منتدى استراحات زايد - سالفة:طين جدي.قوافي

السلام عليكم ورحمة الله وبركاته

هلابكم جميعا ويامرحبا

لي اشتياق دائم لبيوتنا القديمه ومن كم يوم رحت وزرت بعض البيوت بوسط الرياض وكان هناك موقف حصل لي مع اخواني وابناء وبنات اعمامي بسنه من السنين الماضيه ..

كانت عندنا موهبه جماعيه وهي بناء قريه كامله من الصلصال من بيوت واوادم وجميع انواع البهائم سواء طير او حيوان ولا ننسى البير والدلو بوسط القريه وعربية الحمار اعزكم الله والقاز ومحلات لبيع العلف وسوق البيع والشراء..

كنا نمارس هذه الهويه بالسطح ومن الطبيعي تضربه شمسنا الحبيبه فيموع ونصلح ما خرب بعد العصر ويوميا على هذا الحال وملينا تعب.. يروح وقت اللعب وحنا نعدل الخربان..

فكرنا وش نسوي عشان ما يخرب ما لقينا حل إلا الطين ومالنا إلا لبن الجدران وقمنا بالواجب وشلون يبنون قالو يخمرون الطين ثم يجففونه شوي ويبنون ومالقينا إلاجدار سطح جدي هو اللي طين وما عليه جص ابيض مثل باقي الجدران ويفصل جدي عن باقي السطوح ... حنا شتاء وجدي الله يرحمه ينام الظهر بالشمس يتدفئ وحنا نبي طين وعجزنانصرف جدي عشان ناخذ جزء من جداره ونبني قريتنا كلها 9 او 10 لبنات وحاولنا ببعض التصاريف :

جدي تراه عج وغبار مايصلح تنام بالسطح يقول توي جاي من الصلاة مابوه شي ونوبه!! خالتي غاسلتن السطح ويرطش ماء يقول حدر فراشي شراع ما عليه.. لين جت فرصه: جاجدي ضيف على الغداء وحان وقت التنفيذ وعلى ما دورنا بوشي نهد ابطينا شوي والجدار مهتري ما يبيله شي وجا ولد عمي بعمر 13 سنه ومسك الشاكوش الحديد وبحيل ما يقواودب دب.............

يوم صرخ جدي اللهههههههههههه لا اااااايوفق العدو دفنتون !!!!!

طارت عيونناخبرنا بجدي مع ضيفه واثر مع تمططنا راح الضيف وطلع جدي من باب الروشن وهو مجلس له درج من جنب باب الشارع يرقى الضيف فوق وهو بمثابة مجلس وله باب على السطح وباب روشنهم على سطح جدي ونام بفراشه ما شفناه ونطل عليه ولا وش نشوف الجدار مهتري ومثل اللي ما صدق على الله احد يلمسه طاح اللي انصقع واللي ما انصقع وجدي الضعيف كله طين وغبار وما لقينا شي نقوله غير شفت يبه قايلين لك به غبار ماصدقت!!!

ما علق يامال جنات النعيم بغير لاحول ولاقوة إلا بالله ويناظر اللبن وهو متكسر...انا لله وإنا إليه راجعون !!!

همن قال بأعلاصوته ::

تعال يابشت او يابوشت انت وياه

رحمه الله ورحم موتى المسلمين

تحياتي

اختكم

..قوافي..