منتدى استراحات زايد - السباحه بالقلبان

بسم الله الرحمن الرحيم
السلام عليكم ورحمة الله وبركاته
اخواني واخواتي المكشاتيه اسعد الله اوقاتكم بكل خير
وكل عام وانتم بخير
هذي السالفه قديمه يوم حنا صغار كنا تونا متعلمين السباحه والسباحه اذا تعلمته تصير فتنه مثل البلوت لصرت توك متعلم
والاولين يعلمون عيالهم السباحه بربط كرب على ظهر الواحد لين يتعلم وحنا تعلمنا السباحه بربط الجالون على الظهر يوم جت الجوالين طبعاً مكان السباحه بالقلبان ولا فيه غيره 0
السالفه انه في يوم من الايام بالصيف وكالعاده نسبح كل ظهر وكان عددنا اربعه ماحنا واجد طبعا السباحه بالجمه بالقليب وكنا ننزل بحبل للجمه المربوط بالطرمبه
وكانت المسافه من الطرمبه الى الجمه يمكن 3 متر
ماغير انا وخوي الكبير وعمن لنا الله يرحمه و ولد جيراننا المهم نسبح مبسوطين
ونرقا ونطبح ومره رقا ولد جارنا وهو يرقا تعب وفتر ومسك الحبل بسنونه من التعب وحنا نقعد نضحك عليه على عضته للحبل بسنونه اثره زعل من ضحكنا عليه يوم وصل الطرمبه وهو يجذب الحبل عنا وحنا بالجمه ويروح لهله
ويخلينا بجمتنا
ونقعد مرة نقول يجي ما يخلينا ومرة نقول لاوالله راح وش نسوي واذا طلعنا نبي نعجن خشته ونبي نذبحه ومره نسبح وحاولنا نطلع بس ما قدرنا والحبل مجذوب المهم على هالحاله لين اذن العصروحنا بالقليب من الظهر تقل مطايير
وبالعاده اذا صلى عمي الكبير العصر يجي يقوم المكينه لكن المشكله اذا ماجاء والا جاء ولاسمعنا وحنا نصوت وش يصير اكيد نبي ننثبر بقليبنا الى باكر
لكن الحمدلله جاء العم يوم سمعنا حسه وحنا نصوت له قبل مايقوّم المكينه ويجي ونعلمه باللي صار ويجدع لنا الحبل ونطلع ويقوم يهاوشنا قلعتكم ياللي بكم وملابكم انتم دفنتو القليب انتم خربتو الشفاط لا بوكم لابو من جمعكم
ومن هالهواش
يوم زاد غلنا على اللي تسبب لنا بهذا ولد الجيران
اخوي اكبرنا واعقلنا راح لم جيراننا وشكا ولدهم وعلمهم بالسالفه
اما حنا لا والله حصل له منا المقسوم بعدين من الدبغ وملحقاته ومعذورين لان من اول اذا ماتاخذ حقك بيدك فانك انثبرت مثبر قريح لا واخذنا سنه وحنا كل ما شفنا بعض صرنا الله يكرمكم تقل كلابه بس نتهارش0
طبعاً هذا منول ودي اننا كبار كان عطيناه الجزاء من جنس العمل لكننا صغار ومنقهرين
ويازين حياة منول ومثل ماقال اخوي راعي العجراء
ياليت الواحد منا يقدر يثبت السرعه على العمر اللي يبيه
وهذي سالفتي اللي اتمنى انها تحوز ولو على بعض رضاكم
محبكم
النبهاني