كــــــــــــــــــيف تشتري صقر وأنت واثق
 

اخوانى راعين المقانيص والطيور

سلام عليكم ورحمة الله


الحقيقه كلنا نهوى هوايه وحده واعتقد هى سبب تجمعنا فى ذه المكان الطيب

على العمووم وش رايكم يكون موضووعنا عن الشروط التى واجب توافرها فى الصقر لكى يكون

طير سليم تقدر ويقدر غيرك يشتريه وكيف يفحصه وكيف يعرف ان الطير به مرض
وكيف يفحصه وهو عند البايع قبل لا يتورط وياحذ له طير مريض يكتشف المرض بعد ما يدفع فلووسه
ارجو من الجميع كل واحد يحط اللى يعرفه عن طرق فحص الطيور وامراضها وكيف نقدر نشترى طير ولا حد يقدر يغشنا

وانا حسب معرفتى البسيطه بحط اللى اقدر عليه واللى يدش الموضوع لا يبخل تراه الموضوع بينفعك وينفع غيرك ونستفيد من خبرة بعض
يعنى بختصار اللى ابغى اقوله شى طيب ان نعرف الافكار الجديده
ونعرف كيف تقدر تشترى طيرك و و ش هى الطريقه اللى تتبعها لفحص الطير

فـــــــــــــــــيد واســـــــــتفيد



اولا انا انصح بفحص صوايد الطير ( المخلب او كف الطير )
ترفع صوايده وتشووف اذا به مرض ينقال له حفاة او ساامور وراح تشوف فى كف الصقر دائره حمراء
او بيضاء ومن تلك العلامه تعرف ان الطير به ساامور او حفااة واللى اعرفه ان للحين ماوجدت الا بعض العمليات القليله لعلاج السامور وطبعا السامور نوع من الامراض التى تصيب الصقر وتكون فى كف
الصقر او مخلبه او صوايده


اثنين المووس ( اطول ريشه فى جناح الطير ) تمسك الطير وهو مبرقع وتحرك المنقله
لين شفت الطير رف بجناحه تحط عينك على اخر ريشه ان شفتها موجوده تراها باينه تكون اطول وحده
وركز على منبتها عشان تعرف هى ولا وحده غيره ( منبت الريش )

ثلاثه امسح ايدك على صدر الطير وتحسس اذا به عمليه جراحيه او لا لأن الطير تكون
ضربته فى صدره وراح تحس لو مخيوط ولا سليم


اربعه فرق صوايد الطير ( الاصابع ) شفهن اذا به قراح او عله او انه صوايده سليمه
طبعا تفرقهن عن بعض تمسك مخلب الطير وتبعده عن المخلب الثانى وتشوف فى النص

اهم امراض الطيور الديان ويكون سببها الحمام المهم
عشان تعرف الطير اللى تبغى تشتريه به دود ولا لا
ركز حوالين وكر الطير راح تشوف الذرق ( مخلفات الصقر)
حركها بعود صغير راح تلاحظ فى ذرق الطير دود ابيض
او ما لاحظت شى تراه ان شاءالله سليم من الدود


مجرد بعض الكلمات البسيطه وادرى عندكم الزود وان شاءالله يوم ايجى على بالى واتذكر شى جديد
راح اضيفه فى الموضوع


والسموحه من الجميع

للأمانه منقول