منتدى استراحات زايد - مشترى الطيور وسالفتهن ,,,،،،,,,،،،,,,،،،,,,،،،,,,،،،,,,،،،,,,

بسم الله الرحمن الرحيم
السلام عليكم ورحمة الله وبركاته

رحم الله وآلدين من قال ماشاءالله
ــــــــــــــــــــــــــــــــــــــــــــــــــ ـــــــــــــــــــــــــ

لكل وقت فعله ولكل فعل وقته

من يوم هل علينا الشهر الفضيل
هلت علينا أخبار الطيور وتباشروا الصقاقير بوصولها من أغلب الدول المصدره للطيور
بمختلف الالوان والانواع وبالخلطات والنسب المتنوعه
وأنا ممتنع من الروحه لمحلات الطيور
وقابض نفسي
لأني أدري إن رحت ماخلوني أعضداي أرد خالي
جعل ربي يخليهم ( والمصيبه الدفع عليهم :D)
وأنا مالي حاجه في الطيور
واللي في المقيض يكفي ويوفي
ولكن مع الضغط اللي جاني من إسنداي وإلحاحهم علي بالجوله على الطيور
أذعنت لمطلبهم .
واحدٍ منهم سبقنا على أبوظبي حتى يقول : مالك عذر وهذا انا أنتظر.
والثاني جلس عندي حرس ، وبعد ما أفطرنا قال: أخوك في بوظبي ولالك عذر.
المهم أنهم حاصروني ولالي الا الطاعه
وتم الاتفاق مع اللي سبقنا نلتقي في محل معلوم ، حتى يوقف سيارته ويطلع معنا
وتم ما أرادوا وإبتدت الجوله.
دخلنا أول مكتب وكانت النيه نشوف القراميش وخاصه منهن السفن إيت والبيور ولا لنا حاجه في الطيور الكبار.
وبعد الظيافه وفنجال القهوه إبتدى التجول بين الطيور
وأول مادخلنا الغرفه لفت نظرنا هالطير السفن إيت

http://www.mekshat.com/pix/upload05/...7956_;;;;;.jpg

ومن بعدها دخلنا على القراميش السفن إيت

http://www.mekshat.com/pix/upload05/...87956_iiii.jpg

http://www.mekshat.com/pix/upload05/...87956_oooo.jpg

إخترنا ثلاث قراميش سفن إيت و واحده بيور ولكن الله ما اراد ولعلها خيره في حينها
ولنا عوده إن شاءالله
،،،،،،،،،،،،،،،

ومن ثم خرجنا من المحل بعد ما كحلنا عيوننا من الطيور الطيبه
عسى الله يربح مسوّقهن
وتم الانطلاق لمحل ثاني
بنية السلام على راعي المحل لأنه اخو وغالي
وبعد ماقام بإستقبالنا في مجلسه عساه عامر برجاله
إبتدينا بالسوالف والمواقف اللي مرت عليه في تجارته للطيور
من وحوش وتحوله للجيرات بأنواعها
( أخونا نظامي :good2: )
والملفت للنظر بأنه لم يعزم علينا بشوف الطيور
ونحن كذلك إعتبرنا بأن لايوجد عنده طيور
في الوقت الحاظر
وعند قيامنا وتوديعه سأله واحد من إعضداي
يابو جاسم شي باقي من الطيور عندك ؟
تفاجأت برده حين قال : نعم موجودات
راودني الشك في تصرفه هذا :eek:
إذا عرف السبب بطل العجب ( تجدونه في الاسطر الاخيره)
المهم دخلنا على الطيور في غرفه مجاوره للمجلس
وشفت أنا وإعضداي اللي يسر النظر ويلفته
خلونا نطلع عن الموضوع شوي
بعض الرجال شوفتهم تبشرك بالعشى إن خاووك
ولو كنت ماتعرفهم ، لدرجه تغنيك عن نشدتهم من هم و وش من مله
وهذا ماحصل ساعة ماجت عيوننا في ذا المبروك بإذن الله

المهم نقلته وهو ببرقع ، الا والله الوزن اللي يهز الكف
وساعة مافرعت عنه كنه يقولي : نوماسك وسعدك يابو سيف
إنت وعضداك
تراني جير الشاهين الففتي ففتي ولاتنشد عن ملتي
عزّك بحيل الله في الثلاث إن الله وفّق

http://www.mekshat.com/pix/upload05/.../mk87956_e.jpg

http://www.mekshat.com/pix/upload05/.../mk87956_a.jpg

،http://www.mekshat.com/pix/upload05/...87956_uuuu.jpg
،

هذي الصوره بالبيت
http://www.mekshat.com/pix/upload05/.../mk87956_c.jpg

وإعضداي على يمناي يتباشروبه
وبعد هذا اللي صار ، التفت لمعزبنا
وكان السؤال الطبيعي : كم مطلوب في الطير؟
في هذي الحزّه عرفت سبب شكي :good:
الرجال مارفع نظره ولو تجرحه مانزلت قطرة دم منه
وتداركت الموقف وقلتله :
يابو جاسم حنّا إخوانك وإنت أخونا ، ولكن التجاره وناخوك مافيها مستحى
ولو انا بمكانك حديته عليك بقيمته وعطيتك خصمي الخاص لأنك صديقي واخوي
ولا اعتقد الاخو يسعى في خسارة أخوه في تجارته.
من هذا الحوار ، معزبنا تشجع ولكن نطق بالقيمه كأنها تسحب سحب بالغصب منه.
وفي أثنا حديثنا عن الطير ، لفت نظر عضيدي طير غفلنا عنه
لأنه ماهو بين جيرة الشواهين
وراحله وفك حبله ونقله على كفه .
يوم التفت بأن الطير غير في كل شي من ساسه لراسه.
هذي صورته وهو في بلاده
وبكره بحيل الله بيكون عندي بالبيت وبنزله صور

http://www.mekshat.com/pix/upload05/.../mk87956_d.jpg

فقلت يابو جاسم وش هذا الطير
قالي هذا الجير البريرا الاسود.
هااه جينا عند السؤال المحرج :D
بكم يابو جاسم ؟
معزبنا تشجع شوي وقال بذا القيمه :good2:
قلنا له نتشاور ونرد عليك.
أخذنا طيرنا وإسترخصنا من معزبنا
وسرينا للغربيه ( تبعد عن ابو ظبي 160 كيلوا)
وصلنا على السحور .
واليوم وبعد الافطار تشاورنا وإتصلنا لمعزبنا البارحي
قلنا له الطير بعده موجود ؟
قال نعم الطير موجود وتحت أمركم يجيكم لمحلكم
فكان ردنا لاهنت يابو جاسم وإبعث الطير.
وبعد ما انتهينا من الطيور والاتفاقيات.
جتني رساله منه اكتب لكم جزء منها .
( يابو سيف أنا مستحي أبايعك والحلال حلالك انت وإخوانك والسعر اللي تبيه حطه والقيمه اللي قلتها لكم ، هي قيمة التكلفه للطير الواحد واصل لعندي).
طبعا أنا ماكتبت الرساله كامله
واللي فيها بما معناه إني صافط لنا ولا يريد ورانا اي ربحيه في الطيور
والبريرا نزل عن راس المال.
ومن هذا المنبر
اتقدم لأخوي وصديقي العضو معنا ( ياس البوادي)
اللي هو بو جاسم معزبنا
وأقوله بيّض الله وجهك ورحم الله وآلديك على الجميله اللي سويتها معنا
ومحسوبه لك يابو جاسم ، مادام الدنيا دنيا.
وعسى الله يوفقك في تجارتك .
وأخيرا
أتمنى بأنكم استمتعتم بالصور والسالفه

تحياتي