|
راعي العجراء والشايب قصه قديمه السلام عليكم ورحمة الله وبركاته اليكم هذه السالفه القديمه يمكن يكون عمرها اكثر من 45 عام او حولها ولكن سالفتنا هذي غير شكل وهي تحكي شقاوه راعي العجراء يوم كان صغير السالفه كان لنا جار شايب ولكن اقشر وحمقي رحمه الله رحمة واسعه ولو تعسره يده قطعها وكان لاحمق على احد ومسكه مايفكه الا هو مصيحه طبعا الصغار بالسن انا كنت موذيه شوي ادري انه حمقي اذا جيت عند بابه ادق الباب وانحاش ولافتح مالقى احد المهم على هذا الحال مره مرتين عشر عشرين ولا يدري منه المهم في يوم من الايام عرف اني انا اللي يدق الباب وينحاش وتاكد من ذلك وهو يتقعدلي طبعا انا مدريت انه انتبه لي وهو يمسكني وخذ ياضرب حتى خلا جسمي تقول بيز طباخ من الالوان ومانتهى على ذلك كل مايشوفن كف كفين طبعا انا صغير وماقوى الشايب بالرغم ان جسمه نحيل جدا لدرجه ماتتصورها جسمه عظم وملبس بالجلد ولكن نشيط الاولين ماتلقى الشحوم في اجسامهم من الحركه ماهو مثل اللحين الشايب جسمه العرض في الطول في الارتفاع لاشفت بطنه تقول خامله زير 120 لتر المهم انا حاولت ان اتقاضى منه صرت ادق بابه باليوم 6 او 7 مرات يوميا ابلشته ابلاش وهو يمسكن مره وخذ ياضرب ماهنا عاير ماصك راسي فيه ولاهنا جدار مافيه اثر لراسي ثم يروح ويخلين ماغير اصاوي من الاوجاع ولاتعافيت رديت على بابه اذيته خوش اذيه وهو ماقصر معي بالضرب والتكفيخ المهم في مرة من المرات مسكني يبي يضربني مثل العاده وتعرفون صغير ماقدر اطقه مالي الا العض ولكن هو مافيه شي يمسك للعض جسمه نحيل بالحيل وانا القط حلمة الديد بسنوني هذي الين شي فيه وانا اعضه الشايب يحاول انه يفكني ماقدر صار يدور الفكه مني يضرب والا مايضرب الضرب متعود عليه ولازاد بالضرب زدت بالعض وخشمي تحت اباطه لو لي اسنون ثانيه عضيت ديده الثاني من حر مافيني المهم خذ ياعض بهالديد ايلين در بس ماهو حليب در دم وانا افكه وانحاش ومن عقبه لاشافني على طول قشعريره في جسمه يحس انه توني عاضه يبدا يتصدد عني ادق الباب ما ادقه ماعاد يقول شي حتى طاح اللي براسه وعقلته لو يوخذ حقه ماعاد يقول شي ومن اول احب ماعليه الضرب علي وعلى غيري فعلا صارت سنوني على ديده مثل ختم المواصفات والمقاييس انتهت السالفه وارجوا ان اكون وفقت في اخراجها لكم والله يرحم امواتنا واموات المسلمين وقبل الختام سبحانك اللهم وبحمد لا اله الاانت استغفرك اللهم واتوب اليك |
| الساعة الآن 05:58 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir