|
راعي العجراء والبس والمكيف الصحراوي السلام عليكم ورحمة الله وبركاته اليكم هذه السالفه بعنوان راعي العجراء والبس والمكيف الصحراوي في سنة من السنين وبعد زواجي كانت الاسطح مع الجيران متشابكه وكانت غرفتي في السطح وكان عندي مكيف صحراوي ربع حصان وللمعلوميه الى الحين ابحث عن باقي الحصان ولابعد لقيته المهم كان فيه قطو (بس) يجي وزنه عشره كيلو ماهنا بيت مايمر عليه يتعشى بالليله عشرين مره مايوفر شي لما صار ضهره تقول خيمة ام عمودين وماشدت زين من كبره وكان متسلط سلطه اذا بغت تغمض العين طب على المكيف الصحراوي قبل ينزل للسطح يخاف يطب على السطح مباشره ينفضخ فضخت دمل من الشبعه الوزن عشره كيلو وصندوقه فاضي واذا حمل لازم يمر على وزن الشاحنات حمولته اكثر من وزنه من المناقز على البيوت ولاجاء النهار مدد تحت جدار ودبخه نومه مدلع نفسه بالقوه ومنظم وقته الساعه كذا عند البيت الفلاني والساعه كذا بالبيت الفلاني ويعرف اهالي البيت متى ينامون المهم هالبس طوله مره مرتين عشر عشرين ولايطب الا لاغمضت العين روتين ماتغير دورت على طريقه ولم افلح ولكن هالبس غاثن مغثه لو امسكه ان اخلي وزنه نصف كيلو من القهر والله وتخطر في بالي فكره وانا اروح للمكتبه واشتري كرتونين دبابيس واجيب معي كرتون مقوى اللي على مقاس سطح المكيف وانا اغرس الدبابيس في الكرتون وانا احطه على المكيف يوم جاء ابو الشباب على العاده يبي يطب على المكيف ولاه طبت القشر بس هو وصل للمكيف وهو يزعق زعقة طيح الياسه بالغرفه وتشطبت الدرجه وهو يفتر بالسطح من غير وعي لايقدر حتى يهج صار يزحف زحافه تقول عسكر ابطال فرجينيا ذاك الفلم كان يجي بالتلفزيون ايام ابيض واسود ومن عقبه ماعاد شفت رقعه وجهه دارت الايام ويوم تطورنا وحطينا مكيف فريون بعد ماغيرنا المنزل تسلطن علي الحمام يوقعن على المكيف ويبدا الذكر يحم على اتثه وخاصه وقت الضهر والمكيف رفيع مالي فيه حيله وانا ادخل للسوق واشتري دميه على شكل نمر منسدح من التعب حجمه كبر البس وانا اطلع للسطح وحط غراء بتكس في بطنه وانا انزله بسلك مكينه خياطه على المكيف يوم مسك واسحب السلك وينقطع ومن عقبه ماعاد شفت الحمام ويوم صار عقب مده عرفن الحمام ان هالبس ماهو بس حقيقي او صار شكله مالوف المهم انهن عرفن ان البس خرطي وهذا النمر له ذيل مقوس وجاي عند بطنه من ذهانتي مارحت افله خليته على تقويسته لعل الحمام حطن عشهن بين الجسم وتقويسة الذيل وصار خوش محل وفرخن تحت رجلين البس اللي انا حاطه لهن معلنات رأيه التحدي واحس انهن يقولون ثاني مره لا تبيع البيض على سلاقينه وعرفت اني ماغير الدربي هالدميجه انتهت السالفه ارجوا ان تكون اعجبتكم والله يحفظكم وقبل الختام سبحانك اللهم وبحمدك لااله الاانت استغفرك واتوب اليك |
| الساعة الآن 03:05 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir