|
سالفة البقره وولد الجيران السلام علاكم ورحمة الله وبركاته اليكم سالفة البقره وولد الجيران فيه جيران لنا عندهم بقرة معطي وانتم تعرفون اذا اعطت البقره يعني طلبت ثور يصير مخه بركبته وتفكيره كله منصب حول الثور واللي حولها ترااهم في عينها وتفكيرها اعداء تقول هم اللي مانعيني على الزواج من حضرة الثور المهم في يوم من الايام قرر الجار ان يحسن اليها ويذهب بها الى الثور الذي ينتظرها بشغف وهي تنتتظر الموعد بشغف كانها تقول ما اجمل هذا اللقاء ولكن البقره مازالت شرسه بقدرة قادر تحولت الى كلب اعزكم الله من نوع الدبرمان اشرس انوع الكلاب اخرج جارنا هذه البقره وهو رابط في رقبتها حبل يجي طوله خمسة امتار حنا كنا صغار وعلمنا من ابن هذا الجار ان والده يبي يخرج بقرتهم للثور وفرحنا بذلك واجتمعنا حول البقره داخل البيت وكان واحد معنا من ابناء الحاره كان نحيف جدا لدرجه ماتتصور جسمه عظم وتلبيسة يعني عظم وتلبيسه من الجلد فقط خالي من اللحم والشحم مثل سيكل السباق لا رفرف ولاكرسي ولاجلاس مافيه زوايد للتخفيف وزن السيكل للسباقات ولكن اخذته الشجاعه مدري القراده وربط الحبل اللي في رقبة البقره على ذراعه يعني ابمسكها زين لاتنفلت وهو نشاطه مايؤهله يمسك الدجاجه لو حطينا كلبشه بيده وبرقبة الدجاجه ان تبيض الدجاجه وهو قاعد يحتريها ماقدر يسحبها ما اطيل عليكم بالسالفه البقره مشت داخل الحوش باحترام وادب وهدو تام وهذا الهدو الذي يسبق العاصفه بس هي شافت الشارع وهي تجمع نشاطه و تنطلق مافكرت بأي شخص حولها وليد الجيران اللي الحبل رابطه في يده ركض معها شوي يبي يوقفها ويحاول يفك الحبل يعني اعطني حريتي اطلق يديا ,, انني اعطيتك ماستبقيت شياء وخذ ياتسحيب بالشوارع وهو مره على ضهره ومره على بطنه تقطع به الشوارع دون ان تقف او حتى تلتفت تناظر فيه سيارات والا لا وزود على ذلك عيال الحاره اللي يلحقونها زودوا من هبالها هبال والوليد وراها تقول قرطاسة بعجه الخوف كله من السيارت لاتدعس الولد والا البقره بالهاوي واللي ماياوي وهي تدخل به حديقه فيها شجر كدنيا اللي يقصصونه باشكال هندسيه حتى يصير مثل الجدار وهي تدخل بين الشجر وهالمقرود وراها مع الشجر تحول رصيف وترقابه رصيف وخذ من هالجروح اللي تبي من الاشكال الملونه واخر شي مسكوها وهدو من روعها شوي وقالوا لها ابشري بالخير وابشري بالثور بس اتركي صراح هذا المقرود وافقت البقره بعد جهد جهيد واطلقت صراحه وشيل الى اقرب مستوصف الكتور يوم شافه المقرود يحسبه حادث سياره مايدري انه حادث تسحيبه بقره انتهت السالفه والله يحفظ الجميع ارجوا ان اكون وفقت في كتابة القصه مع تحيات اخيكم راعي العجراء |
| الساعة الآن 01:23 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir