|
من سواليف راعي العجراء (الشايب الحمقي والقميريه) هذه سالفه قصيره عن الشايب الحمقي فيه شايب مفتون بالصيد وخاصه القميري ولكن هذا الشايب حمقي جدا لدرجه ماتتخيلها لو تعسره يده قطعها ولويخطي التصويب على الصيده يعض الشوزن اللي معه في اسنانه التي لم تتجاوزالثلاثه اوالاربعه اسنان حتى هذه الاسنان دخلت في اللثه من كثر مايعض ماسورة الشوزن وصارت اسنونه صغيرات قاصرات مثل نصايب القبر اللي ذاري عليها السافي طول السنين يالله تشوفها حتى صارت الشوزن ترتجف منه اذا اخطا تخاف من العضه فمبالك بالشخص الذي يقود السياره معه وخاصه الشباب فهم يقدرونه اولا ولايريدون ان يزعلونه واذا اصاب الصيده يفرحون جدا حتى مايحمق هذا الشايب عليهم المهم هذا الشايب يصيد قميري بالسياره ومعه قايد السياره ماخذينها سواليف اشوي اللى وهذيك القميريه اللي في الطلحه شافها الشايب قال اوقف اوقف هذي قميريه بس صعب رميتها بين غصون الطلحه ماشوفه زين قدم شوي قدم السايق يوم اختفت وراء غصن قال الشايب ارجع ارجع شوي رجع صاحب السياره لعله تعدها ناظر الشايب ولاها ماهي واضحه له قال قدم شوي ولاتكثر التقدم لعل اللي يسوق تقدم اكثر من المطلوب وهو يلتفت الشايب عليه قال ان اقولك قدم شوي اخر شي تقدم واجد يابن الحلال ارجع بس اشوي السواق رجع وكثر الرجوع ويلتفت عليه الشايب ان تعرف تسوق اقولك ارجع ترجع واجد وان قلت قدم قدمت واجد ياشين وش هالسواقه اللي مثلك ينثبر بالدار مانت كفو صيد يالله قدم بس شعره كودها تبين لي احسن قدم شوي وهي تطير القميري السايق حاول يلطف الجو على الشايب مايبي يزعله قال السائق يابن الحلال ماكتبت لنا قال الشايب يابن ؟؟؟؟؟؟؟؟؟ الا مكتوبة لنا بس انت مسحتها بالروحه والجيه تحرك تحركت عليك دواب الليل ارجع لربعنا ابرك منك ومن سواقتك والصيد معك خلنا نتقهوى احسن من رفالتك انتهت السالفه ارجوا ان اكون وفقت في سردها لكم مع تحيات اخيكم راعي العجراء وتسلم علاكم عمتي منيفه |
| الساعة الآن 02:41 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir