احذروا من النشالين السحرة
 

اخواني القصة اللي برويها لكم صارت لي مساء الخميس 7/12/1432هـ في شارع التخصصي بالرياض ومن امام مطعم الطازج:
بعد صلاة المغرب ركنت السيارة في الشارع وقبل افتح الباب الى بجية ذاك الواحد واوصافه(مواطن لابس ثوب ماعلى راسه شي اسود البشرة شنب خفيف حليق دقن نحيف ومفتول نسبيا متوسط القامة مطير عيونه ملابسه نظيفة)فتحت الباب عليه ابي صفقته وكان على شمالي مبنى يعني الطازج على يميني والسيارة باتجاه الغرب المهم صار الباب بيني وبينه قال ياخي انا فلان الدوسري-الاسم الاول ما اذكره واسم العائلة جايبة من راسه- يوم قال الاسم قلت آمر وصكيت الباب وقرب مني قلت مكانك واحط يدي في مخباي الايمن خابر فيه حاجة تقول اطلب عزك وهو اللي يمد يده ويقول طالع الجوال ((جوال اسود))اعتقد نوكيا بدون كاميرا وانااصد ماطالعت واقفي واتركه واروح للطازج دون ما التفت خفت اشوف حاجة تقلب راسي واصير مثل الطلي((من الله سبحانه جتني ردة هالفعل)).
المهم وعند باب الطازج ويستقبلني الثاني واوصافه
(ابيض البشرة نفس لبس الاول ونظافته لكنه مليان شوي وشنب خفيف ولهجته يا قربها لليمنية)قال السلام ومد يده ونسيت انا صافحته او لا,,قال((عندي موضوع ابكلمك فيه) قلت وانا معصب (توكل على الله واحد يقول طالع الجوال وانت تقول موضوع)وسفهته وفتحت الباب بدون ما التفت وسمعته يقول (ما نبغى منك فلوس ) وبعد دخولي المطعم واحلل كلمته ما نبغى قلت بس هذولي يعرفون بعض وارجع له الى مثل اللي يقول انشقت الارض وابلعتهم واطلب الطلب قال عشر دقايق قلت فرصة ادورهم وافك المسلمين حسب ما يعطيني الله من قوة وللاسف اكثر من ربع ساعة على الرجل طبعا ولم اجدهم..الآن يا اخوان وش رايكم من يكونون؟, لأني اتوقع ان الاول يقمرق على العين والثاني يلقف لك وياخذ ما معك ..الله اعلم.
آمل من الجميع الحذر واللي مر عليه مثل كذا يقول لنا وان تكون المشاركة جدية لأني والله اقول الصدق ..وابغى نصيحتكم هل ابلغ جهة مسئولة مثل الهيئة وهم قدها وقدود...وللجميع اطلب من الله السلامة وكل عام وانتم بخير.