|
مــن روائع قـصص العشق **قصه من الموروث الشعبي**مـحـمد الظـاهـري السلام عليكم ورحمة الله وبركاته اعضاء ومشرفين وزوار الخيمه ومكشات اهلا ومرحباً بكم في سالفه جديده من سؤلف الموروث الشعبي القصص كثيره لكن طرت على القصه التي سوف اسردها لكم واتمنى تحوز على رضاكم يقولون العرب من اول كان فيه واحد يقاله عموش بن زنيوط وهو شاعر كبير ومعروف كان له صديق يروحون يتقنصون سواء ويجون مع بعضهم ابد اكثر من اخوان وفيه سنه من السنين راح عموش ومعه الخوي في ايام الشتاء ولامطار ووافقو الربيع وكل يوم يصادفون لهم عرب يشدون وانتم تعرفون من قبل العرب تشد والي بالشرق والي بالغرب والي بالجنوب يتختلفون في الاماكن يدورن الربيع والمكان والار الطيبه يا زين هاك الايام حتى في وقتنا الحاضر اهل الابل يتنقلون ويعقبون ويصادفون اهل الذيدان كل سنه اشوفهم في النفود ما اجمل تلك الحظات نرجع لسالفتنا صادفو هاك العرب شادين يبون المراح الفلاني وهو يمشي معهم هو وخويه ويوم ثالث وهم واصلو في هاك الخبه وهم الي يتفرقون العرب وكل بيت يبني بيته هذاك الفلاني ناصب بيته هناك وهذاك دون العرق لو تتخيله منظر جميل وعميش يعاون العرب في بناء البيوت ويوم جاء الليل وإلا كبير القبله يذبح ويعشي ربعه وسؤاليف في هاك الليل والبرق يبرق عليهم وخذ سؤاليف وفلان يسولف وفلان يسولف المهم تفرقو وعموش وخويه ما لهم لا بيت شعر ولا شي وين ينام في هاك الليله والبرق يبرق عليهم ولكن شيخ العرب حلف عليهم ونامو عنده ومن بكره قامت العرب والمكان جديد عليهم وكل واحد يسرح في حلاله وكل وحده تزين بيتها وتسرح في غنيماتها وعموش طلع من الديره ويتمشى الحاله ويرقاء هاك العرق ويفكر في الديره ويهوجس وإلا تجيه هاك البنت المزيونه تنخى عموش تقول الذيب ورا هاك الارطاة الكبيره وهو الي يقوم ويتجه للذيب و اذبحه وشاف البنت وهي شافته وعشقاها ويقال حسب الرواة اسمها جوزا وكل يوم يروح حول المفلا الي تسرح فيه ويشوفها اخذ كم يوم وهو الي يمشى هو وخويه وهو ما غير يفكر فيها ويسرح فيها ويهوجس ولسانه ما يسكت من القصائد وخويه يقوله انت وش علمك اول ما شفتها اخذت عقلك ويقول ليتها اخذت عقلي ولا افكر فيها ويومشون ووقفو في هاك الشعيب وهوم الي ينوخون ويشبون نارهم ويحمسون ويدقون نجرهم ويتقهون وبعد القهوه تفرقو يتصيدون ويوم اخذو شوي وإلا خويه صايد هاك الطيور والارنب وهو ما صاد غير طيرين يفكر في البنت ويهوجس فيها والمهم تغدو وقعدو وتعشو في الشعيب ومن بكره وهم يمشون ويوصلون هاك العرب الي توهم نا زلين ووقت العصر وينصون هاك البيت المروبع ويجلسون ويوم جاء الليل وهو الي يعشيهم عموش من يوم جاء الديره يسمع الناس ينادون لوحده اسمها جوزا وكل واحد هاتيه يا جوزا وديه يا جوزا وتعالي يا جوزا وروحي يا جوزا وهو في باله ان جوزا بنت مزيونه وكل العرب تناديها ويوم تعشو قال خويه لعموش خلنا نمشي قال لا ماني ماشي لين اشوف هاذي الي اسمها جوزا قال خويه وش تبي فيها الظاهر انها تبي تلهف مخك غير ذيك قال والله ما امشي ابي امرح عند راعي البت لين اشوف جوزا وامرحو ويوم اصبحو ويقهويهم راعي البيت ويفطرهم وتجي وحده تنادي باعلا صوتها يا جوزا يا جوزا وإلا يوم اظهر بين البيوت ويوم شافها وإلا خادمه سمراء تخدم اهل الديره وهو يحسب زينها وين يوصل القمر ومشى هو وخويه وقال له ابيات جميله لكن لا اعرفها كامله يقول أعوي عواء ذيب تعاوي جنوبـه ذيب عوي همٍ من الجوع غايـر وإلي تهضم يجذب اعـواه دوبـه يونس من الجوع الملاطف عزاير عودٍ بتال العمر جت له عقوبـه عودٍ قضا لحقن عليـه الدوايـر علي عشير يا عوض غرً بوبـه تتلي ظعـون مدلهيـن الفطايـر تتلي معديـه الحريـب انتحوبـه لاثار عج الخيل عنـد العشاييـر دنوا لها من زمل أبوها ركوبـه مورد النسنـوس نـاب الفقايـر خزامه من الجوخ الحمر نقشوبه ومفاصلٍ باللـون بيـن المرايـر اقفوا عليها عقـب مـا قربوبـه وأنا من الفرقاء حسير الضمايـر يا من يبشرني يقول اقبلـوا بـه واجزاه بالمعروف واعطي البشاير ياليت ما يوجـد سميـه بنوبـه ما طره الشرقي لغرب الجزايـر أول عذابي يـوم هـم صوتوبـه ينهب عراوي القلب مثل السعاير اخواني هاذا ما طاب لي بأن اسرده لكم والقصه كتبتها لكم حسب ما سمعت من لسان الراوي الي علمني شخصياًفي السالفه ارجو ما قدمته يحوز لكم واعذرزني اذا حصل الي تقصير او شي في الروايه وانتظروني في سالفه اجمل بأذن لله وتــــــــــــقبلو تحــــــــيات مـــــــــــحــــــــــــــبكم مـــحـمـــــــــــــــــــد الـــــــــــظــــــاهـــــــــري |
| الساعة الآن 04:02 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir