|
عداد السرعة يتسبب لي بغرامة قيمتها 2500 ريال !! بسم الله الرحمن الرحيم السلام عليكم ورحمة الله وبركاته مبارك عليكم عشر ذو الحجة وتقبل الله منكم صالح الأعمال اشتريت بيوك قديم موديله 92 رود ماستر ليمتد سعودي واستغربت إن عداد السرعة بالكيلو 160 فقط ( كيلو أكيد لا أحد يقول ميل لأن الميل موجود بلون أزرق ) العداد شغال ولا لاحظت عليه شيء وأمبير السرعة مايهتز ولا يعلق وتسارعه سليم حسب نظري ولأني رجال راكد ونظامي وحذر من ساهر ومخالفاته ، ، كنت حريص على التقيد بالسرعة حسب اللوحات ولا أتجاوزها وفجأة لقيت علي ( 5 ) مخالفات سرعة قيمتها 2500 ريال !! وكلها من ساهر داخل الديرة ! كنت ناوي أروح للمرور أعترض على ساهر وأشكك في ذمته هو ومن يشتغل عليه لكن خطر لي أتأكد من عداد السرعة ! خليت واحد من الشباب يباريني بسيارته الجديدة وحنا نتكلم بالجوال ويعطيني كم يمشي وكانت المصيبة إن عداد السرعة عندي غير صحيح ويعطي نقص عن السرعة الحقيقية مثلاً سرعة 60 كيلو عندي تكون عند غيري 75 كيلو !! وهذا سبب المخالفات اللي وصلت الحد الأعلى بدون لا أدري عنها ! المخالفة الوحدة = 500 ريال قلت الشكوى لله وحسبي الله على هالقرنبع اللي جابلي مخالفات أكثر من قيمته بالسوق كتبت الموضوع للتحذير والتنبيه ضروري يتأكد الجميع من سلامة عداد السرعة ويقارنه في أكثر من سيارة عندنا نظام ساهر مايرحم ولا يفهم وكل همه يشفط راتبك أول بأول أبي أفهم ؟ ليش المخالفة 300 ريال علشان فرق سرعة بسيط أغلبه بدون انتباه مفروض المخالفة 50 ريال وهذي مناسبة وتخلي الواحد حذر مهما كان حسبي الله على اللي مشغله بهذا النظام الظالم وعساه يصرف فلوسه علاج له ولعياله |
| الساعة الآن 05:32 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir