|
قسمنا البحري مالنا وما علينا ....خلونا نتناقش شوي(سلبيات ..وحهات نظر ..اخطا نقع فيها) اسعد الله اوقاتكم بالخير والمسرات وصبحكم /مساكم الله بالخير خلونا نبتعد عن الرسميات شوي بصفتي اخ وعضو قبل اصير مشرف باطرح بعض السلبيات في هذا المنتدى (في قسمنا على وجه الخصوص) والهدف طبعاً لمناقشتها للارتقاء بهذا القسم وانجاحه واعتذر عن حدتي في الكلام لكن والله كلكم قدركم على راسي واتقبل وجهة نظركم بكل اريحية والموضوع يعبر عن وجهة نظري وخلونا نتفق على شي قبل كل شي لكل عضو الحق في التعبير عن وجهة نظره اذا لم يكن فيها المساس بالذوات والاعيان او مخالفة قوانين المنتدى . اول نقطة اللي هي التعرض للدوائر الحكومية والجهات الرسمية بالسب والانتقاد وهذا الموضوع مرفوض من قبل الادارة وعليه عقوبات بالايقاف ونحوه وانا من وجهة نظري هذا الموضوع ما يتعلق بالصيد البحري يعني مالنا ومالهم خلونا في مواضيعنا وصيدنا !!!! يعني لا يجيني واحد مطفي النور يقول حرس حدود ولا ثروة سمكية احنا ما بيدنا حل ولا ربط ولا نغير من الواقع فلو يتفضل ويروح يناقش الامور مع الجهات الرسمية والله انه افضل له مثلا يعترض على قرارات او يتظلم من تصرفات لهم معه فيه نقطة ثانية وهي السلبية في المشاركات عند البعض يعني يجيك واحد يبغى يستفيد فيتصفح وياخذ اللي يبغاه ويخرج من الموضوع ولا كلمة شكراً حتى!!! طيب ايش خسران رد برد لائق التعب على الكيبورد !!! طيب وصاحب الموضوع اللي تعب نفسه علشان تستفيد انت ما تقوله جزاك الله خير هذه السلبية هي اللي تفقد الاعضاء الفعالين همتهم ونشاطهم فما يلقى تشجيع ولا شكر ولا ردود تبيض الوجه عزيزي العضو علشان تشوف حماس في المنتدى ابدأ بنفسك واعلم انك جزء من منظومة تتفاعل في هذا المنتدى حتى يظهر باجمل حلة فيه نقطة ثالثة بعض الاعضاء ما يرد على الا على مواضيع اصحابه وطيب واللي غيرهم ما يستاهلون (اعذروني على هذا الاسلوب ) بعض الاعضاء يطرح موضوع وتكتب له رد وتعليق وشكر ويشطفك ولا يعبرك ممكن مشغول وما يقدر يرد على الردود لكن المشكلة اذا ينقي بعض الردود ويشطف غيرها طيب اكتب (اشكركم اخواني لمروركم وتعليقاتكم) ما انت خسران شي !!! نقطة رابعة بعض الاعضاء ينزل موضوع ويلقى اهتمام من الاعضاء ويقعد كل يوم يومين يرد برد واحد حتى يبقى موضوعه في الصفحة الاولى طيب انت كذا مثبت موضوعك في الصفحة الاولى وما خليت لتثبيت المواضيع فائدة طالما انك مثبت موضوعك بنفسك (وهذا مخالف لقوانين المنتدى) طيب ليه ما ترد كل يوم خمس ردود ولا عشرة ردود وياخذ موضوعك اسبوع على حسب قوة الموضوع وما احد ياخذ زمنه وزمن غيره نقطة خامسة بعض الاعضاء يتهجم على اخوانه ويدخل في ذممهم ونواياهم يعني واحد يغلط في الكتابة يجيك مطفي النور ويقوله انت قصدك كذا وماني عارف ايه يا اخي احسن الظن في اخوانك اتمنى اكون وفقت في طرح الموضوع وما زعلت احد واللي زعل حقه علينا والله من اخوه اطرح لكم هذا الموضوع وما هو بصفتي مشرف ولا انا ما اني احسن منكم فيكم اللي افضل مني بمراحل وفيكم اللي يعلمني الكثير من الامور اللي اجهلها وفيكم اللي اكبر مني في السن |
| الساعة الآن 06:11 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir