منتدى استراحات زايد - قصة واقعية قصة حب اماراتية : راكان لبست خاتم حبي وصار دم .....

البارت 1

نزلت من الموتر وتساعدها العنود لين ماوصلت البيت ويوم دخلت عند الباب...
العنود: هذي بنتكم... سليمة معافاة!!! يالله انا اخلص دوري.. ريلي يباني.. فمان الله...
ومياري واقفة في الصالة ... ووصل الخبر لاهلها عن طريق بوراكان انهم فتحوا الموضوع وياها...

ابراهيم: السلام عليكم...
مياري حست بقلبها يعّورها وفخاطرها اتصيح لانها اتذكرت يوم يسحبها من شعرها ويفرها عالارض وكيف كان مستانس يوم يضربها...
مياري: اميي وينج؟؟؟
امها: انا هني حبيبتي ( ومسكتها من ذراعها)
مياري: وديني حجرتي !!! وعليكم السلام... وبعد السلام.. ماشي كلام من بيننا لا انته خالي ولا انا بنت اختك فهمت؟
ودخلت الغرفة وهي متضايجة
امها: لا حول ولا قوة الا بالله... لين متى بتمون على هاي الحالة؟؟...
مياري: امي دخيلج!!! لا تدخلين خليني فحالي!!! اللي سواه هب شويه... كنت بنشل ولا بنجتل!!!
امها: عوذ بالله حشا شو هالكلام... تف من حلجج!!!
مياري: اميه عاد!!!
امها: خلاص انا ظاهرة واذا تبيني دقي لي على رقم واحد وهوه الموبايل حذالج... تبيني انام عندج؟؟
مياري: لا ياماية... سيري عند ريلج!!! ونادي ريلج ابا اكلمه..
امها: احشمي يابنية هذا ابوج!!!
مياري: ههههههه ادري والله وعلى عيني وراسي فديتكم...
ونادته ويلس عندها...
مياري: ابويه ادري انهم خبروك ... شو رايك في الموضوع؟
بوسعيد: غناتي الشور شورج... والللي بتقولينه نحن وياج... بس الولد نادم...
وتمت تستخير بس حست انها ماتشوف شي في الاستخارة.. وسكتت عن السالفة... واتفكر كيف انها معرسة.. واتفكر براكان اللي يلعوزها واللي كان يلاحقها والحين يباها!!!
وقاموا خلق الله يزورون مياري ويتحمدون لها بالسلامة ... وهي كانت كل ما تسمع حد ياي تساعدها الخدامة في اللباس وتستانس... وتنزل وهي بكامل كشختها.. وتيلس في الصالة وتسولف ويالحريم.. واللي يتكلم وياها يرتاح نفسيا بسببها وبسبب بشاشة ويهها يعني ماكانت متكدرة كانت طول الوقت تبتسم وتضحك وياهم...
وسارة من وصلت البلاد قطعت فجأة عنها.. وكانت تسأل مياري عنها ... بس سارة ماتسويلها سالفة...والعنود بكل لحظة وياها.. وكان ابراهيم كل مايلتقي بمياري يشوفها بس مايتكلم عسب ما اتعصب ولانه ابوها مرمسنه انه مايقول لها شي... وهي كانت تسأل عن اخباره عن طريق الخدامة...
وبعد 3 اسابيع كانت مياري في الصالة يالسة تسمع اغاني على قناة نجوم وتاكل كاكاو والخدامة متونسة وياها وتسالها شو يسوون في الفيديوكليبات وتضحك مياري على كلام الخدامة...
مياري: ابويه !!! ابويه!!! وينك يابويه!!!
بوسعيد: ها شو تبين ورايه شغل؟؟؟
مياري: مياري: امايا تعالي !!!
ويوم وصلوا...
امها: ها غناتي!!! بغيتي شي؟؟؟
مياري: بغيت اخبركم اني احم .. احم.. موافقة اني اخذ راكان...
ويالسة تلعب بقرطاسة الكاكاو..
ابوها:زين!!! زين!!! بالبركة!!!
امها: استخرتي!!!
مياري: ها!!! هي استخرت..
امها: منه المال ومنج العيال!!!!
مياري اتغير ويهها: يالله يا امي بعدنا!!!
واتصل بوسعيد على بوراكان عسب يبشره
بوراكان: مرحبا ملاايين بشر يا بوسعيد؟؟؟؟
بوسعيد: وافقت روحها محد غصبها !!! ومابنلاقي احسن من ولدك!!!
بوراكان: هذا من طيب اصلك..
بوراكان يصارخ: راكان!!! راكان!!! تعال!!!
وبصوت واطي: اسمع شو بقول حق راكان!!
راكان: نعم الشيخ!!! شو بغيت طال عمرك؟؟!!!
بوراكان: راكان كل شي نصيب!!! تراه البنية ما وافقت تاخذك...
فهذيجي اللحظة حس بالصدمة ... واتغير ويهه واتقبل الامر ... بس انصعق وقال: صدقك يابويه كل شي نصيب!!! بس كنت اباها هالبنية لانها دشت خاطري!!!
وبوسعيد يكلم بوراكان: كسر خاطري خبره ... خاف ربك!!!!
بوراكان يضحك بصوت عالي : ههههههه صدناااك !!! البنية موافقة!!!
راكان فاج عيونه هب مصدق: ابويه !!! ابويه!!! شووو؟ وافقت؟؟؟ احلف؟؟؟
بوراكان: انا جد مرة جذبت عليك؟؟؟ عيب ياولد!!!
راكان بمكر: وتوة هذا شو يسمونه مقصة؟
ويضحكون بوسعيد وبوراكان ونسوا همومهم...
بوسعيد: نسايب يا بوراكان...
راكان: سيف!!! سيف!!!
بوراكان: اشوفك عجيت المياديف!!! العنت الله عليك!!! قوم شبلاك قووم!!!
وراكان قفز على ابوه يبا ياخذ التيلفون منه
راكان: دخيلك خله الملجة الاسبوع الياي!!!
بوسعيد: خلاص تم بالحل!!!
راكان: ياويل حال راكان... الحقي علية يامياري!!!!
بوراكان: عجيب!!! جدامنا بعد؟؟
راكان ورافع حواجبه: احم احم
( عند سارة)
كم من مرة حاولت سارة اتكلم فيصل.. بس مايخلي لها فرصة... وخذت تيلفون امها وتتصل حق فيصل من رقم امها
فيصل: الوو؟
سارة: مرحبا... توة الناس!!!
فيصل: نعم؟؟
سارة: انا سارة ماعرفتني اللي في المطار؟؟؟
فيصل: هاا؟؟!!! اقولج انا مشغول هب فاضي اكلم يهال وحق هالخرابيط
( وبند فويهها) وسارة قفطت واحمر ويهها
فيصل: هذي مينونة!!!
وانتشر الخبر بسرعة البرق انه راكان بياخذ مياري الاسبوع الياي... وساروا يتجهزون حق يوم الاربعاء..
راكان: الووو؟؟.. مرحبا؟
فيصل: مرحبا ملاايين شحالك؟؟ وين القطاعة؟؟؟!!!
راكان: ياريال نتزهب بنعرس!!!
فيصل: هي ما شاء الله بالبركة عليك ... منك المال ومنها العيال ...ومنوه النسيب؟
راكان: من قوم(-----) البنية اللي يت المطار .. وكانت يالسة يوم كنا نرزف...
فيصل منصدم: قول والله؟؟!!!
راكان: والله !!! جيه شو بلاها؟
فيصل: لا ابد !!! بس ما توقعت انك تعرس بهالسرعة!!!
راكان: ههه ... تراك معزوم على ملجتي يوم الاربعاء... لازم تشهد...
فيصل بحزن: تم طال عمرك.... ومبروك...
راكان: الله يبارك فيك وعقبالك... فيصل بند عن راكان وحس بضيجة فصدره... يفكر فعيونها وضحكتها وبراءتها لا ولين الحين ما يعرف منو هي... لحظة!!! بتصل حق خالد وبسأله... ولا لاء شو الفايدة!!! مادام قلبها تربع فعرشه راكان... خلاص الله يسعدها... وانا لازم ... انساها....وتفكيري فيها ما يوقف لأي لحظة... مع انه بنات وايد احلى عنها ... بس مادري ليش هالبنووتة دشت خاطري...
سارة فكرت بخطة انها تنتقم من مياري عسب انها بدون ماتدري ... تخلي راكان يفكر فيها وقالت بتنفذها ... دوّرت وسألت واتقصت عن البنية اللي خذت راكان ( سارة طليجته) ... وسوّت لها تيلفون وتفاهمت وياها على خطة جهنمية ... وكانت مياري مستانسة وتتزهب والعنود تساعدها... حتى قبل الملجة بيوم ... نامت عندها العنود ... ومياري اتفكر براكان... وكيف بتكون على ذمته وكيف بتسعده.. وبأي طريقة.. وبتحطه فعيونها وقلبها... مع انه عيونها بعدها ما اتفتحت ...
(ويوم الملجة)
خلق الله كلها متدودهة ( داير راسهم) ,.... وبيت مياري ناس داخلين وناس طالعين ... يركبون الليتات... والبوفيه والطاولات... يوم أذن العصر... سار راكان بيصلي في المسيد... صلى ورد... ويوم يأذن المغرب.. رن تيلفونه... رقم غريب
طليجته: راكان؟
راكان: نعم؟ منو؟
طليجته: انا سارة حرمتك سابقا ما عرفتني؟؟
راكان: اها سارة قلتيلي!!! نعم امري شو بغيتي؟؟!!!
سارة: بغيتك انته!! ابا اكلمك ف شي ضروري!!!
راكان: مااقدر ملجتي اليوم..
طليجته: شوف ياراكان اذا ما ييت والله وهذي حلفتي بقول حق كل الناس انك تحبني وخصوصا حرمتك
راكان: مابتصدق!!! اونج بتخوفيني؟؟!!! العبي غيرها!! حركاتج معروفة!!!
طليجته: شوف اذا ما ييت قسما بالله لأيي بيتكم واسوي فضيحة...
راكان: اقولج اللي فراسج سويه !!!
( وبند فويهها)... وهي طلعت بموترها اتطير ويت صوب بيت راكان ... وتضرب هرنات بالقـــــو....
بوراكان بيظهر بجلابيته: اشوو هذا؟؟؟ عنبوا منو حاشر الدنيا جذييه؟؟
طرشت سارة مسج حق راكان: ان ماييتني بنزل من الموتر وبكلم اهلك...
راكان فخاطره: الله يغربلج يا سارووه هذا وقتج!!!
ونزل لها وركب وياها... اول ما ركب وبند الباب ضربت خط
راكان: ايييه المينونة !!! الخبلة وين موّدتني؟؟!!!
سارة: بوديك!!! بوديك جهنم !! هههههه لا تخاف بردك عند حرمتك لا تخاف...
راكان منصدم: ما بتوقفين الموتر !!! دخيل والديج ملجتي اليوم!!!
سارة: ما بوقف!!
راكان: ما بتوقفين!!!
وفهذيجي اللحظة مطها من شعرها وشاوحت بالموتر وهي تصارخ
راكان: وقفي!!!
سارة: شوف لو تمط شعري ما يهمني... اهم شي احرق قلبك مثل ما خبرت ابويه عني!!! صدق نذل!!!
ووصلوا العوير
راكان: الله يغربلج...
( وحط يده داخل مخباه نسى تيلفونه على الطاولة)
بعد صلاة العشاء
خلق الله يتريون صوب الحريم وصوب الرياييل ... وكانت مياري ظاهرة بنت من بنات الشيوخ بفستاهنها ومكياجها وشعرها الاسو وقصتها اللي تبين اصغر عن عمرها... وابتسامتها ولكن من الداخل ميتة من الخوف وفخاطرها: يا ربي ليش لين الحين ما يا راكان؟؟!!!
فيصل وصل بيت قوم مياري ويا سعيد.. وفي الموتر بعدهم ما نزلوا
سعيد: الله يو فقه
فيصل: اتصدق ف ليلة عرسه برزف ناذر اني ارزف فيوم عرسه
سعيد: انساها ياريال وخل السالفة اتعدي على خير
فيصل : لا تطلب مني هالشي اطلب من قليبي
ونزلوا وساروا يسلمون عالرياييل بس راكان محد... والناس قاموا يتكلمون والمطوع اللي بيملج يسأل بوراكان ... وبوراكان وفيصل وسعيد حارقين تيلفون راكان حراق..

(عند سارة طليجة راكان)
راكان: وقفي!!!
سارة: مب موقفة!!!
راكان بطل الباب والموتر يمشي وانجلب عالارض وانجرحت ريله..
ونزلت من الموتر اتطالعه اذا استوا به شي... طلع بخير
سارة: اركب وبس عن الافلام الهندية!!!
راكان: الله يلعنج
سارة حاطة يدها على خاصرتها: ياماما بتاكلني!! قوم... قوم!!! خلني اردك عند حرمتك...
راكان: كلاج السروّ !!!
وقام وهو يتويّع من الالم وركب ورا
وطول الطريج محد نطق بكلمة... ويوم وصلته بيتهم...
وهذيجي من نذالتها اتصلت حق سارة وسارة متشققة من الفرحة وفخاطرها: انا بحرق قلبج لانج ملكتي قلوبهم كلهم حتى عيضة؟؟!!! يالله الفضيحة!!! طاعي الفضيحة حتى فيصل ما يباج عقب ماهجرج راكان ههههه
واتطالع ويه مياري اللي كان متوتر
مياري فخاطرها: الله يستر!!! راكان يالله اتكون بخير!!!
مياري بصوت خفيف: عنود !!! عنود!!!
وكل الحريم يطالعونها... ونظرت خيبة الالم فيهم..
العنود:ها مياري؟ بغيتي شي؟؟!!!
مياري: وديني غرفتي!!! قبل ما انهار!!!
العنود اتغيرت ملامحها من ابتسامة لخوف: ان شاء الله
وخذتها لغرفتها ... ويوم وصلت داخل الغرفة...
مياري: ادري شكله غير رايه..
العنود: وانتي شدراج !! يمكن انشغل؟؟!!!
مياري: بالعقل!!! حد يفّوت ملجته عسب شغل؟؟؟؟
وتقبضها صيحة من الخاطر
وروحوا خلق الله وتموا عايلة راكان وعايلة مياري في الميلس
واخت راكان هند راحت لغرفة مياري ... واتدق الباب...
مياري : العنود حد يدق الباب ... صبري .. مابا حد يشوف دموعي!!!
هند: ممكن ادخل؟
مياري: منو غناتي؟
هند: انا هنوودة!!
مياري: هلا حبيبتي حياج!! اقربي!!!
هند: جريب ... عادي اسولف وياكم؟؟
العنود: اتفضلي غناتي ... انا بخليكم ... بسير اطالع خالوه...
مياري: يلسي عنودوه انتي هب غريبة!!!
العنود: انتي ما فهمتي التلميح؟؟!!! صدق انج...
مياري: شو؟ شو؟
العنود: حلوة ... وطيبة.. ونحبج... بسير اكلم ريلي حرام... يالله باي
وسارت العنود تتصل بخالد
العنود: خلودي وين راكان ارحم حالي شوية؟؟ اعصاب البنية بتنهار!!! خلاص!!!
خالد: ونحن عيل شو؟ انا احين من متى احوط ادوّر عليه واخوانه ويايه بعد
راشد اخو راكان: هذوو!!! هذو!!! نازل من موتر سارووه!!!
خالد: اكووه حصلناه لا تخبرينها لين انعرف شو السالفة..
العنود: شكل مياري صدق هالمرة بتطيح طيحة محد بيروم لها...
خالد: الله ياخذ بيدها ويكون عذر راكان عذر ينصرط!! انا احين بخليج الغالية
العنود: خلاص الله يحفظك حبيبي...
( عند مياري)
هند: حبيبتي مياري لاتزعلين والله انه راكان يحبج موت موت!!!
مياري :هههههه وانتي كيف دريتي؟
هند: من رديتي من السفر وهو متخبل عليج ومعلن في البيت كله انه يحبج وبياخذج...
مياري حز الكلام فخاطرها: يباني !!!والله اذا كان بخير ما بيشوف مني خير!!! على الفضيحة اللي سواها
(عند سارة)
سارة اتدق على طليجته
سارة: هلا حبيبتي ...وغناتي بعد
طليجته: هلا والله ... كل شي تمام .. انتي خبريني شو صار ؟ ههههه
سارة: اقولج دمعتها على عينها .. والله فخاطري حزتها اضحك عليها... وراكان؟
طليجته: وديته العوير ... وبطل الباب وانجلب ... بس ماصار له شي ..ورديته بيته
سارة: اويه صار له شي؟
طليجته: لا !! اشوفج مهتمة؟
سارة: لا!!! الحمدلله حرقت قلبها وقلبه وفيصل اكيد مستانس
طليجته: صدق انج ياهل ههههههه ... بتعرفيني عليه؟؟؟
وسارة بندت فويهها

(وعند خالد في الموتر)
خالد: منو هاي؟
علي: هذا موتر طليجته ساروه ... شو يسوي وياها؟
راشد: اوييه لا يكون خلى مياري عشانها؟؟؟؟
خالد: والله بيندم على اليوم اللي فكر انه يبا مياري !!! حوّلوا (انزلوا) بنسير انطالع الريال!!!
ونزلوا من الموتر ودخلوا داخل... علي وراشد: راكان!!! راكان!!!
راكان نازل من فوق : ياي!!! ياي!!!
خالد: انزل!! لألعن صيرك الحينه!!!
راكان: سامحوني ... اتأخرت عليكم يالله نسير..
ويعدل كندورته وعصامته ... وتوة بيتكلم ... حصل من خالد بوكس على ويهه ... راكان ضارب عنده الجايج وعلي ماسك راكان وراشد ماسك خالد...
خالد: الله يلعنك لعبت بمشاعر البنية !!! والله لاراويك يالنذل!!!
راكان: شوفوا اذا ما هديتوه ما بخبركم شو استوا...
خالد: مفهومة !!! ساير عند طليجتك وراكب وياها ... وبعد ماخلصت شغلك رديت!!!... انخدعوا فيك خلق الله وانا من بينهم...
علي:هيّد دخيلك ... هيّد ياخالد!!!
خالد: شو اهيّد ؟؟... خلى فيها تهيييد؟؟ ... خلني اكسر راسه...
راكان: انته بتكسر راسي!!! اتخسي الا انته فصعون ميلس!!!
وراشد وعلي ماسكينهم عن يجتلون بعض ... وبوراكان وام راكان وهند دخلوا منصدمين من شو مستوي..بوراكان: شو صاير؟ !!! استهدوا بالله!!!
امراكان: عوذ بالله !!! هيدوا!!! عين ما صلت على النبي!!
راكان: سكتوا هذا !!! لاييب اجله!!!
خالد: جاب نذل ويتكلم بعدما شرد من الملجة وخلص شغله ويا طليجته رد... والحين تبا تسير لمياري .. احلم!!! لاتخطي بيتها ... انساها...
وراشد ماسك خالد وراكان فلّت عمره من علي...
راكان: خلني!!! ياخي ما بسويبه شي ...
ويوم فلته ...دز راكان خالد وعجاه عالارض ... خذ مفتاح الموتر وركض برع وركب موتره وشغله وروح بسرعة.. وخالد يوم طاح عالارض .. ام راكان صارخت من الخوف... وعلي وراشد وبوراكان يساعدون خالدانه يقوم..
بوراكان: حسبي الله عليه من ولد!!! حسبي الله عليه من ولد!!! نزل راسنا!!!
وقام خالد وويهه محمر ... وفخاطره يجتل راكان من الضرب... ظهر من البيت وهو يركض بعد وركب موتره ولحق راكان... وراكان من وصل بيت مياري مادق الجرس ... سيده دخل الميلس وكان هناك بومياري...
بومياري واف ومعصب : توة الناس!!! خلق الله روحوا... وتوّك ياي؟؟
راكان: عمي افهمني صار شي.. ولازم اخبر مياري...وينها؟؟؟
بومياري: وبعد تباها؟؟!!! اففف الصراحة مافيك مذهب انا بييبها لك ... لكن اقولك كلمة ورد غطاها ... انا هب موافق تاخذها.. وهذي اخر مرة اتشوفها..
راكان: عمي!!! ارحم حالي ونادها ( وكان الحزن على وييهه)
بومياري طلع من الميلس وهو مفوّل منه وراح لغرفة مياري .. وكانت العنود وياها تهديها..
بومياري: مارية؟
البارت2

مياري تمسح الدموع اللي فويهها وتمسك ذراع العنود : نعم؟
بومياري: غناتي ترا راكان تحت في الميلس!!!العنود: صل؟؟ خلني اراويه شغل الله!!!
مياري وويها جدي: وصل حضرته؟ ودوني الميلس وخلوني روحي..
بومياري: الريال ما يستاهل انج تلوثين لسانج واتكلمينه!!!
العنود: صدقه عمي!!!
مياري: ودوني!!!
العنود: ان شاء الله..
وودتها العنود الميلس ويوم وصلت مياري الميلس ..راكان شافها وابتسم ووقف.. وفجأة ينفتح باب الميلس الخارجي بقوة..
خالد وهو مفوّل: راكانووه!!! والله ما اهدك!!!
مياري تغير ويهها : شو مستوي؟؟؟
وخالد ماسك راكان من ثيابه وبيتضارب وياه..
راكان: هدني!!!
مياري بأعلى صوتها: خالد!!! هد راكان الحينه!!!
خالد: انتي ماتعرفين شو سوا؟؟؟
مياري: شو سوا؟ خبرني.. بدون ماتصارخ..
والعنود ماسكة مياري
العنود: يلسوا دخيلكم مانبا فضايح زيادة!!!مياري: كل واحد ييلس فصوب بسرعة!!!
خالد وهو ييلس :اتعرفين الحقير شو سوا؟؟
وراكان ساكت ... يترياه يخلص
مياري: العنود وديني ايلس ..خالد قوللي شو استوا؟
ويلسوا كلهم.. خالد: بعد ما دورنا على ولد العرب فكل مكان .. قلنا بنرد بيتهم .. يمكن سبحان الله نحصله.. وحصلناه... ويامنوه؟؟ ونازل من موتر منو؟
والعنود مندمجة :منو؟
ومياري ساكته..
خالد: ويا طليجته نازل من موترها..
مياري دمعتها نزلت ع خدها .. وكانت حاسة ورا السالفة سارة .. كان مجرد احساس والحين صار صدج..مياري وملامح الجد فويهها .. وكانت تمسك يد العنود وتشد عليها من الانفعال .. والعنود عرفت انه هذا من المها من اللي صار ...
راكان: مابتخليني ادافع عن عمري؟
خالد: انته جاب!!! يعلك بالساحق والماحق والرصاص المتلاحق!!!
مياري: عنود!!! خالد!!! خلونا روحنا...
العنود قامت هي وخالد وراكان يطالعها هي وكشختهاويفكر كيف متعدلتله

مياري وبحزن: خبرني ...
راكان ويخبرها السالفة كلها..
مياري: خلصت؟
مياري فخاطرها: مب مصدقة !!! هذا كله يستوي ومن طليجته!!! عنبوا فيلم هندي!!!
راكان : هي نعم خلصت ... وانا طال عمرج احبج واباج اتكونين حرمتي اليوم قبل باجر ... والحينه بعد!!!
مياري كانت منزلة راسها ... ويوم عج الكلام ... رفعت راسها.. وقالت: راكان؟
راكان: عيونه؟؟
مياري: راكان لبست خاتم حبي وصار دم ... وانا اقولك الله يهنيك ويسعدك واتحصل بنت الحلال ... وانا هب موافقة اني اتزوجك.... لاني من عرفتك وانا اطيح فمشاكل...... واخر مشاكلك فضيحة!!!..... اتحراني ما اشوف معناتها ما احس بكلام الناس يوم هم يتصاصرون وكأني ما اسمعهم بعد؟....يوم يقولون : وحليلها هدّاها لانها ما اتشوف!!! !!! وانا كنت معجبة فيك ... هي نعم معجبة فيك ... لكن يا حسافة!!!

وتنزل دموعها...
راكان: مياري!!! غناتي!!! انا وشلي؟؟؟
مياري وهي فغصتها : مابا شفقتك.. انا مسامحتنك على كل شي ... بس اظهر من حياتي...
راكان: دخيلج والله لأسير اييب المطوع الحينه!!!
مياري: كنت تقدر ماتركب الموتر ... ليش ركبت؟ مب لازم اتقولي ... سامحني لاني ماباخذك ... عنود!!! عنود!!!!
وماخلت راكان يكمل كلامه ... وعنود يت خذتها ... وودتها غرفتها...
وراكان فخاطره: ليش خليتيني؟؟!!! كنتي معجبة فية!!! انا ما خنتج يا غناتي!!!!

ورد البيت وهو متكدر وحاط فخاطره ... ويفكر كيف يخليها له... ومياري من ردت غرفتها وهي تصيح ... ومرت الايام وخلق الله اتكلموا بسالفتها.... وصارت علج بحلوج االناس...ومياري نست راكان... والتهت بالاهل.. وبدت تشتغل ويالعنود...وودرت شغلها القبلي...كانت تعطي ملاحظاتها مثلا انه كيف يتصور الفيديوكليب على حسب الاغنية وأي قصة بيستلهمون منها قصة الاغنية... وكانت العنود تظهر فلقاءات صحفية قليلة وتشكر مياري ... ومياري ماتكون وياها .. عسب ما تسبب لها الاحراج... وبعد 3 شهور قررت مياري اتسير اتعالج عن عيونها ... مادامها هي بخير واتعافت ليش

ماتسير اتسوي العملية!!!ونسيت اخبركم ... راكان ما نسى مياري... كانت دوم فباله فكل لحظة ... وكان يحس انه كل ما يفكر فيها كأنها اتحفزه على انه يشتغل ويرتقي فشغله... وهو الحين مدير شركات ابوه ... وابوه اتقاعد وخلى كل اشغاله كلها على عاتق راكان ... وراكان كان يهمل فعمره ... وسارة كل ماياها تدمر زيادة... ويا التيلفون... كل يوم ويا حد ... وفيصل بعد ما درى بفسخ العرس استانس ... ودرى عن طريج خالد ريل العنود ... انه مياري بتسير تتعالج ... ويوم بترد بتاخذ دورات في الانجليزي فمعهد....وهني تبدا القصة....
اتجهزت مياري حق السفر وامها وابوها بعد ... والعنود مارامت اتسافر لانها فشهرها السابع ... ويوم وصلوا ألمانيا ... تنومت مياري في المستشفى بعد 5 ايام ... وسوولها العملية بعد اسبوع من الفحوصات المتأخرة قبل العملية..ونجحت العملية ... بس ما فجوا الشاش اللي فعيونها ... لازم ترتاح ... وبومياري وام مياري على اعصابهم ويوم اطمنوا ... طمنوا الاهل كلهم وحتى طمنوا عايلة بوراكان ... لانه بوراكان حاس بالذنب من اللي صار ... ويوم قامت من البنج ... استانست وحمدت ربها ... ويابولها سجادة عسب تصلي وتشكر ربها ...
ويوم تيلس روحها تتذكر كيف راكان اييها المستشفى... حزت مافجوا الشاش عن عيونها ... ام مياري اتصيح من الفرحة وتيهيل...
بومياري: دموع التماسيح!!! ههههههه مريم بس عيب نحن مب في بلادنا بيخافون خلق الله بيتحرونج اتزاعجين...
مياري تضحك ... قامت تحط يدها على عينها وتشوف نفسها ... ومستانسة وشاجة الحلج ...الدكتور يكلمهم بالانجليزي: لازم ترتاح كم من يوم وبعدين اذن لها تطلع من المستشفى...
ام مياري: غناتي .... انا بروح الشقة ... شو بغيتي اسويلج عشاء؟
مياري: فخاطري لقيمات...
ام مياري متعجبة: حسبي الله على شرج من وين اييب لج لقيمات ؟ بعده رمضان!!! يوم بنرد البلاد بنسوي لج اللي تبينه
بومياري: ههههههههه البنية هلعة ... سوي لها اي شي من الفرحة بتاكل اي شي..
مياري: صدقك يابويه ...
وراحت باسته على راسه وباست امها على راسها..ام امياري: لا تبوسيني على راسي بعدني شباب!!!
بومياري: اتصابوا العيايز!!!
مياري مستانسة وويها انوّر ... وتيلفونها ما سكت من الرن ... ووصلها مسج واتغير ويهها من منو...
من ابراهيم: سامحيني ... والحمدلله على السلامة يا غلاتي...
واهلها طلعوا عنها... واتصلت على طول به ... وهو يوم شاف رقمها ما صدق ماخلاه يرن...
ابراهيم: هلا بالغلا!!!
مياري: هلا
ابراهيم: حبيبتي سامحيني على...
مياري اتقاطعه: مسموح يالغالي ( وعيونها تدمع))
ابراهيم: فديت ربي اللي خلقج والله يخليج النا ... غناتي انا بحجز وبييكم...
مياري ودموعها تنزل: لا فديتك لاتي ولا شياته ... انا اللي بييك...
ابراهيم: غناتي لا تصيحين ... دموعج غالية ... اغلى من الدانة نفسها....
مياري: خالي فديتك ... والله... بغيت انك تستقبلني في المطار وبس.... ابغي اشوفك...
ابراهيم: انتي ماتطلبين الا تم بالحل !!!!
مياري: سامحني ببند عنك .... بسير اخذ دوايه ....
ابراهيم: ميااااااااااارووووووووووه اتحبيني؟
مياري بمصخرة: احبك حب محد درابه ههههههه
ابراهيم : اخاف الا دروبه!!!!
مياري : هههههههه
ابراهيم: يالله فحفظ الرحمن

بندت عنه وحست براحة نفسية فظيعة ... لانها وايد كانت اتحاتي خالها ... والحين وصل دور راكان ... اللي ما حتى طرش لها مسج ... واصلا ليش يطرش لي مسج؟ هو منو؟ ريلي؟ خطيبي؟ والله اني غبية ... يمكن عرّس !!! ...لازم ما اهتم بهالانسان .... اصلا استخارتي فمحلها... يعني لوسمعت كلام ربي ... وماوافقت فأول الطريج جان ما اتشرشحت جذيه !!! لكن الله كريم ...الله بيوفقني ان الله راد ... وسارت اتصلي .. وبعدين سارت تتسبح ... ويوم عجت ثيابها .... انذهلت من اللي تشوفه فجسمها ... انه جسمها كله ندب يعني باللمس ما ينحس ... بس شكلها يخوف... ويلست اتصيح وتتذكر الضرب بالعصا اللي ياها ... وتنتفض مكانها ...ونامت نومة لين الصبح وما اتعشت

وبعدما كملت فترة في المستشفى يوملها مسج من سارة:الحمد الله على سلامتج..حست لحظتها مياري انة سارة مغصوبة انها تكتب المسج وطوفت السالفة على خير..أذن لها الدكتور انها تروح..واتشرت هدايا للعنود و خالد و سارة و أم سارة و أبو سارة و لابوها و امها..ولهند و بوراكان و راكان و ام راكان و اللى يشتغلون وياها في الشغل..و ما خلت شي فخاطرها كله بطيب خاطر حتى لو كان شي بسيط بس اهم شي انها اتذكرتهم..وخالد كان يتكلم ويا فيصل..

فيصل: شو رايك يابونورة نسير البر يوم الخميس شوية نتسابق بالمواتر؟؟
خالد: ياريال انته ما اتوب ؟؟!!! اخر مرة مسوي حادث زين مارحت فيها!!!
فيصل: هههههه عادي يالله ياريال!!!
خالد: ماروم بنت عمي بترد من السفر...
فيصل اتغير ويهه وفخاطره: ياويل حالي !!!
وقال: منو؟؟؟ اي وحدة؟
خالد: مارية!! اللي يت هذيجي المرة المطار ويلست تسمعكم !!! سوّت العملية ونجحت...
فيصل فخاطره: فديتج يامارية !!! مارية اسمج؟؟... ياويل حال فيصل عليج يامارية!!!
فيصل باستهبال: اها ... ان شاء الله ترجع لكم بالسلامة ...
خالد: ان شاء الله ... انته ما اتعرف شو عانت هالبنية من مشاكل ... كله بسبب الجلب راكان!!!
فيصل عصب ويدافع عن ربيعه: لا تظلم الريال !!! تراه فسر لكم ليش مايا الملجة الظلم شين!!!
خالد: واتدافع عنه؟ اسكت ياخي ولا خلنا انغير الموضوع!!!
فيصل: انزين انته متى بتسير المطار؟
خالد: ها؟ ليش تسأل؟!!!
فهذيجي اللحظة فيصل يبا يدور على تفسير وحصل : لا ياخي .. انا اتخبرك عسب اذا بتسير العصر ويايه...
خالد قاطعه: فويصل تراهم بيون على الساعة 9 ... يعني لازم انام لي كم من ساعة ....
فيصل: اها زين زين... بس مرة ثانية نتسابق يالجبان ... اووه اووه!!! بونورة نتفاهم بعدين الوالدة متصلة!!!
خالد: الشيخة؟ سلم على شيختنا !!!
فيصل : ههههههه ان شاء الله يبلغ ...بند عن خالد ويكلم امه
فيصل: مرحبا ملايين ولا يسدن فذمتيه ... مرحبا!!! مرحبا بالشيوخ!!!
ام فيصل: يالله بالستر !!! وين نازلة الشمس؟
فيصل: هههه من اليمين واليسار ...
ام فيصل: فويصل شبلاك شاج الحلج؟
فيصل: امي لاتظهرين احين ياينج ابا اكلمج...
ام فيصل: بتتأخر ؟ انا بيلس اطالع الاخبار ما احب تفوتني...
فيصل: ياحبج حق الاخبار !!! اصبري عطيني عشر دقايق وياينج...
ويشخط ويلات ويسرع ما خلى رادار مامر عليه ... كانت سرعته فوق ال 200... ويوم وصل البيت ... باسها على راسها...
ام فيصل: فديتك والله
فيصل: امايا... احم احم انا ابا اعرس...
ام فيصل: واااايه فديتك !!! بنت منو ؟ ولا انا بختار لك محصلتلك شيخة عليها جمال الله يحفظها..
فيصل: امايا حاط فبالي وحدة...
ام فيصل ومعصبة: وييه حسبي الله عليك اتكلمها وتباها ... اتهبي ماتاخذها!!!
فيصل: هيّدي (شوي شوي) يامايا ما اكلمها ولا شياته ... انتي اتعرفيني مالي خص في الخرابيط ... بس هالبنية شفتها وعيبتني ويوم سألت عنها ... ما بحصل مثلها...
ام فيصل: ماخبرتني من قوم منو؟
فيصل: (------)
ام فيصل: انزين انا بسأل عنها وبرد عليك...
فيصل: اميه تراها بترد باجر من السفر
ام فيصل: وانته شدراك؟ وليش مستعيل؟
فيصل : يامايا ولد عمها ربيعي !!! وانتي كلمي ابويه ... وانا الصراحة متخبل على اخلاقها...
امفيصل اتطالعه من طرف عينها: على اخلاقها؟ يصير خير!!!
فيصل: اميه هب اتأخرين ... انتي شيخة !!! يعني واسطتج قوية!!!
ام فيصل: عيب ياولد!!!
فيصل: ههههههه.... ان شاء الله طويلة العمر ...
ام فيصل: هي !! غد ريال!!!
ورد لغرفته واتسبح وطاح على السرير ... يفكر ... عيل اسمج مارية.؟اسم غريب!!! لبنية بريئة وحلوة مثلج لكن الزين للزين .. ويسمع اغنية

وقرر انه يسير المطار وبدون مايدري خالد.. واليوم الثاني الساعة9 في المطار .. يتريونها ( ابراهيم وخالد والعنود وفيصل من بعيد )
العنود اتأشر وتصارخ: مياري !!! مياري!!!
مياري: حبيبتي!!
وتمشي مشيتها السريعة..
فيصل فخاطره: يا ويل حالي عليج يامارية ماغلاتج...
ابراهيم حضنها جدام خلق الله
فيصل فخاطره : منو هذا ؟ اللي تحضنه؟ انا وين شايفنه؟ الغيرة تنهش قلبي... اوووه ماغباني ... هذا خالها!!!
وسلموا على بعض ... وفيصل روّح من شافها وحس بالراحة ... ويوم توها بتركب الموتر تسمع صوت اتعرفه ...
------: مياري؟
ماصدت ورا بس احمر ويهها لانها مانست هالصوت؟؟

البارت 3

وثواني وصدت مياري صوب راكان: راكان؟؟
راكان: الحمدلله عالسلامة ..
بوراكان ومعصب : مامن بينكم كلام...
مياري: هيّد يا بويه اركب الموتر !!! وانا الحينه بيي...
وصدت صوب راكان واتشوف ويهه متغير وتعبان شكله....
مياري وتبتسم: الله يسلمك..
راكان فخاطره: فديت هالويه والصوت والابتسامة اللي ترد الروح..
راكان : حبيت اسلم عليج ... واطمن عليج يالغالية .. سامحيني عالازعاج ... فمان الله..

وعيونها تلحقه ... وفخاطرها تقول.. لا تروّح ... بس المشكلة انه هو روّح ... وركبت الموتر وهي نص حزينة ونص مستانسة فنفس الوقت ... يلست اتسولف ويالعنود... لين ماوصلوا البيت ... وحصلوا البشاكير واقفين برع
العنود: بسم الله الرحمن الرحيم شو بلاهم؟؟!!!
ام مياري تصارخ : واعثرتي!!! لا يكون بشكارتي شاردة؟؟
بومياري: هيّدي يا حرمة كلهم موجودين ,... هههههه يستقبلون الشيخة بنت الشيخ ...
خالد ومياري والعنود يضحكون عليهم وينزلون ... واتسلم عليهم وبشكارة مياري (جيني)
جيني: كيف هالج ماما؟
مياري: زينة ... شحالج جيني؟
جيني تهز راسها : همدلله !! ماما انتي في شوف؟؟
مياري: ههههه هي في شوف!!
جيني: ماما عيون مال انتي لون جير ...
فهذيجي اللحظة خالد يصارخ : سيييييييييييييييييييييييييييو طــــــــــــــــــاخ .... طاعوا الجذب!!! نقعت صاروخ من الجذب ... جيني ماما مالج سارت اتسوي operation مب اتغير لون عيونها هههههه هبلة!!!
ويتضاحكون عليها
مياري: حسبي الله على شرج يا جيني !!!
العنود : هب سهلة!!
خالد: مياري عقب ما ترتاحين محضر لج مفاجأة جيه على الساعة 12
مياري : شو؟ شو؟ دخيلك قول !!!
خالد: بوسي ايدي !!!
مياري: خسي!!! بوس ريلي!!!
خالد: صبري وببوس ريلج...
سار ياب قطوة فايده
مياري واقفة ورا العنود : اييييه ياع مادانيهن ... قوم عني امايا!!!
خالد: ههههههه بتبوسين ايدي ولا لاء؟
العنود: هههههه صدق انكم يهال ... خلودي بس عاد خلها!!!!
مياري: واسطتي احم احم قوية فديتها هي واللي فبطنها ...
وردوا داخل ...وسوالف وضحك في الميلس ابراهيم وخوات سارة الصغار ( 3 يهال سمية وحصة وسعيد ) وسعيد دومه فحضن مياري ... عمره 5 سنين ... ( سمية وحصة توائم عمارهم 9 سنين فرق بينهم دقايق ) والعنود وخالد ويرانهم البنات ... هن بنتين كانوا يايين يتحمدون لمياري بالسلامة .. هدى وبثينة.. وعلى الساعة 12 يرن تيلفون خالد...
خالد: برهوم تعال برع اباك بكلمة راس
وظهروا برع
ابراهيم : خير ؟
خالد: انا حاط شلق في دبة الموتر .. تعال بنشلهن وبناديهم ...
ابراهيم : يا سلام !!! يا خي انته خطير!!!
وساروا ويابوا الشلق والولاعة ونادوهم ...
خالد: عنود!!! عنود!!!
ابراهيم: مياري!!! مياري!!! هاتي البنات وياج برع!!
وابراهيم حاط عينه على بنت يرانه بثينة ( وهي مب وياه موول) .. وكان متخبل عليها من يوم هم يهال ... بس ماكانت في فرصة انه يفاتحها انه يبا ياخذها ... بس طبعا عقب اللي سواه فمياري ... كيف بترضى اني اخذها... وظهروا البنات والصغارية ...
مياري: الله شلق!!!
سعيد : صاروخ !!! بووف!!!
ابراهيم : يالله خلوا مياري تفتتح التنقيع ...
خالد: العنود تمي مكانج ولا تتحركين يلسي عالكرسي
العنود: ليش انا ابا بعد شمعنى هم؟
خالد : ماماتي انتي حامل ولا نسيتي؟
العنود : لا تخاف علية ما بييني شي ... وسيدة بركض ...
خالد: عنودوه ويهّد !!!! خلاص غناتي بيلس حذالج وبطالع حالي حالج ...
مياري : يا عيني ... اتغزلوا شوي ويا بعض لين ما اخلص
ويوم وصلت مياري فنص الحوي ولعت على كمية وكانوا البنات كلهم متيمعين وياها وشردوا ( طـــــــــاخ طـــــــاخ طـــــــاخ)
بثينة : امايا الحقي علية !!!
وحليلها بثينة يوم كانت تركض في من الصواريخ والشلق سارن فوق وتحت وفي منهن تفرقن يمين ويسار وواحد من الصواريخ اندس فتنورة بثينة وهي تصارخ .. كلهم منصدمين ويطالعون شو بلاها ... وابراهيم يركض صوبها ويمسك تنورتها وينفضها وهي تضربه بايدها على راسه
ابراهيم : يدج!!! خليني اخوّز الشلق!!!
والصغارية يتضاحكون وبثينة مب مخلتنه تضربه .. العنود من الزياغ سارت تيب نعال وكفختها على جسمها مرتين لين طاح االشلق والله ستر انه ما نقع ... ومياري تضحك : اييي بطني يعورني صدق انكم فيلم!!!
خالد: هههههه ( وبعد نزل راسه وسار داخل من الاحراج وحتى ابراهيم )
بثينة : عنود جيه شو اتحريني صرصور تضربيني بنعال ؟
العنود : احمدي ربج مانقع فتنورتج ... جان دوختي!!!
هدى : هاهاهاهاهاهاي ... بثون ...عشتي اختاه سويتي فيلم هندي ولا لاء سويتي رسوم متحركة..
سعيد ياي صوب بثينة : خالوه؟
بثينة : ها حبيبي؟
سعيد : بنقع شلق ... ملة ثانية ... نباه يندس فتنورتج ... ملة ثانية ... علشان علشان دوووف
بثينة : ردوني البيت !!! انتفخ راسي منكم !!
وردت البيت هي واختها ... وصلهم الدريول

شو بيستوي بين فيصل ومياري ؟ في المعهد؟؟؟

وعلى الساعة وحدة في الليل اتصلت مياري حق بثينة ..
بثينة : مرحبا ..
مياري: والله اسفة غناتي ... ماكان قصدنا نضحك عليج بس الموقف!!!
بثينة : حصل خير
مياري : اقولج انتي متى بتفكرين ببرهوم عدل؟ حرام عليج اللي تسوينه فيه ..
بثينة : بس!!! اباه يتعذب!!!
مياري: تراني بخبره .. حرام .. ولو بنية رسمت عليه .. او هو حب وحدة غيرج ؟
بثينة : الله لا يقوله!!! بس شويه احب اعذبه ... بس غلاته فقلبي ...
مياري : كيفكم اثنينتكم ما تبينون حق بعضكم اقول بس الله يستر منكم!!!
بثينة : بتشوفين اخر شي بيعترف ...
مياري: كيفكم .. انا ما بتدخل ... بس حبيت انصحج اتيّودي فيه بايدج وريلج لانج مابتحصلين مثله
بثينة : طاعوا منو يتكلم ولا كأنه اذاج فيوم من الايام !!!
مياري: انا نسيت كل شي!!
بثينة : جذابة ما نسيتي هب علية!!! وجسمج يبين بعد اثار الضرب..
مياري تصيح : بس!!!
وبندت التيلفون وهي متضايجة وانهارت مكانها ( واثار النفسية للحادث بعدها فيها ) وبثينة حست بالذنب من اللي قالته ... واتصلت على مياري وحصلت موبايلها مغلق .. وطرشت مسج لها: السموحة منج

(عند راكان)

راكان يكلم هنوده : هنود كلمت مياري
هند: يا قوات عينك !!! وين !!؟؟؟ ليش؟؟
راكان: ليش انا ماسويت شي غلط!!!!
هند: لا سويت وشي جايد بعد!!! انك كلمتها ... ترضى حد من الشباب يكلمني؟؟
راكان: لا ما ارضى عليج ... ولا ارضى عليها
هند: عيل؟ هي مب مختلفة عني ... نفس الشي .. الناي اييون من الباب
راكان سكت
هند: ياخوي انا اقولك هالكلام عسب ماتييب الكلام لها ... كفاية الفضيحة اللي استوت
راكان : انا اباها...
هند: خلاص انا بحاولوياها بس لاخر مرة ...
راكان: تسلمين فديتج ...
هند: بس توعدني ... اذا هي مارضت تنساها وانا بخطب لك الاحسن..
راكان فخاطره : مافي احسن منها...
راكان: ان شاء الله توافق...
وبعد اسبوع من وصولها كانت الساعة 4 الفير في مستشفى دبي وعند مياري حالة طوارىء... العنود بتربي قبل الاوان ..مياري وامها و ابو العنود ام العنود وحماتها وخالد متوتر...وبعدين دخلوا ام العنود داخل .. وبعد ساعتين ونص طلعت ام العنود : بنية!!! بنية!!! بالبركة عليك يابونورة ...
خالد واختفى عن ويهه التوتر والعصبية وردت الابتسامة على ويهه ... مانصّخ راح داخل ولقى العنود نايمة ... والبنية ودوها الحضانة ( الشيشة) وراحوا كلهم يطالعون البنية .. البنية صغيرة وايد وحلوة وتصيح وايد...
مياري وتصيح: ياويل حالي عليج محلاتج!!!
ام العنود: فديتها الله يخليها لهم
ام مياري: امين والله يحفظها
زمياري بتبات عند العنود والبنوتة .. ويوم وعت العنود ...
مياري: مرحبا !!! مرحبا!!! مرحبا!!!
العنود تبطل عيونها بكسل : وينه؟
مياري:خالد؟ مب موجود..
العنود: قصدي البيبي
مياري: حبيبتي يبتي بنوتة حلوة فديتها تشبهني...
العنود: بس انا قالولي يوم افحص ولد!!!
مياري: مغلطين حبيبتي
العنود: لا هم اللي مغلطين انا يايبة ولد..
مياري: حسبي الله على شرج !!! بنوتة حبيبتي ومحد مربي غيرج في المستشفى..
العنود: ييبولي ولدية!!!
مياري: عنودوه!!! شبلاج؟ تخبلتي؟
العنود تصيح: كان فخاطري اييب ولد عشان خالد!!!
مياري: شو هالينون ؟!!! خالد متخبل عالبنية .. جان ماتصدقين تعالي براويج شي!!!
لبست العنود وجايتها ومستندة على مياري تساعدها ... ويمشون شوي شوي ...
لقوا خالد واقف وشال بنته يكلمها ويلاعبها...
خالد يكلم ينته : الكتكوتة !!! الحلوة !! رمسيني غازليني!!! غاوية مثل امج...
ومياري اتطالع والعنود اتطالعهم وتبتسم وراحت صوبهم وخلتهم مياري وراحت الغرفة

وبهالمناسبة حبيت اهدي هالاغنية لخالد والعنود وبنتهم
http://www.farsuae.com/song/m7amad_a...amad_a7med.ram
وبعدين يت العنود ويابنتها ويا خالد بعد
خالد: ها مارية ؟ ماخبرتينا ؟ شو بتسمين بنتنا؟
مياري: انا؟. مالي خص هذي بنتكم!!!
العنود: وانتي امها بعد !!! شو بتسمينها عن الغلاسة!!!
مياري: ترا خالد ينادونه بونورة توكلوا وسموها نورة...
خالد: مب عسب جيه نحن نباج انتي تختارين الاسم...
مياري: مادري..شورايكم ف الغلا؟
العنود: رايج وهداية الله اسمها غاوي ... احم احم ام الغلا
خالد: شو الغلا ؟ مانعرف اندلعها ...
ابي غلاي كله ... قصدي غلا خالد بن ركاض ...
العنود: خلاص تم...
خالد: شو نسوي ...مع انه كنا نبا اسم بدوي .. لكن حكم قرقوش .. خلاص انا ساير بسجلها وبعدين بروح البيت..
وراح باس العنود على راسها
العنود: اتحمل على عمرك فديتك
خالد: ان شاء الله ام الغلا ...
ويوم روح سولفوا العنود ومياري..
العنود: اتصدقين احين مسؤولية زيادة علية وعليج
مياري: اكيد...
العنود:انتي اتعرفين عن شو اتكلم؟
مياري: عن الغلا...
العنود: صح بس في شي نسيناه اتحيدين اخر اتفاق اتفقناه
مياري: اوييه ويالفرقة ... نسيناه باجر التصوير ...
العنود: باجر انتي سيري واخرجي الشغل كله ... انا الصراحة ماروم ... يمكن خلاص استقيل من الشغل تعبت!!!
مياري: عنودوه؟؟ مب علية !!! انا ما اعرف اخرج عمل...
العنود: ميرووه ... شو هالكلام ؟ جذابة اتعرفين واحلى عني بعد لكن الحينه نحنا فورطة وانتي لازم تظهرينا منها ... بيكون اول عمل واخر عمل ..
مياري: يا ربي سترك ... بس انا باجر بسير اسجل فمعهد ابا ادرس انجليزي شو الحل؟
العنود: اجلي السيرة للمعهد لليوم الثاني ...وباجر تطلعين الساعة - خذي موتري وهالله هاللهبالطريج وين بتصورين؟
مياري: افففف مادري يبالها تفكير ... يمكن اصور في البداير
العنود: فكري .. انا الصراحة ماروم افكر بأي شي غير بالغلا وابوها..
نامت العنود ... وراحت مياري بتفكيرها بعيد اتفكر بقصة للفيديو كليب..
والصبح الساعة 5:30 قامت غلا من النوم تصيح ... وشلتها مياري تسكتها ... وراحت تتسبح .. وطلعت من حمام المستشفى وتلقى غلا فحضن امها وتلعب وياها...
مياري: صباح الخير ام الغلا...
العنود: صباح النور ام حمد
مياري: وين سويج الموتر؟
العنود: هذووه ... افطري .. اول وبعدين سيري .. صبري بعطيج رقم الريال عسب تتصلي به..
مياري: عطيني ... بس اسفة .. ما اتنزل اتصل حق ريال .. خله هو يتصل
العنود: وين مخج ميروه مايعرف رقمج؟ خلاص انا بدق له وبخليه يدق لج
مياري: ايوا جيه احسن ... هم من وين؟
العنود: ظبيانية .. وكم من واحد من اليويلة مال اغنية عيضة اللي صورتها في المطار...
مياري : ربي سترك.. الصراحة لازم اكون قوية لانه وايد شباب..
وطلعت مياري من عندها وتتصل حق ام سارة ...
مياري: الو؟ صباح الخير خالوه ؟ شحالج؟
ام سارة: صباح النور واااااااااااااايه فديتج ... يسرج الحال غناتي ...
مياري:خالوه جهزي الصغارية بوّديهم ويايه
ام سارة: وين بتوديهم؟ شياطين بيأذونج
مياري: بوديهم البر بصور فيديو كليب باخذهم وبخلي سعيد ايوول
ام سارة: واايه ... سعيد؟ اسميه بيوول خلاص تعالي وخذيهم ..
ومرت وخذتهم....
ام سارة: هالله هالله بالطريج لا تسرعين اتحملي على عمرج
مياري: اكيد خالوه ويايه امانة
وفي الطريج حاطتلهم اغاني وسعيد يرزف والبنتين ينعشن ويغنن ومياري تضحك عليهم
ووصلت الشركة وماتزلت الموتر ... دقت على عنود
العنود: هلا ميرووه
مياري: اشوف المواتر والشباب برع وينه صاحب الفرقة؟
العنود : بيتأخر شوية عليكم ... انتي خذي الستاف كله واليويلة وسيري الموقع وهو بيدق لج
مياري: جيه بعد يتأخر ... وليش هو ولد منوه عسب يتأخر ... اذا اتأخر بوقف الشغل كله
العنود : ههههههه شبلاج مستحمقة؟. والله بييي واسمه فيصل بعد
مياري: من حلات ويهه
العنود: جيه شفتيه انتي؟
مياري: لا ولا ابي اشوف رقعة ويهه .. اللي يوعد انه بيي في الموقت المحدد ايي بس مب جيه ايأخرنا
العنود: خلاص استحملي جذيه الشغل
مياري: امحق شغل... انا ببند بسير اكلمهم انهم يلحقوني وبوديهم يالله فداعة الله
العنود : الله يحفظج
نزلت من الموتر وهي كاشخة... واليويلة يطالعون منو نازل من الموتر ... ونزلت الصغارية وياها...وسارت صوبهم..
رمست الستاف لانهم كلهم يعرفونها ... وبعد ما خلصت منهم سارت صوب اليويلة ... وكانوا يتريونها..
مياري: السلام عليكم
سعيد ما نصخ سيدة رد عليها: وعليكم السلام
وكل الشباب ردوا السلام
مياري: اخوي انا مارية وانا بقبض الشغل ونحن بنسير الموقع الحينه ... وما عرفت اسمك الشيخ؟
سعيد: الشيخة اسمي سعيد بن راشد
مياري: عاشت الاسامي انا الحينة بطلع بموتري ...محمد
وايي واحد من الستاف مصري يركض
محمد: ايوه حضرتك؟
مياري: محمد خذ رقم الشيخ سعيد وانا اي شي اباه راح اقوله لك واتقوله لسعيد
سعيد : وليش اتكبرين السالفة؟. خذي انتي الرقم ودقي
مياري: هذا هب من طبعي الشيخ والسمووحة ... المهم نحن بنسير البداير هناك بنصور جان بتخبر الشيخ اللي ما يا ..
وقفط ويه سعيد... ومياري نزلت راسها وركبت الموتر
سعيد:ان شاء الله
وكبرت وايد فعينه بسبب هالشي....

البارت 4

فيصل: يعني مابتغير رايك؟ وبتي ويايه؟
راكان: شو تباني اسوي هناك؟ يوم انه قلبي مب وياكم؟
فيصل: ياخي بنتمصخر على الشعشبونةاليديدة..
راكان: ماروم .. بروّح البيت ارتاح..حاس راسي بينفجر علية ..واذا حصلت وقت بييكم وين بتكونون؟
فيصل: في البداير .. يعلك بالعافية
راكان: تسلم .. يالله هذوه الموتر .. بالله عليك حد يودر البورش كايين وياخذ الرينج؟
http://up3.w6w.net/upload/03-01-2006...45026a5e0e.jpg
فيصل: فخاطري عاد .. وخاطر الشيخ فيصل اوامر ههههههه
راكان: ههههه يا شيخ انته!!!
فيصل يطالع الموتر: ياويل حالي عالعروس .. فديتج انا!! هههههه
راكان: حشا بنية هب موتر هه شو رايك تتصور حذال الموتر؟
فيصل: الايام ياية وبتقول الشيخ فيصل سلفني موترك
راكان: بخبرك انته وايد مغتر بالشيوخية ... طويل العمر روّح لا يتصلون بك ويهزبونك .. يقولون لك شعشبونة وقف شعر راسها..
فيصل: هههههههههه يوم وقف شعر راسها علقوها من كشتها عالمروحة
راكان: هاهاهاي حلوة!!! حلوة!! بس لا تعيدها!!!
وكملوا ساعة .. وطول الوقت ومياري فخاطرها: يعلك العوق ويينك..عوذ بالله مايسوا علينا !! بتريا ربع ساعة ان مايا والله لاراويه شغل الله...
وسعيد يدري انه مياري معصبة لانه ويهها احمر استنتج هالشي..سار صوبها ويا ربيعه محمد ... هي شافتهم يايين وتعطيهم ابتسامة وتنزل راسها .. واليهال سيده ساروا صوب سعيد ومحمد..
سعيد: السلام عليج الشيخة
مياري: عليكم السلام
سعيد: السموحة منج عاد اخويه دومه يتأخر بس سامحيه
مياري: الشيخ هذا شغل يعني اخوك مايدري انه كلنا ورانا شغل.. ونتريا الشيخ لين ما ايي ونعطل اشغالنا بسببه؟.
محمد: امسحيها فويهنا..اتريي شوية وبيي..
مياري: الشيخ.. انا بتريا لكن ازيد عن ربع ساعة .. بدق له واللي يصير يصير..يعني الشمس حارة ..ويهال ويايه قلت بخليهم يشاركون .. ومن غير الستاف وانتوا الشمس حارقتنكم..
محمد يصاصر سعيد: اسميها حرمة!!!
سعيد يصاصر محمد: جاب بعدين نتفاهم!!!
واتريوا ربع ساعة وخلاص حست مياري عمرها مول تعبانة ... وتوها بتتصل حق العنود عسب تعطيها رقم الريال .. انه يصيح تيلفونها وبالغلط دقت نعم
مياري: بسم الله الرحمن الرحيم!!!
فيصل انصدم وقال بعفوية: جيه شفتي سكن؟......>يعني جن
مياري انصدمت: منوه؟
فيصل: وياج الشيخ فيصل طويلة العمر..
مياري: الشيخ؟ اها زين والله اخوي تراك عطلت شغلنا .. وانا الصراحة ماروم اتريا ورانا اشغال وانته معطلنا
فيصل: هههههههههههه لهالدرجة؟
مياري فخاطرها: يابرودة اعصابك!!!
مياري: شوف اخوي ان ماييت بلغي كل شي!!!
فيصل: ههههههه والمحاكم؟
مياري: نحن مانبا محاكم !!! لكن انته زودتها!!!
وبندت فويهه التيلفون
فيصل: واللعنة!!!
الموتر توة مظهرنه من الوكالة .. وانه يسرع وهذا غلط وسوّى حق سعيد ... وفجأة مياري تظهر من الموتر وتبند الباب بقوة وهي معصبة وكلهم يطالعونها..
سعيد: ها فيصل؟
فيصل: الله يغربلها الشعشبونة من اوصل لاراويها شغل الله
سعيد: انته غلطان ... ليش تتأخر مالك عذر...
فيصل: اسكت ياريال ... انتوا فأي بقعة؟
سعيد: وصلت عند الدراجات؟
فيصل: الحين واصل
سعيد: عيل انا ياينك..
وطلع سعيد بموتره وخذ وياه اليهال.. وعرفت مياري .. انه الشيخ وصل .. وركبت موترها عن الحر هي .. وسعيد شاف موتر فيصل .. ونزل من موتره هو واليهال...
سعيد: اوووف يا خطير بل!!! عليك!!!
فيصل: هاهاهاهاي!!! اووه عيال منو هذيلا؟
سعيد: عيال خالة المخرجة ... عاشوا الشيوخ كلهم !!!
سعيد الصغير : يا ويلك من مياري بتضربك بووكس
واخته تسحبه: جاب!!!
فيصل: هههههههه بوكس؟ا يالله خلنا نسير اركبوا ويايه وخلوا سعيد يرد روحه
سعيد: خلني امتع عيوني بالعروس يعلني افداها!!!
فيصل: ههههههههههه انا خاطبنها قبلك!!!
واتحركوا بمواترهم والستاف والنعيشات والشباب كلهم صدوا ويطالعون الموتر الخطير ... وفيصل يضرب هرنات ... اونه يبا استقبال..
الشباب: اوووب!!! اوووب!!! اوووب!!!!
مياري فموترها واتطالع الموتر ومبطلة حلجها ( طبعا موتر العنود مخفي): ول!!! ول!!!! ول!!!
ووقف موتره ع ظهر موتر مياري ... ومياري عصبت لانها حركة مب حلوة بالمرة .. مع انها ماشافته عدلت عمرها ونزلت من موترها بدون ما تصد ورا .. وسارت صوب الستاف وكلمت محمد يجهز الكاميرات .. وتنرفز فيصل لانها ما يت صوبه .. سار صوبها والشباب اتيمعوا عند موتر فيصل ويا سعيد وهي تعطي التفاصيل وفجأة فيصل عند ظهرها
فيصل: السلام عليكم
مياري قفطت وحست شعر جسمها واقف لانه حد واقف جريب ظهرها: وعليكم السلام!!! محمد سير جهز الات التصوير ... لين اخلص وياه!!!
وفيصل رفع حواجبه لانها ما صدت صوبه وكلمة وياه ( وياه!!! جيه اشو تتحريني!!!) وقال: اااي انتي!!! انا مب وياه!!! انا الشيخ فيصل!!!عيبج ولا مب عايبنج مايهمني!!!
ومحمد قفط وسار بعيد يجهز الالات ومياري قفطت واحمر ويهها وصدت صوبه
مياري: ليش اتحرى عمرك منو؟ الشيوخية مب كلام فعل يا طويل العمر!!!!
فيصل ومنصدم: مارية؟؟؟
احمر ويهه وقلبه يدق بطريقة مب طبيعية...
مياري بعفوية: ها؟ من وين تعرفني؟
فيصل يطالعها ومب مصدق وفخاطره: ماريه؟ ياويل حالي عليج ...يعلني افداج .. كنت اتمنى اي لحظة اتحسين فية وسبحان الله ... الله يابج لين عندي!!!
مياري فخاطرها: احين هذا اللي اتضاربت وياه في التيلفون!!! اسميه شيوخي ابا عن جد !! عليه خشم سليل وعيون يا ويلي على العيون ... وجسم رياضي .. بس اللسان مخرب عليه!!!
وسعيد ربيع فيصل شافهم من بعيد يتكلمون وضحك ضحكة عالية الكل سمعها: هاهاهااااااااااااي!!!!!
كلهم خافوا والشباب بعد: شبلاك ياريال ينيت!!!
ومياري وفيصل صدوا فجأة على ضحكته .. وفيصل رفع حواجبه وعطى سعيد نظرة اتقول: شو مشكلتك؟؟
سعيد بصوت عالي: السموحة !!! السموحة!!!
سعيد فخاطره: التقوا وفكونا من الصدعة هههه ما يسوا عليهم!!!
مياري ضحكت على طريقة فيصل لانه ويهه كان يضحك .. وهو يشوفها ويقول فخاطره: ياويلي عالعيون والابتسامة ... يعلني افداج انتي واهلج وجبيلتج كلها...
فيصل يطالعها وفخاطره ما يبا يخليها بس لازم يثقل .. اعتدل فوقفته ويكلمها: مارية ممكن نبدا التصوير؟
مياري ونست عصبيتها: ان شاء الله خمس دقايق .. ولو سمحت ترمس اليويلة يتفضلون على هذي البقعة !!!
فيصل طالع عيونها وابتسم ونزل راسه: فالج طيب..

مياري فخاطرها : ههههه شو سالفته كان ياي بشراع وميداف .. الحينه عيونه وايد تتكلم .. لا يكون معجب؟ بس فية؟ انا؟ ليش؟ من حلاتي؟؟!!! لازم اخلص شغلي وبعدين افكر بهالشي !!! عوذ بالله لازم مااكون مثل سارة!!!
وكملت شغلها وتعبت وياهم لانه الشمس حارة .. ووصل الباص ومياري اول ما وصل الباص وقفت تصوير لانها كانت الساعة 4 العصر وكانوا يواعة ومحد قدر يرمس غير الصغارية .. لانه مياري كانت شديدة وعصبية وياهم لانها تبغي الشغل يكون التمام التماموفيصل كان كل ماتسنح له الفرصة يتريا نظرة منها او استجابة عل وعسى ترد عليه... بس هي ماخلت له فرصة لانها حاشمة عمرها من الكلام ...وراحت صوب الباص.. امها ماقصرت طرشت لهم الغدا ونادت محمد والستاف يفازعونها .. حتى الحصير فرشته .. والشباب يقولون حق بعض: اوووب برزة!!!
فيصل يكلم الشباب: احشموا عماركم
وراحت مياري هي والبنات وفرشوا الحصير عند الباص للشباب وفرشوا الحصير الثاني حذال موتر مياري عسب مايبين.. وغرفت للشباب والستاف الغدا .. وودوا الباجي للبنات...
فيصل يكلم سعيد: وحليلها حسّرت عن ايدها .. وفزعت صدق انها حرمة!!!
سعيد: هي والله يا حظك!!!
مياري سايرة صوبهم : اقربوا وسامحونا...
سعيد: الا ما قصرتي
مياري: لا والله الموجود ( ونزلت راسها وراحت صوب البنات)
فيصل ينادي سعيد الصغير : احم احم!!!
مياري سمعت تحنحينة فيصل بس ما ردت
فيصل: سعيد !!! تعال هني !!! احيد ريال تعال اتغدى ويا الرياييل!!
فهذيجي اللحظة صدت مياري وخلت سعيد يسير صوبهم وهي تضحك وهو يضحك
سعيد : انا اصلا ليّال
والبنات الصغار: ونحان بنسير وياه !! نحن رياييل!!!
فيصل ضحك هالمرة بصوت عالي هو والشباب
مياري: اها!!!انتوا حريم انف عليكن تعالوا ويايه!!!
وروحوا وياها وخلصوا الغدا وشكلهم ثقلوا في الاكل
واحد من الشباب اسمه حمدان: تسلم ايد اللي طبخت الغدا
مياري وكانت مخلصة الغدا وسمعته وسارت صوبهم: واذا قلت لك الطباخ مسوي الغدا؟؟
وقفط الريال وضحكوا الشباب عليه
مياري : ههههههههه اتمصخر وياك لا الوالدة اللي طابخة!!!
حمدان ويتدارك الموضوع: اشوا !!! ها شو قلت لكم؟؟؟ الله يخلي الوالدة
مياري : امين ... ممكن نروح البيت لانه الصراحة باجر بنكمل شغلنا ... وبيكون اخر يوم ... شدوا حيلكم
فيصل فخاطره: ياربي يعني ما بشوفج لين باجر؟
فيصل: خلاص الشيخة باجر بنتلاقى بس على الساعة كم؟
مياري: على الساعة 8 الصبح ممكن ما نتأخر ؟ لانهم كلهم ما قصروا يفازعون ويايين من الفجر الا!!!
سعيد قاطعها: مايصير خاطرج الاطيب....