منتدى استراحات زايد - عطني رأيك في مثل هذا النوع من الصيد !!!

-

-

-

-

اود أن اسوق لكم قصة حصلت لصديق لي قبل ايام قليلة ...
تلقيت مكالمة من صديق عزيز علي في احدى محافظات منطقة تبوك وهي التى اجبرتني على طرح هذا الموضوع حيث انه هذا الصديق هو وصيادين المحافظة متبعين سياسة الصيد على قدر الحاجة وكان يوجد لديهم اجوال من طيور القطا التي تعيش في المنطقة القريبة (مستوطن )منهم في المزارع وهي من يفرح صدورهم بمشاهدتها وصيدها بكميات بسيطة فالذي يزيد صيده عن 10 طيور يعتبر مسرف لكي لاتنقرض هذة الطيور الجميلة من المحافظة وتبقى لهم متعة مستمرة وعلى الرغم من كثرة الصيادين من المحافظة الا إن الله ( طارح البركة في الاجوال ) تنقص وتزيد بعد فترة ويغذيها جول كبير تعداده فوق ال200 وقد رأيته انا شخصياً كان منظره يبهج الخاطر ويشرح الصدر واصواته تملاء السماء .. يقول صاحبي قبل ايام قليلة جداً حصلت الكارثة التي لم اتوقعها ولم يتوقعها صيادين المحافظة ..لقد انقرضت هذة الطيور ؟؟ سألته كيف قال بكل أسف :
خلال يومين حصلت ابادة جماعية لهذة الطيور ....:(
حيث خرجنا كالمعتاد وبعض اصدقائنا لصيد القطا( نبي كسبة قطا للعشاء بس ) وجينا للاماكن الي بالعادة نلقاه على طول فيها مالقيناه !! رحنا موارد الماء مالقينا لفينا المزارع والمشاريع مافيه أمل وآخر شئ عرفنا وينه .. يقول صاحبي وحنا ندور في المزارع شفنا سيارتين من نوع هايلكس واقفات قلت خلونا نمر عليها يمكن نلقا علم عندها ولما وصلنا لقينا هم قنوص من منطقة تبعد مئات الكليومترات عنا وعرفنا وين بالتحديد من لهجتهم المعروفة ( لن اذكرهم من اين والي يعرفهم بكيفه;) ) سألناهم عن القطا قالوا ايه شفناه كان فيه امس وطرحنا منه 200 قطاة وفتح الثلاجة الي جنبه يقول خويي طالعت بالثلاجة والا يادوب تسكر من القطا قلت له وانا ابي اطق من القهر بس هذا قال باقي ثلاجتين غيرها ... يقول مدري وش اقول له قلت اليوم صدتوا شئ قال لقينا جول واحد حوالي العشر وصدناهن وغيرها ماشفنا ... يقول خويي معانا رجال كبير بالسن ودايم يستانس إذا طلع معنا للقطا ماقدر يتحمل الموقف وقال بالحرف الواحد لهم ( وانت يوم تصيد 200 قطاة انت ذابحك الجوع عساك ماتذوق العافية من لحمهن ؟؟؟) يقول تغيرت وجييهم بسرعة ومااحد رد .... الشايب انطلق عليهم : قضيتوا على صيد ديرتكم وجايين عندنا ؟؟ لوا نكم صايدين كفايتكم اليوم وبكرة وبعده مازعل منكم احد لكن 200 بيوم واحد الله لايوفقكم ولايجعلها خضراء بوجيهكم .. يقول صديقي صراحة السالفة جت تخرب أكثر الي معي بالرحلة شباب انفعلوا مع الشايب زيادة على القهر إلى فيهم ونزلوا السلاح من السيارات وصار فيها تهديد ومنظر ماودك تشوفه لكن الحمد لله فكنا الله من شرهم ومشوا الشباب وراهم وتبعوهم حتى اخرجوهم من المحافظة واتجهوا للطريق المؤدي إلى منطقتهم .. يقول صاحبي نرجي من الله العوض ....لي 4 ايام ادور ماشفت الا 5 قطوات هن الي سلمن منهم ومريت على مكان صيدهم لقيت فوارغ الذخيرة كأنهم حرب مفرغين صندوق كامل ولقيت 17 قطاة ميتة من الصواب ولا لقوهن ......
والله بعدها كرهت البر والصيد وادور الي ينسني اسم القطا لايمر علي ولاا اقول الا حسبي الله ونعم الوكيل فيهم ..

يااخوان ماذكرت هالقصة الا ابي رأيكم بالي صار وش تسووون لو انتم مكان خوينا ... هل اقتنع البعض إن الصيد الجائر والزايد عن المعقول مكروه في كل مكان وزمان .. اتمنى إن تشاركونا بأرائكم .. تحيتي للجميع