عجيبة حال هالدنيا سفر،فرحة ،حزن وآمال
توردنا السراب وتلتهي عنا وتلهينا

وعمرٍ شمعةٍ ذابت وجسمٍ هده الترحال
محطة في محطة والسفر للموت يدنينا

افكر بالسنين الماضية وانا كل عام لي موال
احط من الورق صفحات وانهيها وتنهينا

ياكثر الي فقدناهم ولاباقي سوا الاطلال
بقايا ذكريات ودمعةٍ هلت عليهم من مئاقينا

تنسينا الليالي والهموم وزحمة الاشغال
مثل فعل الهوا بالرمل في مسحه خطاوينا

تصاريف الدهر تجبرنعزي في ابن عم وخال
نعزي في فقيدٍ قبلها جانا يعزينا

غرابيل تغربلنا سوات الحب في الغربال
تنقي دومها الطيب ومن شوفه يسلينا

عوايدها تنقيهم وتترك بعدهم انذال
على جور الزمن صارو سبايب في مأسينا

خواطر ساقها قلبٍ عليه من الهموم جبال
على حمرة مغيب الشمس وغيومٍ تبارينا

لي الي لا نصيته في مصابي والحمول ثقال
يفرج كربتٍ طالت وعن خلقه يواسينا