ذكــــــــــــــاء امـــــــــرأة,,,,
 

ملك.. سأل الشعب.. سؤال وقال اللي يجاوب عليه صح راح أعطيه فلووس مرة كثيير وكل شي يبغاه. والسؤال..
ايش أكثر شي وايش أكبر شي؟؟
راح الخادم.. على بيته وقعد يفكر, جته بنته.. وقالت: ايش فيك؟؟
قال اليوم سأل الملك الشعب سؤال وقال اللي يجاوب عليه راح يعطيه فلوس وكل اللي يبغاه. وأنا مو عارف الاجابة.
البنت: ايش هو السؤال؟؟
الخادم: ايش أكثر شي وايش أكبر شي؟؟
البنت: روح عند الملك وقله أكبر شي أرضك واكثر شي مالك.
راح الخادم عن الملك وقاله: ياملك أنا لقيت اجابة لسؤالك.
قال الملك: تفضل.
الخادم: أكثر شي مالك وأكبر شي أرضك.
الملك: مين قلك الاجابة؟؟
الخادم: بنتي.
الملك: طيب روح قلها لابسة ومهي لابسة..ماشية ومهي ماشية.. هدية ولا مو هدية؟؟
الخادم راح عند بنته وقالها..: الملك يقولك. لابسة وماهي لابسة.. ماشية ومهي ماشية.. هدية ولا مو هدية؟؟
قالت البنت. طيب روح جيب لي شبكة.. وغنمة.. ولحمة.
استغرب الأب الخادم من الطلبات بس راح وجابها.
لبست البنت الشبكة وركبت الغنمة.. ومسكت اللحمة وراحت.
ودخلت عند الملك.. وقالت: ياملك.. أنا لابسة شبكة ومو لابسة. وماشية بس مو على رجولي على غنمة.
وهذي لحمة أنت تعتبرها هدية ولا مو هدية.
الملك.. أعجب بذكاء البنت وقالها تتزوجيني؟؟
تزوج الملك بنت الخادم وعاشو في سبات ونبات.. وخلفوا صبيان وبنات.
المهم.. بعد سنين.. كان في خادم من الخدم أعطاه الملك حصان هدية. وفي يوم نام الخادم ونسى يأكل الحصان
قام هاج الحصان. فجاه الملك وطرد الخادم وقاله هات الحصان ورووح.. راح الخادم وهو زعلان
المهم شافته الملكة..وقالتله ايش فيك.. قال لها: الملك طردني وأخذ مني الحصان.
قامت وقالت له: خذ صنارة واقعد اصطاد بالحديقة على العشب.
ولو جاك الملك وقالك ايش تسوي قله اذا انت مارزقتني يمكن ربي يرزقني.
سوا الخادم زي ماقالتله الملكة. جاه الملك..وقاله ايش قاعد تسوي؟؟
الخادم: اذا انت مارزقتني يمكن ربي يرزقني. قام الملك قاله: مين قلك تقول كذا.
الخادم: الملكة.
عصب الملك. وطفش من ذكاء البنت.. وراح لها.. وقالها: شوفي يابنت الناس.. لمي أغراضك وروحي على بيت أهلك.
بس قبل ماتروحي.. سويلي شاي.. وخذي اغلى شي عندك.
المهم.. قامت البنت سوت له شاي وحطت له فيه منوم. المهم صحي الملك.. ولقى نفسه في بيت الخادم (أبو البنت)
قام قال: ايش اللي جابني هنا!!
البنت: مو أنت قلت لي روحي بيت أهلك وخذي أغلى شي عندك!!
وأنت أغلى شي عندي...

الــــــــــــــــــــــــــــــــنـــــــــهـــــ ـــــــــــــــايــــــــــــــــــــــــــــة