|
الفـقيـر ورزقـه فـي بـغـداد*قـصه مـن الــمــؤروث الشـعـبـي *مـحـمــد الــظـاهـري السلام عليكم ورحمة الله وبركاته اعضاء ومشرفين وزوار مكشات اجدد لقائي بكم في هاذي الخيمه الرائده والتي تحظاء في اعضاء مبدعين والذين اسردو لنا من قصصهم الجميله والشعبيه اخواني الرزق من النعم التى انعمها الله علينا واسئل الله ان يديمها علينا وعليكم والقصص في الرزق كثيره منها في الماضي ومنها في وقتنا الحاظر وسوف اروي لكم من القصص الشعبيه وهي التي تتعلق في موضوع الرزق والقصه يا اخواني سمعتها قبل كم يوم ولم تحفظها لنا الكتب ولا غيرها ولكن حفظتها لنا نجوم السماء التي تظهر وتختفي وكل نجمه تخاطب من ينظر إليها وكل نجمه تتكلم عن ما شاهدتها في وقت ظهورها وتحزن وتشتاق لتلك الليالي الساكنه تلك الاياام الخوالي والذي يحزن لها عند مفارقتها رغم صعوبة العيش وقل الصحه لكن تبقا من اجمل الايام التي عشها الرجل واسئل الله ان يعوضنا بما فاتنا في الجنه لا اطيل عليكم واترككم مع السالفه واتمنى انها تحوز لكم يقولون من اول كان فيه رجال فقير وعنده زوجته وولد وبنت والرجال هاذا عنده حمار الله يكرمكم وكل شغله يشتغلها في الحمار و يروح ويوم ينقل حطب ويوم تحصله وسط السوق ينقل بضايع ويوم يوصل للبيوت ويوم يجر الحمار وهاذي شغلته واذا جاء صلاة الظهر ربط حماره وسط البيت وحاطه في زاوية حوش البيت ومطمن الارضيه للحمار الله يكرمكم وجلس في حوشه ويتقهوء ولين امساه الليل وينتظر يوم جديد لرزقه ويوم نام في هاك الليل وإلا يجي شخص في منامه ويقوله رح تراى رزقك في العراق ويكررها مرتين ويروح وتكررت الحاله ثلاث ليالي وكل ليله يجي ويقول رح ترا رزقك في العراق ويوم اصبح وهو الي يقول لزوجته انه يبي يروح للعراق وقالت له يا رجال خلك عنك الهواجيس والخبال لا تصير جاهل هاذا حلم ومدي وشلون قال الرجال انا رايح رايح الله لا يعوق بشر ويوم طلع لوسط الديره وإلا القوافل تبي تمشي بكره الصباح وهو الي يروح يكلم هاك الرجال ويتوسط له انه يروح معهم ووافق ويوم جاء الليل وهو ينام وإلا يجيه هاك الرجال ويقول رح ترى رزقك في بغداد ويقوم من نص نومه وهو الي يهوجس فيه ومانام في هاك الليله لين اصبح الصبح وهو الي يلم عفشه ويودع زوجته وعياله ويوادع ربعه وراح مع القافله ويوم اخذو حول الشهر وهم يوصلون بغداد وكل القوافل تفرقو عند معارفهم إلا هو جالس في هاك الفرجه الحاله وما يدل ويخاف انه يروح مكان ويضيع وقد جالس لين امساه الليل وإلا هاك الارجال الي يمر من عند وهو يفكر فيه ويتعداه وشوي وإلا يرجع له الرجال قال له انت يا ولد قال له هلا سم قال :انت شكلك متغرب قال الرجال :إيه والله اني متغرب ودورت الرزق وعزمه الرجال الي من اهل بغداد وعشاه و يجلسون في المجلس عقب العشاء وسولف وسولف وسالفه تجر سالفه لين خوينا عرفه زين ووثق منه قال له يا رجال انا جيتي لبغداد عشان كذا وكذا وكذا ونا والله جيت لبغداد ادور رزقي واتلفت ما لقيت شي قال راعي البيت:يارجال والله اني زيك انا يجين واحد وانا نايم ويقول رح ترا رزقك تحت حمار فلان في الجزيره وهو عندكم من السعوديه بس مدري وينه ولا اعرف سكت خوينا لئنه هو راعي الحمار ويوم اصبح وهو يطلع من خويه وبعد اسبوع وإلا القافله تبي تروح للجزيره وهو الي يروح معهم وعقب مده ويوم وصل عقب العصر وهو الي روح لبيته على طول ويروح لحماره وهو الي يفك الرسن ويحطه هناك وياخذ له مسحات وهو الي يحفر تحت مربط الحمار ويحفر والتراب تهدم عليه وهو الي يحفر وابطا وهو يحفر ويوم ابطى شوي وهو الي يضرب هاك الصندوق من الصناديق القديمه والكبيره وهو الي يحفر عنه ويوم طلع وهو يروح فيه اخر البيت وهو يفتحه ويوم لشي الي ملفوف في قماش ويوم فتحه وإلا هاك الذهب الي ملي الصندوق يفكر يصدق وإلا ذهب ذهب ومن عقبها صار من كبار اهل الديره في المال وقام يفتح له دكاكين ويشتري له مزرعه ومعزاء من اول كان فقير عيشته على الله وعلى حميره والحين من كبار القريه فسبحان الله الرازق اخواني سالفتي انتهت واعذروني اذا حصل اي نقص او تقصير هاذا حسب ما سمعته وانتظروني في سالفه اجمل بأذن لله وتقبلو تحيات مــــــــــحـــــــــــــبــــــــــــكــــــم مـــــــحـــــمــــد الــــــظـــــاهــــــري |
| الساعة الآن 05:44 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir