منتدى استراحات زايد - راعي العجراء والبحث عن الرخصه

السلام علاكم ورحمة الله وبركاته
اليكم هذه السالفه القصيره
لتحريك جمود هذه الخيمه
في يوم من الايام دخلت محل يبع كماليات وجلديات في عمائر الراجحي بالبطحاء
وكان صاحب المحل مسوي تخفيض على المحافظ النقديه ( الابواك كما نسميها)
اي محفظه بعشره ريال وحاطهن في كرتون اكبر من كرتون المكيف الفريون
يمكن حق غساله او ثلاجه صغيره 16 قدم عقده بحريه كيلو وآت فهر نايز هترز
وناثرهن بوسط هالكرتون بمايقلرب 2000 بوك نق على عشره لامكاسر ولا زياده
وهذه المحافظ اشكال والوان
المهم كان هاك الوقت رخصة القياده من الكبار اللي لاشفته تحسبه كتاب الهجاء والاناشيد
القديم اللي فيه (ابي اشترالي ساعة ٍ) ولاترمي قشر الموز) ( والقرد والنجار)
(والفلاح والنمله) والكبار بالسن يذكرونه عدل
لا اطيل عليكم بالسالفه دخلت المحل ووجدت هذه الابواك اشكالها جميله وجذابه والبعض منها يشيل الرخصه وهذا المهم والا الدراهم شويه كلها خمسين ريال ماتسوى من يحطها في بوك
المهم اني اخذت اقلب الابواك مع بعض الزبائن يجيلهم خمسه اوسته ندور على الزين وانا مايهمني الا الرخصه سويت نفسي ذهين طلعت الرخصه وقعدت ادور على بوك يصير مقاس الرخصه وحصلت منها واجد وكل ما اعجبني واحد تراجعت ادور افضل منه وانا اقيس الرخصه
اخيرا حصلت واحد ووضعت رخصتي فيه وبعد قليل لم يعجبني رميت البوك في الصندوق واخذت واحد ثاني يوم جيت اقيس الرخصه ولا هي ماهي معي عاد دور عليها بين 2000 بوك
وانا ادور على سرعه الوقت حول اذان العشاء وانا اشيل بوك وترك الثاني والبعض ارجع افتشه مرم ومرتين والخوف ان يشتري واحد من هالعمال البوك ويشيله اما عن حسن نيه او علشان الرخصه الموجوده فيه
وانا ابتلش وياولد وين راحت الرخصه اذن العشاء وجا صاحب المحل قال الصلاة قلت ياولد ماني طالع رخصتي في هذا الكرتون قال وش جابها للكرتون قلت اقاوس الرخصه علاها
وراحت مع حدى الابواك وهو يضحك علي وهو يجي يدور معي واشوى ونلقاها قلت خلاص مابي بوك ولا ببلاش خل رخصتي معي والسلام عليكم
واللي اضحك صاحب المحل هو يوم ادخل للمحل قبل سالفة البوك
ابا اقول السلام علاكم
قلت بسم الله علاكم
هذا مازاد راعي المحل ضحكه ربط سالفة البوك بسالفة السلام
انتهت السالفه وارجوا ان اكون وفقت في سردها لكم والله يحفظكم
وقبل الختام
سبحانك اللهم وبحمدك لا اله الاانت استغفرك واتوب اليك
اخيكم
راعي العجراء