|
قــصــة بن غـيث وابن الاسد *مـن الــمــوروث الــشــعـبي **مـــحـــمــد الــــظـــاهري السلام عليكم ورحمه الله وبركاته حياكم الله يا اخواني المكشاتيه اهلا ومرحباً بكم في سالفه جديده بين مواضيعكم الجميله اخواني الغالين لا اطيل عليكم واترككم مع السالفه واتمنى انها تحوز لكم فيه قصه قديمه واتوقع عام 1375هـ وهي قصة مثل الدنيا دواير والقصه حقيقيه وصاحب القصه هو عبدالرحمن بن غيث وعبد الرحمن بن غيث من اغنا تجار الرياض قديم ويقولون كان يضرب به الوصف في غناته وله قصر من الطين يسكن فيها هو وعياله قبل وكان يدين من يجيه ويعطي هاذا ويعطي هاذا ويذبح ويعشي وناره ما تطفي دارت عليه السنين وما عاد عنده شي من الفلوس إلا شوي وبعد فتره صار ما عنده شي وصار فقير عقب الغنات والعز فكر ابن غيث وذكر له رجال في شقراء من الاغنيا يقاله ابن الاسد عقب كم مده ويوم اصبح ابن غيث وهو الي يمس على ذلوله وماكان فيه سيارات مس على ذلوله ومشى يم جهت شقراء ويوم جاء يوم ثالث وهو ينوخ عند قصر ابن الاسد وابن الاسد تاجر من اكبر التجار في شقراء والي حولها ويوم دخل عليه ابن غيث قاله اسلام عليكم انا عبد الرحمن ابن غيث منن اكبر تجار الرياض وقدر الله علي وفلست وافقرت واليوم والله ما عندي عشاء عشيه وتحسفت على قصري اني ابيعه بس خفت من الناس انهم يهرجون في قال ابن الاسد الله كريم وان شالله عقب العصر اعطيك الحل ويوم جاء عقب العصر جاء ابن الاسد وعطا عبن غيث دراهم قاله هاذي فلوس قرضه حسنه اشتغل في الدراهم واذا رجعت لك فلوسك وعزك رد لي الفلوس قال الله يسلمك ويدي له ابن غيث ومن بكره الصباح وهو يمشي ويوصل عند عياله وابن غيث يمسك الفلوس ويبيع ويشتري ويبيع ويشتري وعقب ثلاث سنين ترجع له غناته وماله وعزه عن اهل الرياض وعقبها كم سنه قدر الله على ابن الاسد وهو يصير فقير وحالته من ردا إلى اردا وما عنده عشى عشيه قال ابن الاسد لعياله انا ابي اروح للرياض ادور لي شغل وعسى الله ان ترجع لي عزي ومالي ويوم وصل الرياض وهو يتجه لسوق الي يتجمعون فيه الي يدور الشغل عند المسجد ولا هو يوخر عنهم شوي لئن ما تعود عليها لئنه صاحب غنات ومال وعز وجاه وإلاهاك الرجال قال يا ولد قال ابن الاسد سم قال انت شكلك متغرب عن اهلك ومنت من اهل الرياض قال ابن الاسد إيه والله متغرب قال الرجال طيب وش فيك تدور الشغل وانت مبعد عن الي يدورون الشغل قالابن الاسد والله مدري وش الي صار يا خوك قال الرجال انت تدوي شغل قال ايه ادور قال تراه يتعبك قال ابن الاسد ولو نبي الشغل قال اجل الحقني وخلك وراي ويمشون وشوي إلا داخل على هاك القصر الي ما عندك ازين منه قال الرجال اسمع خذ هاك الحمار وشغلك بس انك تنقل السماد من الحوش وتكبه برا ونظف الحوش قال ابن الاسد تم ابشر وابن الاسد ينقل السماد ويكبه برا ويشتغل ويشتغل ويوم الشمس احترت وهو الي وده يريه شوي وهو الي يجلس على ضل الحمار الله يكرمكم وشوي وإلا الحمار يوم بال على ابن الاسد ويوم قام وإلا ثوبه اطرافه بول الحمار الله يكرمكم وهو الي حزت في خاطره ويتذكر ماضيه وعزه وماله وهو الي يتكي راسه على ظهر الحمار ويبكي ويبكي ويقول اذا اقبلت باض الحمام على الوتد واذا ادبرت بال الحمار على ابن الاسد يعني الحمامه تبيض على الوتد هاذا من زين قبول الدنياء واقبول الناس ويوم بال هاذا من دواير الدنيا يوم معك ويوم ضدك الي يقول ويوم مر الرجال الي جابه وإلا يسمعه يوم يقول اذا اقبلت باض الحمام على الوتد واذا ادبرت بال الحمار على ابن الاسد وهو يروح لمعزبه داخل القصر وقال يا طويل العمر قال خير قال العامل الي جبناه يقول كذا وكذا قال راعي القصر طيب هو وين هو قال في الحوش الي وراء قال اجل دخاوه وعطوه ملابس وخلوه يتروش وخله يدخل علي ابيه ويوم تروش وتزين ودخل على راعي القصر وإلا هاذا هو عبد الرحمن ابن غيث الي تسلف الفلوس من ابن الاسد وإلا العين بالعين ويوم شافه ابن غيث وهو يقوم وتحضنون بعضهم وإلا هو يبكون كلهم ويقول ابن غيث هاذ المال وما يسوي نستني عنك واخفتني وسوتلي وهاذا المال ما ابيه قال ابن الاسد لا لا يابو غيث الدنيا دواير قال ابن غيث اسمع يابن الاسد والله والله انك ما تطلع من المجلس الحين تروح ركايب لديرتك ويجيبون عيالك وحريمك والله ما يفرق بيننا إلا الموت وفعلاً سكن ابن الاسد في القصر الي بجنب قصر ابن غيث وتشاركو في مالهم وغتنو وما تفرقو إلا بعد الموت وهاذا هال الدنيا وفعلاً يا اخواني الدنيا دواير وهي من حال إلا حال اخواني ارجو ان ما قدمته يحوز لكم وهاذا حسب جهدي بأن اجد السالفه كامله وخاليه من اي نقص او غير الكلام هاذا واعذروني ان وجد اي خطأ وانتظروني في سالفه اجمل بأذن لله وتـــقــــــــبـــلـــــو تـــحـــيــاتـ مـــــــــــــــحــــــــــــبـــــــــــكـــــــم مــــــحـــــمـــــد الــــــظـــــاهــــــــريـ |
| الساعة الآن 12:02 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir