الوسم دخل ونطلب من الله سبحانه وتعالى ان ينزل علينا الغيث ويرزقنا بالمطر والربيع ويسقي ديار المسلمين اجمعين لين كلن يربع في ديرته.
اما الموضوع الي ودي اشارك به مع اخواني الله يطول عمارهم ويبيض وجيهم على هالمنتدا الطيب هو حروة الصيد. عندما تصل الى المكان الي انت قانصن له وتبدا تدور وتفتش اما عن ارنب او حبارى وتحصص الارض الدماث الي تبين فيها الجره وتلفت في قوع القشع والعثاعث لا بد ان تسمع كلمة((ترانا دخلنا حروة الصيد)) خصوصا لا صرت مع شيبان. تجتهد في التفتيش وتبدا تلتفت يمين ويسار والطيور مفرعينها وكلن يطلب الله من فضله وكلن يتمنى طيره مايفشله. بينما هذا كله يحدث ينشأ لديك شعور غريب تحس انك ملكت الدنيا كلها في مخباك كنك ملك من الملوك لاااا تقول مساكين الملوك مايعيشون اللحظات اللي انا اعيشها وفجأه..... عانها عانها .
ويبدا الجزء الثاني من الروايه السعيده.
والله مايهد الا ابو فلان طيره فرخ نبا نشوف طيرك الي مزعجنا بالقصيد فيه وشهو من لحيه.
يفرع ابو فلان ويطلبها.
ماشا الله ماشا الله .
طلبها ..طارت ... ارتفعت...افترعها..

عندها يبدأ الجزء الثالث.
الجزء الثالث اكثر من يعاني فيه رجلين.
السواق وراعي الطير.
هههههههههههههههههههههههههههههه مايحتاج اوصف كلكم مريتم على هالموقف وما يتخلله من عزاوي ونخوه وقد يكون فيها غضب يصل الى اللعن والشتم بس يازينه من شتم.ههههههههه

صادها طيار وحول بها وانطلقت التبريكات وراعي الفرخ يوزع ابتسامته الصفراء يمين ويسار.

ينزل وينسره منها ويندبه ويثني عليه وعلى خويه ابوفلان2 هو الي عزل له حبارى التعلوم.

انا استرسلت في الموضوع واجد هههههههههه بس لا تلوموني الي ودي اسألكم عنه من الي قبل يلقون الصيد بشكل عام والحبارى والارنب خصوصا يشعر بحروة الصيد.؟؟ هذا ما اردت المشاركه به وشاكر لكم وعسا الفاضين مثلي واجد عشان يقرون ماكتبت
وتحياتي