|
ياليت نتكلم يا مكشاتيه في واجبات المتنزه و واجبات صاحب البوت سلام الله عليكم يامكشاتيه وكل عاااااااااااام وانتم بخير حبيت اتناقش معاكم بموضوع الطلعات بصراحه مادري اش اقول للاسف بعض الناس تبغى سمك و بس الواحد صنفت معاه قال بطلع بحر و اخذ قروبه و راح استاجر بوت او اطلع في البوت حقه لاكن الجو سيئ او البحر مد ومافي صيد ماهمه المهم انه يطلع قبل فتره اتصلو عليه شباب و قالو بيطلعو بحر جلب وكان الجو سيى من قوة الرياح و اعتذرت منهم على انه البحر ما يصلح و تصاريح مافي وهو في الحقيقه تصاريح فيه شرط تكتب تعهد بتحمل المسؤليه واصلا الجو مو جو صيد و طلعه و رجعو اتصلو بشخص عنده بوت و طلعو معاه رغم ان الجو سيئ و مافي صيد طبعا ما يقدر السواق يوديهم محلات الصيد يعني ما عنده الا اقرب مدرى عن اي كساره مو هذا المهم و المهم سلامة الركاب لا اشباب يخافو على انفسهم ولا السواق يخاف على الركاب الركاب همهم السمك و مالقيوه في الطلعه اللي جوها سيئ و السواق لقي اجرة طلعته يعني انت يا متنزه خسران و غلطان وايضا قبل فتره اتصلو عليه شباب بيطلعو جلب و كان حديث الاتصال على النحو التالي ابواسامه >>>نعم معاك ابواسامه المتصل :- نبغى نطلع طلعة جلب كم المده ابواسامه >> 12 ساعه المتصل :- ما بنكمل 12 ساعه كلها ثلاث ثلاجات نعبيها سمك بسرعه و نرجع ابواسامه >> تعبيها من فين ياخويه انا في صروم مو في البنقله كيف تعبي الثلاجات بسرعه و ترجع المتصل :- يا ابواسامه اقصد تودينا مجلب نعبي منه ثلاجه بياض وبعدين نروح مجلب نعبي منه ثلاجه شعور وبعدين نجلب شوية تيمس حي و نجلب هوامير و نعبي الثلاجه الثالثه و نروح ابواسامه >>> يابن الحلال طلبك في البنقله مو عندي لو طلبك موجود في البحر بسهوله ذي ما كان احد اجر المتصل :- قول انك يا ابو اسامه ما تبغى تطلعنا و خلاص ابواسامه >>> ايوه ما ابغى اطلعكم حفاظا على الثروه السمكيه وحفاظا على ضغطي لا يرتفع منكم قال ثلاجه هوامير و ثلاجتين مدري ايش الله يخلي التونه ابو مدخنه تبغو تونه ابو مدخنه عندي غير كذا ماعندي شي يابو الشباب البحر ارزاق مو بطريقه اللي تفكر فيها عندك امكان محدده تعرفها اوديك فيها المتصل :- بس يا ابو اسامه في كثير ناس يروحو ويعبو ثلاجاتهم بسرعه ذي و على مزاجهم ابواسامه >>> بس ماقد مر عليه كذا وبصراحه ما بطلعكم بشروط ذي المتصل :- طيب اديني جوال اي سواق بنطلع معاه ابواسامه >>> ابشر ... واديه رقم جوال واحد من السواقين واقل المتصل لو نفذ شروطك حساب الطلعه بعد ما ترجعو عليه المهم رجع المتنزه اتصل و قلي ان السواق وافق يعبي الثلاجات الثلاث بصراحه انا زعلت ورجعت اتصل على السواق وكان الحديث على النحو التالي ابواسامه >>> كيف بالله توافق على طلبهم وانت عارف انك ما تقدر توفي لهم السواق :- اش عليه فيهم يا ابو اسامه انا بوديهم محل واقلهم هذا محل بياض صادو صادو ما صادو بكيفهم انا عليه باجرتي اما صيدهم مو مهمتي واتصلت على المتنزه اليوم الثاني وقلت له هاه ليش ما اتصلت الظاهر الثلاجات تعبت عشان كذا استغنيت اني ادفع اجرة السواق المتنزه +++ لا موحكايه كذا هوا ودانا محل البياض بس مافي صيد ابواسامه >>> طيب كيف عرفت انه محل البياض المتنزه :- صاحب البوت قال كذا انتها الحديث مادري يا اخوان ليه المتنزه ما يثقف نفسه و يعرف متى يطلع البحر في الوقت المناسب و اش يشيل معاه الشي المناسب لايكون ساذج من جا يضحك عليه لا ينغر بصور و القصص اللي يسمعها بطلعات البحر اليوم التكنلوجيا وفرت لك كل شي لدرجه انك تقدر تطلع في الوقت المناسب و تروح المحل اللي تحدده انته من غير ما يضحك عليك سواق و غيره والسواق الواجب والامانه تحتم عليه انه يوعي المتنزهين بحالة البحر عشان ياخذ اجرته حلال مو يكون عارف ان البحر سيئ و هايج ومو وقت صيد يضحك عليهم و يقلهم البحر طيب واتمنا من الاخوه المكشاتيه سوأ سواقين او متنزهين انهم يثقفو و يوعو اخوانهم مو يستغفلوهم والسلالالالالالالالام اخوكم ابواسامه |
| الساعة الآن 09:19 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir