البارحة جاني مـن الحـب مرسـال
من عقب ما بينـي وبينـه خصيمـة

وانا ترى في الحـب مانيـب فعّـال
ولا بعـد ولّـع بقلبــــــــي هشيـمـه

ولا بعد غنّيت فـي ساعـة وصـال
ولا بعد ذقـت الفــــــراق وجحيمـه

ولا جرى دمعي على الخـد همّـال
ولابعـد جربـت مـــــــــــرّ الهزيـمـة

حتى وردنـي تالـي الليـل جـوال
وانا على شاهي وبسكـوت ديمـة

الرقم بايخ لكـن الصـوت قتـال
كنه مثل صــــــوت المذيعـة حليمـة

قالت مساء الخير يـا طيّـب الفـال
قلـت ارحبـــــي ترحيبـةٍ مستديمـة

بالعود والصفـري ودلـة وفنجـال
واجب،،ك يا بنت الأصـول الكريمـة

ردت بضحكة ثم قالت وش الحـال؟
قلت اشهد إن الحال عقبك سقيمـة

قالت وهي تضحك بعد مثل الأطفال
وانـــــــــــا بعـد كنـي بدونـك يتيمـة

من يـوم قالتهـا تزلزلـت زلـزال
من فجعتـي كنـي مسـوي جريمـة

قلت ارفعي صوتك ترى مابه ارسال
كـذاب لكــــــــنّ المصيبـة>عظيمـة

قالت أقول اسمع ترى هرجنـا طـال
ممكــن تصاحبنـي ترانـي وسيمـة

واسمي الحقيقي أول حروفـه الـدال
لكـن يسمّونـــــي البنـات الزعيمـة

صحيح أحب الفخفخة واعشق المال
لكـن ترانـي طاهـــــرة مستقيـمـة

ما عندي امغازل ولا (لعب يهّـال)
ما عندي إلا في الشرف والحشيمـة

بس الصراحة قلبي لشوفتـك مـال
واصبحت وحدك جالسٍ في صميمه

فكّر بعقلك واترك القيـل والقـال
واحذر تطيع اهــل العقـول العقيمـة

وارسل علي الحين خمسميـة ريـال
أشــــــحن بهـا جـوال أختـي غنيمـة

أو طقم غالي فيه خاتـم وسلسـال
أروح بـه فـــــــي عـر س ولاّ عزيمـة

قلت الحقيقة مانيب رجـل أعمـال
ولانـي بتاجـــــــر والمـوارد عديـمـة

أنا الصراحة شبـه عطّـال بطّـال
وعلاقتـي بالفقـــــــــر جـداً حميـمـة

والراتب الله يرحم الحـال مـا زال
محـدود والمصـــــروف ربـي عليمـه

والدين بـالآلاف والبنـك شغّـال
ياكـل فلوســـــــي بالربـا والظليمـة

والسوق طايح والغلا ضيّـق البـال
والمــــــوت والله صايـر اكبـر غنيمـة

قالت تحمّل بـس والحمـل ينشـال
خلــــك شديد الباس صلـب العزيمـة

ياخي تصرّف جعلك اتصيـر نشّـال
أهـم شـــــــــي إن النوايـا سليـمـة

لابد تفهمني علـى كـل الأحـوال
ما دمت من أهل العقـــول الفهيمـة

قلت إيه والله فاهم اللي على البـال
لكن تـــــــــــرى هـذي علينـا قديمـة

يا بنت هـذا صايـر اليـوم مـوال
للي تبـــي تلعب علـى ابـن اللئيمـة

يا بنت ما تدرين كـم فيـه محتـال
يلعب على الحبلين وانتـي غشيمـة

يا بنت كم من جاهلة دمعها سـال
مـــن عقب ما جات العواقب وخيمـة

والبنت لا اقفى عرضها بيد الأنـذال
والله مـا يبقــــــــــى لهـا أي قيـمـة

قالت تبي ولاّ فخلّك علـى جـال
مهوب ناقصـــــــي نصايـح حكيمـة

عز الله إنك للأسف منـت رجّـال
وانأأأك قليل الذوق ما فيـك شيمـة

يا لعنبو اللي مـا يسطّـرك بنعـال
حتـى يعلمـأأأأأأك الغـزل يـا بهيمـة

( تفو ) عليك وصكّت الخط في الحال
مدري ( تفو ) هي مدح ولاّ شتيمـة