منتدى استراحات زايد - سالفة:دوج ابو عبيد..قوافي

السلام عليكم ورحمة الله وبركاته
صباح /مساء الخير للجميع
سالفة اليوم ماأدري وش جاب الفكره هذي لنا عيال وبنات شارعنا واكيد معهم حضرتي..
كان لنا جار عصبي جداً جداً ومن نشوف سيارته من أول الشارع الجميع يركض ويوخر عن وجهه..

الجار هذا يقاله :ابو عبيد
يشتغل كداد تكسي دوج مدري عام كم انتم احسبوه..
بيوم صدم صدمه قويه وفكه الله من الضربه اللي حاست خشة موتروه..
قعد له كم يوم بالبيت والصراحه ارتحنا من ازعاجه .. وبعد التعافي من الرضوض البسيطه وتصليح السياره من غير ما يصلح البويه عقب الصدمه رجع ثاني للشارع ..
وياليل مااطولك رجع ورجعنا للركض والتغبي عن وجهه وضنتي عنده مشكله لأنه كل ماشاف احد طقه بالعقال والمشكله كبير سن يعني وش يسوون الناس معه مدري !!
ولين الرجال يشجع نادي النصر
فقررو بزران الشارع ومن ضمنهم عياله انهم يهدونه شي يوسع صدره..
اقتراحات تجي وتروح بالاخير قررو يصبغون السياره بالوان النصر بما انها رايحة البويه من الصدمه..وبطرف الشارع فيه محل لبيع البويات والفرش وتقاطينا وشرينا سطلين على الوان النصر ولطعنا السياره وصارت كأنه زرافه من غير سيقان ..
واحتريناه يطلع عقب العصر يشوف وش سوينا بفترة نومته الظهر وكلنا أمل بنيل الرضا..
كنا مأمنين وصافين مثل الحرس ومصدقين انفسنا والمدح اللي بيجينا ..
هو طلع من الباب ولا ماطلع ماسمعنا غير زئير اسد مغلوث ودلينا نتخابط من الخوف وكل واحد راح بمكان..
بالنهايه هو استفاد بأن الجيران تقاطو له وسمكرو البويه كله عشان حق الجار ولا يبونه يزعل..واحسن شي انه صار اطيب من الطيب معنا وتغير سبحان الله من حال إلى حال وسلامتكم,
تحياتي
اختكم
..قوافي..