الطير الطلاع بين الحقيقه والاصطناع,,,,,,صقار الأسياح
 

السلام عليكم ورحمة الله وبركاته:-
يعتبر الطير الطلاع عند العموم وكما هو دارج من قبل
النوع الاول:

وهو الطلع الراكد الي يركد على المرتبه ويطلع على اليد و يطلع الحبارى على مسافه بعيده ويركد من الصباح حتى المساء, ويكون حذر جدا ونبيه , ولا يكون طلعه كاذب , ويكون شديد الانتباه وتحصله مشغول في الالتفات يمنه ويسره خوفا لا تفوته حبارى عن غفله حتى انك تشفق عليه من حرصه الزائد, فهذا هو الغاية.

النوع الثاني:

وهو الطلاّع الذي يزهق من كثرة التطلاع على التكايه فتحصله يركد له 4 ساعات ومن ثم يزهق وتحصله اما ينقز (يطمر) على المرتبه الخلفيه ولا يكفخ يبي يطلع مع الدريشه ولا يبي ينط فوق راسك..


النوع الثالث:

وهو الطلاّع الذي اذا وجد الصقار جرة الحبارى اخذ منه برقعه وجعله يتطلع والسياره واقفه فتحصله يركد على المرتبه واذا مشت السياره كفخ او انه ينزل به خارج السيارة.


النوع الرابع:

وهو الطلاّع اللي على اليد فتحصله كأنه طابوقه على يد صقاره واذا نزلته على المرتبه كفخ يبي اليد , او انه ينزل به من السياره وهو على يده وتحصله لو يمشي مسافه طويله وهو على يده مايتحرك ولا يكفخ

واخواني مرت معي طيور طلاعه وشف مع اخويانا ومعي طير مايطلع إلا كروان وحبارى والحمام وغيره ما يناضره لاكن اذا ارتفع وزنه مره قام يلعب يطلع بدون شي
وهناك طيور العكس اذا ارتفع ثبت طبعه واذا نزل كفخ
استنتج من ذلك ان الطلع 70% من طبوع الطير ليس للانسان تدخل فيها واما 30% فهي من تدخل الانسان وتعويده للطير واذكر واحد من اخويانا اشترى طير وحش جرمه صغير وشكله غلط وصلت شبه وشريت كل الطيور إلا هو واشتراه خوينا بثلاث الاف وخمس ميه ودهل تدهيل بسط ولا دعاه وفك برقعه على التكيه بارض مقناص شوي وطلع الطير وضرف القزاز ما يعرف الدريشه المهم حاس وداس وطلع مع الطريشه واطلب شوي إلا هو على حبارى وش رايكم اتمنى الفكره وصلت والبعض يقول اللي يطلع على الكراوين ماهو طلاع بالعكس الكروان اكثر حذاره وقلة حركة من الحبارى ويعتبر طلاع
ولكم اجمل تحيه
صقار الأسياح