|
سالفتي والمطاروالطياره السلام عليكم ورحمة الله وبركاته اليكم هذه السالفه في سنة من السنين وقبل الثلاثين عام اوتزيد بعشرسنين مدري الايام تركض وفي العطله الصيفيه وبعد نجاحي بتقدير مقبول مع الدف والدفدفه والتبريح وتنسيم الكفرات من سادسه ابتدائي الى سابعه متوسط وبعد سماع اسمي بالراديو قرر والدي رحمه الله ان يكافئني بزياره الى ديرتنا عند عمي لكي اقضي الصيفيه بالديره عند اعمامي وبالطائره التي اركبها لاول مره ومن شدة فرحي بهذه السفره ذهبت الى الخياط وفصلت اربعه ثياب وشماغين العقل وبعض اللوازم الخاصه وبعض من الهدايا الى ابناء عمومتي (ميداليات من البطحاء) كل واحد كاتب اسمه عليها وكنت اتخيل نفسي وانا انزل من الطائره وعمي واولاده ينتضروني بالمطار كأني انا الكابتن طيار او انا الذي فتحت بلاد الاندلس الطاقيه صغرت على راسي قبل ان اركب فكيف اذا وصلت دخلت المطار معي شنطه مخططه بالاحمر والاسود ليس لها قفل واضع كل احتيااجتي بها اربع اثياب وشماغين العقل والفنيله والسروال والميداليات وشامبوا وصابونه لكس وبخاخ نشاء اول ماطلع حق الثياب وليفة جسم والظاهر انها ليفة مواعين وعند دخولي للمطار قمت بتمرير شنطتي على الجهاز لكشف ما بداخلها وبعد مرور الشنطه على جهاز التفتيش وتوقفها عند الشاشه ناداني العسكري وقال وش معك بالشنطه قلت هدومي قال انا ماسالتك عن الهدوم انا اسالك عن هذا اللي له مقبض قلت مدري وشهو شكل غريب داخل الشنطه قلت هذي ماهيب شنطتي قال الا شنطتك الصوره واضحه بالشاشه ولكن لا اعرف ادقق زين ولاهي ملونه ولا عرفت وش هالمقبض نادا العسكري عسكري ثاني واخذوا يطالعون وش هذا الشكل ومع الخوف ماعاد اميز شي قلت يابن الحلال هذي ماهي شنطتي قال ابرجعها تشوف انها شنطتك فلت رجعها رجعها العسكري قال هذي شنطتك قلت ايه بس اللي بالصوره ماهي شنطتي قال خلك واقف وانا اركبي تقول غسالة البابطين تفتر للاخير وترجع وبراطمي تقول حافة طبل شاد من الحراره وريقي ناشف لو ابلع فازلين تمخش الفازلين من حلقي المهم اخذ العسكري الشنطه وقالي افتحها قلت مايحتاج مالها قفل فتحها فتحها العسكري واول مافتحوا الشنطه حصلوا بخاخ النشاء اللي ابجخ فيه عند عيال عمي وخذ ياضحك علي وانا ماتعرف حالي من فالي قالو خلاص رجعها للسير رجعتها على اساس اني اخذها اذا خرجت من الجهه الثانيه يعني خلاص راحت للطياره اللي بتوديني للديره وانا اروح الى الكونتر اللي عليه الرحله وقصيت الكيبورد اوهو البربونق مدري ياخوك وشنهو بس اللي يعطونك تركب به الطياره وانا افرح يوم قال رح اركب الطياره وجيك ماشي الف اخاف تفوت الرحله وانا اركب بالطيره واجلس وابدا اتخيل وشلون تبي تطير هالعماره وبعد ماركبوا جميع الركاب والباب مابعد قفل الا واللي يصوتون بأسمي بالطيار فلان ابن افلان عليه النزول من الطياره والاتجاه الى كونتر خدمات الركاب للاهميه قلت يافرقا عين وش يبون فيني بعد وتبدا النفضه من جديد اضلوعي تصافقت في بعضها صار فيها صرصره من الاحتكاك لوتحط فيها شحم سوبر شل 120عيار ماراحت الصرصره القلب يطيح بالقاع وشوي وهو طامر بالحلق اقول في نفسي انا كفو للطياره المهم نزلت للصاله وين انت ياخدمات المسافرين يوم وصلتهم قالوا انت فلان بن افلان قلت نعم قالوا خذ شنطتك قلت وشلون عرفتوا اسمي وانا ماكتبت اسمي على الشنطه ولا لها رقم قال واحد منهم ابد فتحنا الشنطه ودورنا على شي لقينا اسمك بالثوب الجديد حق الخياط ماشلته خذ شنطك معك وركبها بالسله الفوق منك بالمقعد قلت للرجال يااخي ماعاد ابي الشنطه ولا اثيابي ابي امي ابي ابوي ماعاد ابي الديره ولاعمي المهم اني ركبت ووصلت للديره والطاقيه صارت كبيره رجعت |
| الساعة الآن 02:40 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir