منتدى استراحات زايد - سالفة:تطعيس نسائي..قوافي

السلام عليكم ورحمة الله وبركاته
اسعد الله صباح/مساء الجميع
:r مع الاجواء الممتعه وبداية التجمد بعد التسييح والهجره لصحرائنا وبرارينا الجميله اللتي لا تخلو من مواقف جميله نتكحل بها وبأنتظار فصل الصقيع..
رمالنا الذهبيه والاغراء بالتطعيس وهي المسابقه مع المجهول مدري وش الاستمتاع اللي نشوفه غير الدوار والغثيان والوجه الاصفر ولين جا من بكره قلنا ثاني ثاني نطعس!!!هذا الكلام بالنسبه لنا يالحريم:D
أخوي الصغير توه شاري ددسن وفرحان فيه لو تقوله اطلع به القمر طلع المهم يسوق وكل يوم يتهيض واشعار بالددسن وتمسيح وستاير حركاة.
بيوم رحنا معه نطعس قريب من خيامنا واشوى انه مهوب بعيد
والصندوق مليان وذا طاير والعبايات طايره كننا بات مان اللي بأفلام كرتون :)
من طعس لطعس وبوحده من الطعسات انفتح باب صحن الددسن ولا فيه شي نتمسك به وبدقيقه إلا وكلنا برا الصحن تقل حبات فول متناثره:( وصراخ وضحك بس الحبيب اخوي ومع الستاير اللي صاكةً الغماره ما شاف ولا درى وعلى باله اننا معه لين الحين وشوت بددسنه وراح ونصوت يالأخو يالحبيب يالغالي يبوددسن لاحياة لمن تنادي:mad: ضربة فيوزي أم الوناسه ذيك الساعه قريبين ايه بس مشوار يبيله بعير مع هاالطعوس
واشغل بوصلة مخي وين أنابه لين ركزت شوي وياله ياأخوات !!كل وحده تحججت واللي خايفه تضيع واللي المشي صعب .وقرب مغرب وذاك ما أدري وش صار عليه غريبه لين الحين مادرا بطيحتنا من الصحن..
لاعادة تعود قلت بروح وارسل سياره شوي إلا ملك الددسن يدور وين ضيع الامانه ونرجع نا خذهم ولا من شاف ولا من درا.. وبكره نفس الاسطوانه نبي نطعس ..وياليل ما طولك.
تحياتي
اختكم
قوافي