|
سالفة السفر مع القرع بسم الله الرحمن الرحيم السلام عليكم ورحمة الله وبركاته اخواني واخواتي المكشاتيه حياكم الله اليكم هذه السالفه ولا تشرهون علينا لانها قديمه يمكن لها حول الثلاثين سنه هذي مره من ضمن جياتي للديره اخذت فيها اربعة ايام او خمسه وعند الرجعه قالت لي خالتن لي الله يرحمها خذ معك هالغرض لأمك عطهياه قلت وشو يا خويله قالت هالقريعات أخذتهن مجامله للخاله وحياء منها والا النفس شينه لا تستغربون لاني ما أداني القرع من يومني في بطن امي ولا انا واياه ولايف سبحان الله الى يومنا هذا من الله كذا على انهن نعمه ولله الحمد المهم حملتهن بحوض الددسن م 82 يمكن يجيلهن عشر طبعاً القرع عندنا ثلاث انواع قرع مصر على شكل حبحب مستطيل ومخصر وقرع الشام يجي مدور وقرع البلاد وهو اللي ما ادانيه بلحيل بلحيل ويجي مستطيل بس له رقبه المهم مشيت من الديره وهذولن يسرحن ويمرحن بحوض الددسن ويتدحرجن على كيفهن ولا وحده منهن انفقشت او جاه شي يوم تعديت المدينه طبعاً الطريق مع جبال المدينه قبل خط الهجره وهن خويات لي ومضيقات صدري ولا ادري وش اسوي بهن حتى كبار الوحده منهن كبر البزر يالله يشيله الرجال لونطعم منهن الى قبل واللي يبقا منهن نبي ناكل فيهن شهر جت على بالي فكره اتخلص منهن واوقف على جنب على الكتف بين المدينه ومحافظة بدر بجنب هكالمزرعه والخط مرتفع وافتحب باب الحوض حق الددسن وانا أدربيهن وحده وحده قلت غدي احد يلقاهن من اهل المزارع والا تطيح بهن دبشه وتاكلهن وهن ما يخربن لو يقعدن شهر انا افتكيت منهن واسترحت واصلت السفر وطبيت عند اهلي وانا مرتاح وبعد مده دريت الوالده الله يحفظها وسألت عن القريعات وين راحن وعلمته بالصدق وتضحك علي وتقول اخس يالخبل قلت انتي من اول تاكلين قرع البلاد لين حملتي بي الله يحرمك على النار وسلامتكم ومثل ما قلت لاتشرهون مكتوب علي اني ما أواطن القرع والحمد لله على كل حال أستغفر الله العلي العظيم وأتوب اليه تقبلوا تحياتي اخوكم النبهاني |
| الساعة الآن 01:36 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir