|
راعي العجراء والموقف المحرج السلام عليكم ورحمة الله وبركاته اليكم سالفة راعي العجراء احراج من الوزن الثقيل في يوم من الايام وقبل كذا عام مدري بالضبط بس واجد اتفقوا الشباب (يازين كلمة الشباب) مبطي ماسمعته الحين صرنا عوده الله يحسن لنا ولكم الخاتمه اتفقنا على ان نطلع للبر عاد برنا لاتحسبونه الصمان والا الدهنا برنا قريب لوتصفق امي الله يرحمها سمعتها ويمكن بعد اشوف خزان بيتنا المهم وقبل الرحله بساعات تعذرت بأني مشغول شغل ضروري ولكن انتم اطلعوا وانا سوف الحقكم ان شاءالله ماتصير الساعه 10 الا انا عندكم بس علموني وين محلكم واجيكم قالوا مايخالف محلنا بالمكان الفلاني وهذا المكان على طريق صلبوخ القديم عند لوحة تيم دعايه للمشروب الغازي تيم اللي من سكان الرياض وعمره فوق الاربعين يتذكر ذلك وهو مجمع للمخيمات الشبابيه ذلك الوقت والان هذا البر موقع جامعة الملك سعود المهم راحوا الشباب وانا جلست اخلص شغلي ويوم تمت الساعه 10 او عشر ونصف الا انا عندهم حول الموقع بس وين خيمتهم من هالخيام انا اعرق سياراتهم داسنين غماره واحده وانا بعد موتري ددتسن حاط في لمبة السقف منديل احمر حتى لافتحت الباب صارت الغماره غرفة نوم رومنسيه متراميه الاطراف اشوي ادور بين هالخيام الا وهذولا ربعي داخلين في الخيمه من البرد بيني وبينهم 300 م قلت ياولد خلني اسوي فيهم مقلب واهبلهم انا عارف ان قلوبهم فضيخ الواحد يخاف من ظلاله وانا اوقف الددسن بعيد واحول على رجولي امشي شوي اشوي وانا ارفع ارواق الخيمه وادخل راسي واصرخ في اعلى صوتي وهم يتطامرون من الروعه اللي كب البريق واللي واللي كب البياله واللي دعس بطن خويه اللي منسدح ويم كملت دخولي من تحت الرواق ولاهم ماهم ربعي هذولي شباب ملتزمين وانا اوقف مدري وين اروح الخيمه اربعه في اربعه وهم سته في سته وانا اقف بينهم حسيت بالذنب وحسيت بالضرب اللي بيجين قبل مايضربوني وقفت اشوي وهم يطالعون فيني وخذ ياضحك بينهم وانا في وسطهم يناضرون فيني ويضحكون وانا حلقي في مثل السده حقت السواقي الللي من خياش ماعاد يندي ودي ابلع ريقي بس ماعندي ريق ابلعه اشوى يوم اخذ شوي يوم ركدوا وجلسوا قالوا شف روحه منتب رايح تعش وبعدين رح قلت يالربع اولا انا اسف احسبكم ربعي قلت ابا اروعهم غطان انا شفت الددتسنين حسبتكم هم قالوا مايخالف بس تعش وبعدين رح قلت يالربع الوقت متاخر وربعي ينتظروني على العشا واخاف ينشغلون علي قالوا اجل تقهو وبعدين رح لربعك جلست من بينهم ومن شاف وجهي ضحك ولا ضحك واحد طالعوني وضحكوا كلهم وصار وجهي مثل مسرحيه عادل امام شاهد ماشاف شي ويوم شبعوا من الضحك واشوا اطلقوا سراحي في كفاله الخجل في هذا الموقف المحرج وانا ارح وروح لربعي هه وينك تاخرت علينا قلت السالفه كذا وكذا وخذ ياضحك علي وراح الليل بين ضحك اصحاب الخيمه الاوله وكملوها ربعي انتهت السالفه واراجوا ان اكون وفقت في اخراجها لكم وقبل الختام سبحانك اللهم وبحمدك لا اله الانت استغفرك واتوب اليك مع تحيات اخيكم راعي العجراء http://sahat-wadialali.com/vb/upload...1266918415.jpg |
| الساعة الآن 12:01 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir