منتدى استراحات زايد - سالفة:خروف الضيوف..قوافي

السلام عليكم ورحمة الله وبركاته

حيا الله اخواني واخواتي

تذكرت سالفه صارت من عدة اعوام وكنا مخيمين بالشوكي

جاء ضيوف لنا وهم من كبار شيوخ احدى القبائل اللتي تسكن تلك الجهات

وصادفت ان اخوتي نزلو للرياض بذاك اليوم ولن يعودو الامساء وربما سيتأخرون على حسب انتهاء عملهم

رحب ابوي بالضيوف وحلف عليهم ما يسرون الا متعشين

المشكله كانت بان الذبيحه تبي لها ذبح والحمد لله ان معنا من الذبائح ما يكفي ويزود من فضل ربي

قال الوالد لأمي الحين لاجو العيال اذبحوذبيحه وزينوها لنا عشا زين

لكن اخواني تأخرو والوالد عند الضيوف دلت امي تصفق كف بكف تأخرو متى يمدينا متى نطبخ

وراحت للخيمه وهي تفكر وشلون تنادي الوالد من خيمة الرجال

ولين عندنا اخت من الجنسيه السيرلانكيه تساعدنا باعمال المنزل

قلت لها انتي مافي خوف من دم خروف

قالت لا

قلت طيب تمسكين لي وانا اذبح سكين

قالت يعرف انتا قلت ايه

اول مره امسك سكين على حلق احد لاحمامه ولا دجاجه واول مابديت ابداء بخروف

المهم تولمنا واخذت السكين واحاول استرجع وين ابوي يحط السكين بعيد الاضحى وانا اللي انادي الضعيفه :لتا.. ياله امسك هنا مافي فك

واحط السكين وبسم الله الله واكبر واكيد على القبله .

يوم قال الخروف:خشخشخشخخششششش

وانا اللي ما عاد ادري ويني

والسيلانيه انحاشت وكملت الناقص المهم مسكته بكل قوتي وانا اصيح معه من الخوف بالنهايه مات

سمعت امي الاصوات وش تسوون عاد سويت نفسي نشميه قلت ذبحت الخروف لضيوف ابوي قالت وما خفتي قلت لا وش اخاف منه!! وانا قسم اني شفت الدنيا تلون من الخوف بس خلاص ما عاد يمدي والحمد لله اخواني وصلو وكملو صلخه واشوا انهم جو لاني مدري وش الكماله

ياحبيبلهم اخواني :كفو بنت ابوي كفو

وانا اقول بنفسي هي هي هي والله لو تدرون بس ياله لامن شاف ولا من درا وتم العشا على خير والحمد لله..

تحياتي

اختكم

..قوافي..