|
راعي العجراء في مواقف السيارات (لاتفوتك) السلام علاكم ورحمة الله وبركاته اليكم سالفتي والباكستاني في مواقف السيارات في يوم من الايام اخذت عيالي وطلعت على الشرقيه من باب التمشيه مره على البحر والكورنيش ومره امشيهم بالاسواق ابيهم ينبسطون وانا بعد انبسط معهم بهذه المدينه الجميله وشواطئها الساحره وكان البال رايق خلال هذه اليومين وانا اتجول بهم حتى عيالي من زود البسطه وفلة الحجاج يدلعوني يالذيذ يارايق من زود الوناسه http://www.n9b.com/vb/image.php?u=19...ine=1229465335 واخيكم راعي العجراء ماغار يتبسم من زود الوناسه بالصراحه من كثر ماتبسم خفت يطيح العقم اللي بين افمي واذاني وينفتقن على بعض ثم يبيله ردم ببره وسلك من وسع افمي يديور فيه القطار من زود الوناسه يالله لاتغيره علينا المهم رحت بعيالي للسوق دخلت المواقف دورت على موقف للسياره حصلت واحد يبي يطلع بس يحمل له اغراض وبيطلع انتظرت اشوي يوم طلع سيارته وانا ابي اوقف مكانه وسيارتي جمس صالون كبيره شوي وانا احاول ان اجيب السياره بالراحه الا بذاك الباكستاني مدري منين جاي الظاهر انه جاي نزل مثل الطيور وهو يوقف مكاني وينزل قلت له ياخوي انت ماتشوفني واقف لي ساعه احتري الرجال يطلع حتى اوقف مكانه قال انه فيه معلوم نزام (نظام) انا عشرين سنه سعوديه قلت له وانت شايفني توي مؤاشر على جوازي داخل السعوديه اذا كنت لك عشرين سنه انا مولود قبل ستين سنه في السعوديه تحت قشعه عرفجه وامي الله يرحمها الهمت عقب الولاده حلب ورشاد اكثر من عشرين كيلو حتى تصدق اني سعودي انا تصورت ان الرجال بيطلع تقدير لي وللعائله الرجال نزل من السياره وهو مافكر فيني ولا بالعائله يوم ضاقت علي الدنيا وانا انزل من السياره ابا اتهاوش انا وياه ولا الرجال جثه لو ابي اسطره كف لازم اجيب سلم ارقا لخده وعيالي يصحون علي يقولون تعال يبه لا يدقك (لايضربك) اركب مانبي السوق نبي البحر ويوم ارتفع ضغطي زود يوم قال روخ اخسن لك انت شيبه مخ مافيه كويس قلت اه لوني شايفك بشبابي اني لاخلي وجهك مقشعه فقع وأنطفت ابتسامتي وصارت خشتي مثل افم التفيخه المربوطه(البالونه) من هنا عيال يصيحون ومن هنا الباسكتاني قلت خلاص ابا اركب والله وانا اركب السياره وقلبي من الحمق والزعل تقول فيه تروس قير ماطبه الزيت له سنه وانا اقول اه يالقهر لا وحلالات يالنباطه افلقه قبل ما امشي وهج ابرد اللي بقلبي ولكن يافرحه ماتمت قعدت ثلاثه ايام زود بالشرقيه وانا مثل البزر اليتيم اللي ماخوذ منه شي ماغر عبرته سادة ٍحلقه ودمعته فوق خده انتهت السالفه وارجوا انت تحوز على رضاكم وقبل الختام سبحانك اللهم وبحمد لا اله الا انت استغفرك واتوب اليك |
| الساعة الآن 06:01 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir