|
سالفة راعي العجراء والحصني السلام علاكم ورحمة الله وبركاته اليكم هذه السالفه البسيطه ارجوا ان تحوز على رضاكم سالفتي والحصني في سنه من السنين وانا توي شباب طالع مقناص بالشتاء مقناص حباري ويوم عشيناء ونزلنا طيورنا والحمام اللي معنا وضبطنا القهيوه والشاهي والعشاء على النار بس ندور الفراش نبي النوم من فجر الله وحنا قلهي بقلهي مترنا الارض عرض طول الا بذاك الحصني رايح جاي عندنا ماغار مره قدام السياره ومره من عندنا وحنا نشوفه وهو رايح جاي ومرات ماغار يصوت قع قع ادوخنا وصارت سلفتنا هالحصني شوفوه راح شوفوه جاي وخفنا على طيورنا والحمام اللي معنا بالشبك يدخل ايده عليهن ويذبحهن اذا صرنا نوما هكذا تصورنا مع هالحصني عاد تونا طايحين بالقنص بالطيور ومامن بعايد مامن دلولا لاقرمن ولاماجلان كل مكاشيتنا قريب يعني مسراح جرذي مامن بعايد المهم بلشنا بهالحصني قال واحد من العيال وشرايكم ارميه بالشوزن قلت يااخي حرام تقتله هذا حيوان يريد ان يعيش كما تريد انت ان تعيش تراه مثلك دم ولحم وقلب ينبض ويسعى لرزقه مثل مانت تسعى لرزقك ويمكن بعد يحب مثل مانت تحب ويعشق كما تعشق ولا شاف الطخماء تضيع روابعه اتركه عنك وخله يترزق الله قال بياكل طيورنا قلت خلوه علي لاتشيلون هم الحصني ان شاءالله ماعاد يقرب حولكم قالو وش تبا تسويبه قلت ماهوب شغلكم انتم تعشوا وخلوه على راعي العجراء وبعدين ابغى اعاقبه عقاب يحر ولايضر احسن من قتله المهم يوم تعشينا وانا اخذ لحمه وادهنه بهاك الفلفل الحار يجيلهن سبعة روس او اعلوب ابردهن يقطع السان وانا اخذهن وابعدهن عنا ويوم اخت اشوي الا والحصني جاي يمشي مابطبلونه يدور العشاء ويوم بد بالاكل صار يتغصبه من الجوع ولكن وينك يالجوع اهون من هالحار وبدل مايصوت ويقول قع قع صار يقول دع داع بع باع قاق باق ماعاد يعرف وشلون كان صوته وهواللي يسند من عندنا متنطح الشمال يمشي طبلونه وفاتح افمه عسى السانه يبرد من هالفلفل ومن عقبه ماقرب حولنا ويمكن الا الحين وهو يهف على السانه على العموم سلم من الشوزن وعفاء الله عم سلف اشكركم على سعة صدوركم مع راعي العجراء وعمته منيفه وعلى فكره تسلم عليكم عمتي منوفه وفي الختام سبحانك الله وبحمدك لااله الاانت استغفرك واتوب اليك |
| الساعة الآن 09:19 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir