|
سالفة النسيان بسوق التمر بسم الله الرحمن الرحيم أخواني وأخواتي المكشاتيه مشرفين وأعضاء وزوار السلام عليكم ورحمة الله وبركاته اليكم هذه السالفه اللي قديمة شوي له حول 25 سنه حسب ما سمعت هذا واحد يجلب كل يوم للسوق تمر طبعاً وقت موسم التمر بالعاده يحمل التمر بالسياره قبل المغرب يعني مسيان ويجي للبيت ويصلي المغرب واذا جاء قبل الفجر جهم للسوق وبيوم من الايام جاء من المزرعه محمل التمر ويدخل يتوضاء ويصلي المغرب والا معه ناس مصلين المغرب ولا يعرفهم سلام عليكم السلام 00 اقلطو قالوا الله يغنيك حنا جايين نبي تمر كان عندك قال ابشروا بالخير بس تقهووا المهم لزم عليهم الرجال ودخلوا يتقهوون وسوالف وتطرقوا للتمر وقال التمر هذاه جاهز بالسياره عند الباب قالوا له كم سعره المهم اتفقوا وباع لهم التمر وعقب ما تقهووا قال لهم العشاء قالوا كثر الله خيرك تقهوينا ونبي اهلنا وطلعوا وسلموه الفلوس وأخذوا تمرهم وتوكلوا على الله بدربهم الرجال صلى العشاء وتعشاء واللي عليه بالخير ونام يوم جاء قبل الفجر قام وتوضاء وركب سيارته وجهم للسوق مثل العاده ويصف مع سيارات الجلابه وينزل ويقفل السياره ويروح يصلي الفجر وعقب الصلاة جاء لسيارته ويقعد يمشي بسيارته شوي شوي حتى ياصل يم المحرج ويحرج على تمره يوم وصل ويسلم على المحرج يعرفه كل فجر وهو عنده المهم قال للمحرج يالله قل به واخلص علينا نبي نروح نتقضى ونخلص اشغالنا قال المحرج عقب ما شاف السياره فاضيه وش تبين احرج عليه تبينن احرج على السياره والا ويش قال حرج على التمر قال المحرج وين التمر يابو فلان الناس منهم اللي يضحك ومنهم اللي مندهش لان بعضهم يعرفونه تهول الرجال وناظر لحوض السياره والا والله فاضي قال بصوت مرتفع شوي 00 لوالله سرقوا تمري يومني اصلي الفجر حسبي الله ونعم الوكيل لازم ابلّغ قالوا الناس اللي يعرفونه تأكد يا رجال غديك ما جبته والا انك بايعه يوم قالوا له هذا الكلام والاه مثل قولة اقعد يانيم وهو يتذكر انه بايع التمر عند البيت البارح 00000 وسلامتكم طبعاً هذا نتيجة النسيان 00 وانا آخذن المركز الأول مع مرتبة الشرف بالنسيان أملي ان تحوز هذه السالفه على إستحسانكم محبكم النبهاني |
| الساعة الآن 07:42 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir