من اهم نقاط تصفيه السياره
 

السلام عليكم ورحمه الله وبركاته
تصفيه السياره من التقطيع والتفتفه وغيرها
اذا صار عندك مشكله فافضل شي تفحص كمبيوتر لانك بتغير قطع كثيره ومكلفه من ناحيه سعر القطع وسعر شغل اليد وفي النهايه الكمبيوتر يحدد لك المشكله وتغيرها وترتاح باقل التكاليف وسرعه التصليح
اسمع قصتي
عندي جمس 94 يقطع والشكمان يفقع ويطفي المهم قالو لي الورشه افحص ككمبيوتر افضل قلت سياره قديمه ولا يحتاج افحص شكل المشكله بسيطه بواجي واسلاك وخلاص

غيرت بواجي اصليه ولا ظبط
واسلاك بواجي اصلي ولا ظبط
كويل اصلي ولا ظبط
طرمبه بنزين اصليه ونزلت التانكي ولاظبط
منظم هواء اصلي وكاله ولا ظبط
توظيب بخاخات اصلي ولا ظبط
بخاخ بخاخات اصلي ولا ظبط
كلفتني فوق ال 1000 ريال وما استفدت شي يعني 1000 ريال راحت هوا بدون فائده

والمشكله طلعت من
شاكوش ويتضمن بويبينه وكويل وغطاء كويل ويجي كامل وهنا طلعت المشكله وسعره ب 450 وتركيبه ب 50ريال وانتهت المشكله
لو اني فاحص كمبيوتر بيكلف الفحص من 50 الى 100 ريال يعني وفرت على نفسي اقل شي900 او 950 ريال ووفرت الوقت والمطارد ورا القطع من محل الى محل

تنبيه في بعض محلات قطع الغيار مايخافون الله يبيعون بواجي تجاريه وشكلها الخارجي والكرتون مثل ال الاصلي 100% والتجاريه في اغلب الاحيان تكون خربانه وهذه المشكله مرت على احد الاصدقاء غير البواجي لان سيارته فيها تفتفه ولا ظبطت وغير قطع غيار كلفته 2700 ريال واخر شي اكتشف ان المشكله من البواجي تعبانه
فانتبه من شراء البواجي من محلات غير معروفه ومشهوره

ان شاء الله اني فدتكم وبالتوفيق