق الوظايف واسطه و سير مدهون ؟ أما الجواب الشافي يجيني الحين أو هاتوا تأشيره .. إذا كنتوا ترضون ! |
صح لساانـــج وما شاء الله ع الابدااع الغااوي ان شاء الله الى الامام دوووووم اشكررررررررررررررفننننج ع القصيده الغاااااوي وصح السانج الشااعر والله يعطيج العافيه ونتظر منج زوود كلمات فى قمة روعة وتقبل مرورى |
اقتباس:
|
| الساعة الآن 07:53 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir