|
راعي العجراء ومقناص الارنب والسلقه السلام عليكم ورحمة الله وبركاته اليكم هذه السالفه القديمه عام 1397 هــ تقريبا في مقناص الارانب بالسلقه وهذه السالفه ادري انها سويليفه وماكل بيضا شحمه بس الجود من الماجود ماودنا نقطع عنكم تحملونا في يوم من الايام طلعنا نقنص ارنب في الليل و سلاحنا شوزن ام خمس من نوع سلقه عزكم الله يعني مايحتاج لها فشق وكان علينا برد ركبنا بالددتسن وقمنا نعس الشغايا لعل تنفج قدامنا ارنب نهد علاها الشوزن السلقه انا كنت راكب بالصندوق ومعي السلقه واثنين من اخوياي واحد يسوق واحد راكب على الباب والصندوق فيه عفش جوالين ماء وبانزين واغراض الرحله ومسوي مكان زين بالصندوق يشيلني انا والسلقه ولكن الجو بارد وعلي فروه ومتلطم بشماغ ماتشوف الا عيوني السلقه حست بالرد دورت لها مكان زين وربضت وحطت راسه حدر بطنه ونومه (شخري) وخذ من الحلوم والهواجيس الظاهر فتحت له مشاريع وقفلت مشاريع حست بالدفى اشوي يوم نفجت الارنب قدامنا وانا اشيل السلقه وهي على نومتها وعلى سفطة رجليها وايديها وراسها اللي تحت بطنها وانا من العجله قبل ماتزبن الارنب الضلع وانا احلت السلقه من الصندوق وهي على نومتها مايمديها تفتح تتوسى للطيحه الا الارض اقرب وهي تطيح على قعوه يعني على العصعص والارض وعر وهي تصاوي متدري ويش اللي جاه عقب الدفى كسر عصعص وهي تخالفنا ناكسه وحنا خلف الارنب يح مايح ولاماعندنا احد راحت تركض من الوجع على غير يمه وعلى غير فكر والظاهر انا الى الحين وهي تركض وتزبن الارنب الضلع ونرجع ندور على سلقتنا ولا نلقاه وخذ من هالدوران والتصويت وما عندنا احد يمكن تكون تحت قشعه ولاشفتنا استدارت عنا ماعاد تبينا واحس انها تقول وحلالاه يالفكس والا ابو فاس تبي تتدهن محل الطيحه وحنا ندور ندور عليها نغني ونقول طيري غدا والسلوقي تعور انتهت السالفه والله يحفظ الجميع وقبل الختام سبحانك اللهم وبحمدك لااله الاانت استغفرك واتوب اليك تحيات اخيكم راعي العجراء منتدى مكشات |
| الساعة الآن 01:53 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir