|
جزع قلبي المسكين وارتج وارتهـش قصيدة للشاعر عبدالعزيز بن عبدالله النداوي الضويان ابوهلا وهو من قبيلة بني زيد من سكان قرية الشعراء توفي في عز شبابه بحادث مروري بين شقراء والدوادمي ( رحمة الله ووالدتي والمسلمين اجمعين) . جزع قلبي المسكين وارتج وارتهـش على غالـي فرقـاه للقلـب واحشـه بحرف الهجاء لاسمه على ثومته نقش برسمٍ من الياقوت والمسـك ناقشـه سميه جفـل يـومٍ رمايـه إرتبـش رماها وصارت فوق شبرين طايشـه ولا هيب غربية ولاهي من الحبـش من أهل الوطن في عالية نجد عايشه لها طلعةٍ من شافهـا بـاه واندهـش ولها قامة فرعا زها الوسـط قايشـه عيون المها يسحر بعينـه اليارمـش بسحـرٍ حـلالٍ حطـه الله برامشـه عليه أشقرٍ مجدول وإن قضته عكـش كساها قِدم واخلاف للـردف نايشـه لها وجنةٍ بيضاء ولا دقهـا النمـش غلاها يسل الحال والقلـب عارشـه لها هش قلبي يوم جتني بقلـبٍ هـش عزمني وجيته يوم أهل ذاك طارشـه تعطرت بالعنبر ورشيـت بالمـرش وتفرشت جوخٍ كامل الزيـن فارشـه ترى مركب العشاق في بحر حبه دش تلقا هبوبٍ كـوس وأمـواج طايشـه وكبدي وكبده يابسات مـن العطـش ولاكن نصون النفس عن كل فاحشـه توادعت أنا وياه مع سرحـة الدبـش أخذ سبحتي وأخذت حبـت غوايشـه وراحت عفيفة جيب ماداست الغشـش سوى كلمة عذبـه وللوجـه فاتشـه وأنا رحت للبصره وهو لليمن طرش ولاظن طرشي يلتقي مـع طوارشـه عليها سلام الله ما مطر سمـاه ورش وعدد مايطري راعي الدين عايشـه عسى من سعى بفراقها لرقطٍ حنـش على عرش رجله شين الأنياب ناهشه يساهر ثلاث أيام عنه الرقـاد يهـش ورابع نهاره مات من سـم هايشـه رحمه الله ياابوهلا |
| الساعة الآن 03:18 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir