منتدى استراحات زايد - طريقة رائعة وسهلة ورخيصة لتخزين (( الـــحـــطــــب )) تقرير مصور ...

في بداية الصيف الماضي بدأت على بركة الله وبنيت الملحق وفيه مشب صغير ومتواضع

وكان القرار لتخزين الحطب إني أفصل صندوق كبير وأخليه بالحوش الخلفي

وبعد ما انتهيت من الملحق بديت أحسب حساب الصندوق ولقيته مكلف جدا بحدود 1500 ريال لأني ناوي أخليه كبير

وبعد تفكير طويل جت فكرة شناط الحديد الجاهزة ( التنك ) لأني خابر إنه فيه مقاسات كبيرة جدا وأسعارها معقولة

وعلى طول طمرت لسوق حجاب بالنسيم ( شرق الرياض ) ولقيت محل يبيع كل المقاسات

قلت أبي أكبر مقاس كم سعره ؟؟ بصراحة توقعته يقول من 250 إلى 300 ريال ..

والحمد لله طلعت الوحدة فقط بـ 150 ريااااااااااال !!!!

قلت يا سلام جيب اثنين صديق ,, وعلى طول رميتها بالحوش الخلفي

واللي يميزها إنها ضد المطر والغبار مايدخل على الحطب ولا الحشرات وتشيل كمية كبيرة من الحطب

هذي أول صورة للشناط بعد ماحطيتها بالحوش وشريت معها هالعربية لنقل الحطب

وهذي صورة الشنطة من قريب ومقاساتها

الطول : 80 سم @ العرض : 120 سم @ الارتفاع : 75 سم

وأمس الأحد طمرت لسوق الحطب بالعزيزية ( جنوب الرياض ) ودرت السوق كله ولقيت الأسعار فيها تفاوت بسيط

وكانت النية أشتري ونيت لكن مالقيت إلا شلايخ كبيرة وماتصلح للملحق وبرضو أسعارها من 900 ريال وطالع ..

فقررت أشتري حزم تكون مقصصة وجاهزة وسعرها أرخص بكثييييييير

والحمد لله لقيت هاك الزول الطيب وأخذت منه 100 حزمة بسعر 5.5 ريال للحزمة

يعني بقيمة إجمالية 550 ريال وعبت صندوق الهايلكس فوق حد الصندوق بشوي ..

جبت الكمية وحطيتها بالشناط والحمد لله شالتها وتقول هل من مزيد

وهذي صورة من قريب وكل شنطة حطيت فيها 50 حزمة

وهذي صورة للمشب اللي بالملحق ولا زال جديد وإن شاء الله وبعونه نخرشه بهالشتاء

(( ما شاء الله لا قوة إلا بالله ))

هذا مالدي أسأل الله العلي القدير لي ولكم التوفيق والسداد

والسلام عليكم ورحمة الله وبركاته