منتدى استراحات زايد - أطول قائمة خرابات .. مساعدة في باترول سفاري 95

السلام عليكم ورحمة الله وبركاته
معاي قطعة خرابات في سفاري 95 باب واحد .. وأبي منكم مساعدتي على معرفة نوع الخراب .. ومشكور مقدماً

1- عداد ضغط الزيت بالطبلون لا يعمل .
ملاحظة : صوت البلوف عالي وسويت وزن بلوف وأحس إن الصوت خف بنسبة بسيطة لكن بدون فرق واضح .. والموتر الحمد لله مافيه دخنه أو صرفيه .
- هل الخراب في طرمبة الزيت أم ماذا ؟

2- عندي تهريب ماء بالجهة اليسار من المكينة .
ملاحظة : الحرارة لا تتعدى الربع .. والراديتر أزود الماء عليه بمقدار لتر كل 4 أيام ومشاويري قريبه مارحت بعيد عليه .
- هل الخراب في طرمبة الماء وألا وجيه وألا الرآس .. أتمنى الإفاده ؟

3- عند النزول تحت الموتر يلاحظ تهريب زيت من القير بالجهة الأمامية والخلفية .
ملاحظة : شيكت على زيت القير عند بنشري وقال الزيت مضبوط !!!!!
- تصليح التهريب هل هو محتاج وجيه مثلاً وألا تطلع لي شغلات ثانية بعد ما أفكه .

4- القير ممتاز في التعشيق وأحياناً لا .. وعندي شك في الكلتش .
ملاحظة : أحياناً عند التعشيق يقر الثالث وأحياناً الثاني .. والكلتش أحسه ثقيل .. وعند الضغط على الكلتش يصفي صوت القير وإذا ما كنت ضاغط على الكلتش يرتفع الصوت من ناحية القير .. وأحياناً تجي طقه خفيفه عند التعشيق .
- وش الحل يا أخوان هل أغير فحمات الكلتش وألا أصلح الكلتش كامل .

5- عندي صوت قوي بالممشى العالي .
ملاحظة : عند الممشى من 120 يرتفع الصوت لغاية 180 يكون عالي وعندما أخفف يروح .. الصوت جاي من جهة الخلف .. وأستبعد أن يكون الصوت في الكارونه لأنه الكارونه تجي صوت حنه ومعروف صوتها ومميز .
- سويت تربيط للموتر / تشحيم الموتر / تغيير عمود الوسط لأنه كان تالف .
حاول البنشري التشييك على زيت الدفرنس لكن ما انفكت الصره .. وش ممكن يكون منه الصوت ؟ هل من عمود الدفرنس وألا عمود الدبل وألا الدفرنس مافيه زيت وألا الجنوط الخلفية وألا الكفرات ؟؟؟
الظاهر إني مركب شلة سكنيه في المرتبة الخلفية :D:D:D:D:f

وش الحل يا أخوان من واقع تجربة .. وتحملوني على طول قائمة الأسئلة
واللي يقدر يساعدني في بعض/كل النقاط الله يجزاه كل خير
ومشكورين مقدماً
وعيدكم مبارك .. وكل عام وأنتم بألف خير