|
عرس راعي العجراء السلام علاكم ورحمة الله وبركاته اليكم سالفة راعي العجراء ليلة العرس هذا العرس مبطي والسنين تركض واعتقد انه قبل 40 سنه قبل الميلاد من بطاه حينما قرر راعي العجراء الزاوج وفي ليلة عرسه هائم في خياله الواسع شعور لايوصوف كاني ملكت الكون تلك الليله من زينها ودي اعرس كل ليله الناس تنظر اليك كانك اسطورة هذا القرن سلام وقبل وتبريكات وتهاني حتى ياجماعه حسيت ان رقبتي صارت طويله تشوف المقفي والمقبل مايدرون ان العقال سلف والبشت سلف واعتقد انه بشت وبر وحنا بالصيف وش يعرفني للبشوت والجزمه اعزكم الله من البطحاء 35 ريال وفنيله اوميك كذلك الهاف ستوبر اوميك بس انا اخبر ان الهاف ستوبر دفاع مدري ضهير بالكوره وش جابه عندي مدري المهم المهر 500 الاف ريال وقايلهم تقضوا بهن واشتروا اللازم وان بقى شي رجعوه تراه بذمتكم وصاحبكم راعي العجراء واثق الخطوة يمشي ملكا ليله عرسه وعندما بدا الحفل وقص شريط الافتتاح اتفقوا ابناء اختي على تحطيم جدار هذا الكبر والغرور وشوفة النفس اذا بغيت التفت التفت بكل جسمي حتى لايطيح العقال وعندما مسك يدي والد العروسه لكي يدخلني على العروسه كانه مختارني بين هذه المجموعه صوتلي واحد من عيال اختي قال خال خال وانا اوقف ابشوف وش يبي قبل الدخول على زوجتي توقفت ووقف والد العروسه بين هذا الجمع الغفير وفال ياخال ترى العيال اكلوا بسطتك افطن له ياخال يوم صار وجهي احمر تقول لحمه في باب قصاب واحمرت عيوني واشتد غضبي عليه ولو امسكه لذبحه ذبحة التيس بالقصه السابقه شوي الا والثاني يصوت ياخال ترى العيال اكلوا البليله وكبوا باقيها وقلت لهم ابعلم خالي ووالد العروسه يستمع الى ذلك نزل راسه بين المصدق والمكذب شوي يوم جاء واحد من اقربائي وقال اصبر شوي ابعلمك قلت وش تبي بعد ماعاد عندي الحين لابسطه ولا بليله قال ترى دجاجتك السودا بيضت اخذه البيضه اغبيه لك والا اكله يوم دليت ماشوف الدرب يوم مشيت الا وذاك المليوح من زملائي يقول ان امك موصيتني لك تقول خل العروس تشوف عينك الحمراء ترى الرمح من اول ركزه لاتلعب علاك والبلا ابوها يسمع ومنزل راسه وانا بحلقي شي مدقر بعثمور لا وراء ولا قدام بهالحلق اشوي يوم جان اللي مابه ملح راعي البشت قال تراي ابمشي معك قبل ماتدخل اباخذ بشتي اخاف يجيه شي قلت له الله يجزاك خير انا داخل فيه ورشة غيار زيوت خله على الاقل الى باكر الصبح عاد من زين هالبشت لو انا رايح للمقصب وماخذ منهم جلد ثور ولابسه ازين من بشته المروح وكني ادري ان والد العروسه يقول وش جاب هالمعرس لنا انا لله وانا اليه راجعون صار عرسي مثل العزاء دخلت على العروسه وابا اسلم علاها بدل ماقول السلام علاكم قلت ماعندك بسطه اطلع افطن له لاتوكل والا بليله لايكبوها انتهت السالفه وارجوا ان اكون وسعت صدوركم ولو بالقليل واعتبروها اخر سالفه لراعي العجراء بهذا المنتدى وسوف اعلن اعتزالي عن قريب مع فريق برشلونه والله يحفظ الجميع وفي النهايه سبحانك اللهم وبحمدك لااله الانت استغفرك واتوب اليك |
| الساعة الآن 04:20 AM |
Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir