حاله غريبة في مكينة الــ gxr
 

السلام عليكم ورحمة الله وبركاته

كيفكم اخواني الأعزاء

جيب الوالد الله يحفظه صارت له حاله غريبه اول مره تمر علي

السيارة جيب gxr موديل 2007

طبعا الوالد محافظ عليه وتشييكات في الوكالة حتى الحاجة الي نص عمر يغيرها

السالفه كنت جاي انا وياه وانا الي اسوق الجيب من البر مسافة 300 كيلو عن الرياض الساعة تقريبا 2 في اليل

يوم اقبلنا على الرياض ولعة لنمبة المكينة وقفنا
الحرارة طبيعيه ... عايرنا الزيت تمام زيت القير تمام الماء تمام كل شي تمام

قلنا بنمشي عليه للرياض مدام حالته طبيعية

المهم مامشينا تقريبا 10 كيلو يالربع طلع صوت انفجار في المكينة وبخار ماء الأديتر مع جنوب الكبوت

وقفنا وفتحت الكبوت الى المكينة مولعه من الحراره قسم بالله ريحة الأسلاك تصرعك ودخنه
والأديتر منفجر من عند الطبه الي فوق من جنب غطاء الأديتر مكان غريب


وانبير الحراره طبيعي يالربع طفينا الموتر ورشينا المكينة بموية لا تولع


المهم الصباح وديناه الوكاله جانا مهندس سعودي يعرف الوالد قال لا تنزلونه لو نزلتوه الله يعينكم علينا مافيه تصليح عندنا كل شي تغيير والمكينة لو فيها شي راح نغير مكينة على طول بــ 24 الف من غير الأديتر ومن غير الأشياء الثانية


قال اول شي غيرو له اديتر وشغلوه


نزلته من السطحه وعبيته مويه ومشيت عليه للبيت والمويه تصب من فوق ولا ارتفعت الحرارة ولاهم يحزنون اللهم صوت طقطقه خفيفه في المكينة


وقبل شوي جاء عامل وفك اديتره في البيت وبكره بيجيب له اديتر يركبه


والله مدري وش ذى المشكله الي مرت عليه يعلمنا

هل البلف اذا قفل يسوي زي كذا بدون ما ترتفع حرارة الأمبير


والي يخبر لنا ورشة توضيب او كشف ممتازه يعلمنا لأن المكينة عقب الي شفته مااضن انها مطوله