|
سالفة:طير المدعى..قوافي بسم الله الرحمن الرحيم السلام عليكم ورحمة الله وبركاته اخواني واخواتي المكشاتيه والزوار حياكم الله جميعا ويامرحبابكم قريت قصيده عن الطير وتذكرت سالفه لي مع عمي الغالي والحبيب رحمة الله عليه تناول عمي الحبيب وجبة الغداء معنا بمنزلنا وكان معه احد الطيور لأصدقائه وبيروح للمدعى يدعيه الطير كان من اللي عليهم الكلام طلبت من عمي اروح معه للمدعى للفرجه فقط ..وافق وقال بعد بعلمتس على الدعو بالملواح او الشلو المهم وصلنا اول العصر وبدا عمي الغالي بالتلويح والدعو للطير والطير ماشاء الله جمال من جمال واحس اني اطير معه من جماله اللي يسبح بملكوت الله . قال عمي الغالي ياله الحين سوي مثلي قلت انا اخاف وعيا لازم تجربين المهم بدا بالتعليم سوي كذا وامسكي كذا ولاجا سوي كذا وبديت باسم رب العالمين وبدا التلويح والله الله على ملك الطيور وودي لو يفهم لأقوله انا تحت امرك لبيه ياطير المهم وبالتلويحه ال15 حسيت انه لمس الملواح وبعدين مدري وين راح يوم التفت وراي ولينه طايح بالارض مثل بعض الحضوض اللي لا طاحت مالها ارتفاع!!!!!!!!! ياعم ؟ياعم ؟الطير ؟ ولينه شاب على قهوته بيتقهوا وش صار ؟؟ قلت طاح الطير والله طايح وفارد جناحينه مثل قصيدة سدل جناحه بس هالمره موب بالسما هالمره تسدل على الرمل ... شاله عمي رشه مويه حاول فيه شوي قال :وانا عمتس مات وشلون ؟؟مات ياعم وش لون قال مات واكيد زعل عمي.. اول شي مهوب له وطير على الكيف وكايف ياقهر يعني بالصتمه وعصفور يموت وعصفور يروح ما جاه شي اشمعنا شيخ الطيور والظاهر اني صبخت الطير وكسرت رقبته مع التحمس ..لا عادت رجعنا البيت وراح عمي والطير اللي ملفوف بفوطه بشنطة الموتر عقب رزته وهورايح بيني وبين عمي يوم نروح للمدعى .. لين اللحين لاتذكرت هاك اليوم ودي يسقط من الذاكره بس ماش والأحراج اللي سببته لعمي.. المهم ثاني يوم جا عمي وقال ان راعيه تنازل عن حق الطير.. ودرا اني انا اللي صقعته ومات واحساسي بالذنب ماأنتهى لان راعيه وداه للكويت وصبره ووصلني كهديه على البدايه المميته ومازال عندي !!!!!! تحياتي اختكم ..قوافي.. |
| الساعة الآن 09:36 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir