منتدى استراحات زايد - سالفة:عرس حي العطايف..قوافي

السلام عليكم ورحمة الله وبركاته

حياكم الله اخواني واخواتي الاعضاء

وزوار خيمتنا الغاليه

هذي سالفه صارت بحي من احياء الرياض كلما مررت بأثاره الباقيه وقفت امامه بالساعات احيانن لأعطي ذاكرتي الفرصه لأعادة أطلالي المبعثره يمين ويسار لشريط الذكريات من جديد...

حي العطايف من الاحياء القديمه وموقعه وسط رياضي الحبيبه وجزء منه يقع الان على شارع الملك فهد رحمه الله ولا اعرف هل تغير مسماه او ما زال كما هوا.

الحي كان مليئ بالسكان الطيبين ومعظمهم اقارب أحبو السكن قرب بعضهم.. اهتماماً منهم بالوصل ..

الحي عباره عن بيوت شعبيه مبنيه من البلك والبعض مازال على حاله مبني من الطين والبيوت كثيره ومتلاصقه واذكر ان بوسط الحي توجد مقبره للسيارات القديمه اللتي لم يبقى منها إلا هيكلها المتهالك وكانت مكان للعب ابناء الحي بعضهم لا جميعهم ومسكن لكل كلاب الحي و القطط والحمير الضاله اعزكم الله..

واذكر ان الحي يمكن لايوجد به غير 3 بقالات اوما يسمى بالدكان وهو محل صغير مليئ برفوف خشبيه عليها المعلبات وثلاجه صغيره للبارد ولا يوجد اي اثر للمكيف لحفظ المعلبات والاطعمه والصحه عال العال..

وكان الحي عامر بالمناسبات من زواجات وولائم ومناسبات الاعياد والجميل ان كل شيئ يقام بالمناصفه جزء داخل المنزل للنساء وجزء خارجه للرجال ..

بمناسبات الاعراس يمد سلك اللمبات او عقد اللمبات للأعلان ان هنا عرس والترحيب بجميع الحضور ..

عقد اللمبات يمد من البيت اللذي يقام به الزواج لبيت الجيران اللذي امامهم وبكل صدر رحب الجار يفخر بمساعدة جاره ..

ويفرش الشارع بالرمل والزل الاحمر والطباخ يجي من العصر وياخذ مكان بطرف الشارع وقريب من بيت العرس ويبدء بذبح الذبائح ويولع مساعديه الحطب ويبدئون بطبخ عشا العرس والقهوجي ياخذ له مكان قريب جدا من البيت ويبدء بوضع الوجار الكبير والحطب او الفحم ويصف الرسلانيات فتتلاصف لمعتها مع لهيب الجمر كئنها قطع من ذهب... وتفوح رائحة القهوه والشاي والعود او الدخون الطيب ..فتختلط روائح لا يمكن من شمها بيوم من الايام ان ينسى طيب رائحتها وحلاوة مذاقها..

من المواقف اللتي حصلت بأحدى منا سبات الزواجات بهذ الحي الغالي بغلاة من فيه كعادة اهلنا من حرصهم لاتبعدون عن البيت ترا بالليل تطلع لكم العجوز ام عيون كبار.. وتاخذ البزران اللي يلعبون بعيد عن النور ..قصدهم ان لانبعد عن البيت خصوصا اننا ليل ..

احد ابناء اقربائنا عيونه كبار وطالعات لبرا وشكلهم غريب وعمره 6 سنين ..وجميع ابناء ضيوف العرس برا وهذ معهم وركض وركيض يلعبون وشكلهم ماخلو جني ينام هاك الليله هو من الركض ولا من الطق والرقص عند الحريم ودك الارض بعراقيب الرجلين اقرب مالهن صوت دبغ الجلود..

وطفا الكهرب فجئه وصراخ من كل مكان اللي يدور اوتدور عياله واللي ينادي ومستحيل يسمع وصار العرس بدقيقه اقرب لمهرجان..

ويجي الضعيف ابو عيون نافصات وطالعات لبرا ويجيب عود حطب صغير من عند الطباخ يبي ينور شوي عشان يشوف امه وين ومنحني على العود لايطفي ..

شافوه البزران ومن الخوف مع طفية الكهرب تزاول لهم انه العجيز ام عيون كبار وصراخ العجوز جت العجوز جت ..والحريم بعضهن بدل ماتسكت البزران او تسمي عليهم هي بعد ادلت بصوته بالصراخ واخذت اقرب بزر بوجهه وعلى براهروب من العجيز وبعضهن شاركن بالصراخ كمشاركه من غير مايدرون وشي اللي صار اهم شي انهم خايفين.. وابوعيون نافصات يصرخ خايف من العجوز ما يدري وينه والحطبه طفت من المكافخ والتصبيخ وصارت النار تقطه حمرا بطرف الحطبه ويركض وهي بيدوه ماسكه وكل ما ركض يبي يتغبى عند احديزيد الصراخ ....طفية الكهرب ما زادت عن ثلث ساعه حسب ما سمعت ويوم ولع الكهرب وشافو العجيز اللي خايفين منه ولاه ولدهم ابو عيون نافصات والضعيف من الخوف نقزت عيونه زود وتذكرو عاد التسميه عليه وزين انه ماانهبل..

تحياتي

اختكم

.. قوافي ..