|
هـــذا هــو صيـدنا..ورونا صيــدكــم*** http://www.mekshat.com/pix/upload04/...67496_rthy.jpg اليوم جبت لكم قصة صارت قبل أربع أيام ..وذكرتني ذالقصة قصص قديمة قلت خل أكتبها لأخواني عشان يستفيدون وبعدها أبي رأيهم.. القصة قبل أربع أيام طرى لي طواري قلت بروح لشعيبٍ خابره يجي فيه الصيد حوالي 100كيلو من الرياض معي الكاميرا فقط.. ولامعي بندق عندي أنواع البنادق تنام في أحد زوايا البيت من زمان لكن خلاص بدلت البندق بكاميرا وبصراحة تسليتها أفضل من البندق عندي أنا طبعاً.... المهم..ألشعيب اللي أنا ابيه يبعد من الإسفلت تقريباً 18 كيلو وفيه أماكن في الطريق فيها وعر..وصلت الطلح المقصود تقريباً الساعة 6 عشان الحق على البراد أصور لي كم طوير وأهج من اللواهيب بدري.. اتجهت للشعيب احسب مافيه الا انا وكل شوي ساقط على واحد له عجاج مع ذيك الوعرة تقول يطردون قلت يالله انا رايح اصور وعلى مهلي يوم وصلت الشعيب الا الناس وش كثرهم ياستار سترك لقيت حفلة هاذا والناس صيام ياويلك يالقميري ويلاه بعد العيد..المهم وصلت الشعيب ومريت اول طلحة ماشفت فيها حتى البصوة ويالله وبدأت رحلة البحث من طلحة للثانية لكن المشكلة الناس مالية الشعيب والطيور ماشفت الاصرد ومهبلين فيه القنوص مايقر عجزت اصوره ياشين طبع القنوص الجدد تخيلوا يمرون على طلح تحته ناس جالسين لا ومسرعين ثم يدفنونهم بالغبار ولا حتى يقولون السلام عليكم,,,! ويجيك جيب ربع ولا سفاري فتك ولا لاند كروزر وركابه كلهم مطلعين الشوازن مع الدرايش تقول يطاردون لهم جول والشعيب اللي هم فيه احتر الجو والدخلة ماشافتها عيني يالب قلوبهم بس..المهم انتصفت في الشعيب ومليت مالقيت حتى الحمرة الطيور هجت من الفوضى رحت لم طلح مايعرفونه حوالي اربع طلحات بلحالهن اتجهت للطلح والسيارات في كل مكان واطالع يميني الا فيه اهل سيارة لاند كروزر واقفين وفاتحين كبوت السيارة والكفر مفكوك وعلى العفريته ويأشرون لي رحت لهم ولقيت ثلاثة شباب أعمارهم من 25 وطالع سلمت وقلت سلامات قالوا افزع لنا تكفى قلت ابشروا..قالوا تدري من متى وإحنا في ذالمكان قلت لاوالله انا توي جيت..قالوا من أمس الصبح وإحنا على ذالحال 24ساعة ..قلت ليش !! طيب النلس كثير قالوا كل من أشرنا له صد عنا وسكر القزاز ولا انحرف من بعيد بس ذبحونا بالغبرة قلت 24ساعة مافيه اللي وقف قالوا هذا اللي حصل..قلت الله يرحم أيام زمان يوم القنوص مايعرفون ذالنذالة..المهم قدمت الواجب وساعدت اخواني وأنا سيارتي بترول وهم لاند كروزر ماكان قدامي الا اودي كفرهم لاقرب ديرة لتغييره لتعذر تصليحة في البر لا والأخوان الله يهديهم مامعهم احتياط يقولون انه ضارب عليهم من زمان وحاطينه احتياط وهم قنوص..وهذا خطأ كبير يرتكبه الشباب..المهم ماوصلت البيت الا عقب الظهر ماشوف الدرب صليت وطويت صفحة سيئة مريتها وشفت دهاليزها وأغلقت هذه الصفحة بكل مافيها من شين ونذالات وقلة إحترام وعجاج وتفاخر بين الصبية بأنواع الشوازن والأفلاس من شوفت حتى الدخلة..ثم نمت... وقبل نومي تذكرت أيام وأيام..سبحان الله يا اخواني الناس تبدلت طبايعها ياكبر الفرق بين قنوص ماقبل ثورة الشبكة العنكبوتية (والقارمن)... كان البر ما يجيه أي واحد الله لايوفق القارمن اللي جاب الآنذال اللي تاركين ناس متعطلين 24ساعة ولا حتى فالوا لهم سلامات.. تدرون أول لاتنادي احد اذا تعطلت افتح الكبوت وسو الدلة أكثر اللي في الشعيب يجونك لا وتحسبهم يسألك وهو في سيارته لا ينزل ويسلم عليك سلام معرفة وانت اول مرة بحياتك تشوفه ياطيب الرجال يالأنذال.. واسمع يلي تركت انسان منقطع في البر القنوص الأولين لامنه جاك وأنت متعطل أبشر والله بسعدك مايمشي الا وسيارتك تمام التمام إذا تعذر اصلاحها في البر والا قلصوها الرجال ووصلوك لين بيتك ماهمهم بصوة يطاردونها ..والا طلحة تسابق الناس عليها تدرون أول كنا زي الإخوة والله زي ماقول لكم.. تعرفت على الكثير من الرجال شرواكم اللي من القصيم ومن حائل وسدير والوشم تحديدا شقراء والرياض والقريات ومناطق كثيرة وكلهم ونعم الرجال..تدرون متى تحلو الجلسة عقب صلاة المغرب خذ من سوالف الرجال اللي تفتح النفس والمواقف ألظريفة خلال قنص اليوم كل واحد والله يا إخواني أننا نجتمع في بعض المرات ياصل عددنا للعشرين وبعض الموجودين ناس أول مرة في حياتنا نقابلهم ولكن طبوعهم وحدة الشهامة والكرم.. ونبذ النذالة وقلة الأدب والتصرفات الصبيانية.. كنا اذا اجتمعنا تعرفون ما فيه احد ضيف عند احد كلنا قنوص والعمل يكون جماعي والصيد كل ينزل صيده ويحطه واللي بيرتاح يرتاح بساط احمدي في كل شيء الا في الطبخ...يكون فيه تحدي وتعليقات لذلك يصير مثلا الطبخ اليوم علينا يا اهل الرياض بكرة يصير على اهل القصيم وعلى ذالطريقة وياويلك من التعليقات مايخلونك في حالك يلخبطوننا دايم..وهذا هو عذرنا دايم لامن جبنا العيد..لكن بقول لكم حقيقة كانوا قنوص القصيم يحتلون المركز الاول في طبخ الصيد لا وشغل مرتب ثم اهل حائل بعد مرتبين ثم سدير ثم اهل شقراء..تدرون ليش ماورد ذكرنا ياقنوص الرياض كنا أبطال آخر القائمة وكانت التعليقات ذيك الليلة بعدد النجوم..بس تعلمنا من أخطائنا ومن خبرة الشباب الله يطول بأعمارهم وصرنا في المركز ماقبل الأخير.. إخواني كنا نستمتع بالفعل بطلعتنا للصيد وكنا نكسب الرجال..حسبي الله على القارمن مسطي الرخوم.. اسمع يلي تجي طاير بسيارتك من جنب الطلح اللي فيه ناس وتدفنهم بغبارك بتوريهم البندق اللي ابادة القوقسي..تراك مزعج ياخوي حرام شوي وتوطأ الناس وش قلة الأدب ذي ترى القنوص قبل ماقبل أشكالك كانوا اذا شافوك تحت شجرة ومتعافي جنبوك بمسافة ولايجون مثلك مع اتجاه الهواء يابوغبرة يصيرون عكس الهواء ويمشون بشويش ويسلمون الله يسلمك..اما في ذالوقت ليته يسلم من عجاجك مايبلك سلام..! واسمعوا يلي مطلعين بنادقكم تقول ذولا في ساحة حرب..القنوص اللي تشرف معرفتهم اللي كانوا يجوبون الارض بلا القارمن كانوا إذا أقبلوا عليك ومن مسافة ينزلون بنادقهم ماهو خوف منك يابطل إحترام لك يابو غبار وبنادق في شعيب ما فيه حمرة.... تدري يلي كنت ترمي بالشوزن وكأنك تتبع جول وأنت في شعيب حتى الدخلة ماداجت فيه أن صيد الطيور الأخرى الغير مهاجرة والرمي للفت الأنظار تسمى في السابق سفاهة قل هربدة وجعجه وقلة أدب..!! واسمع يلي صوت سماعات سيارتك تلوث الآذان وتعكر المكان ترى الغناء حرام والناس صيام..والله يابو سماعات تقول سماعات مرقص اللي لجيت الناس بمطربك اللي تقول ينهق أعزكم الله..أشكالك مامروا علينا في ذاك الوقت ابد اللي مثلك كان البر من المستحيلات عليه لان مكانه الشوارع والزفلت إذا ابعد عنه مايتعدى 100متر وفي الليل مايغيب عن النور حق الشوارع ولو يطلع من النور يلقونه فيه جلطة.. أقول الله يصلحكم ويخليكم لميماتكم.. ويذكر أخويانا الأولين بالخير اللي تركوا الصيد للي يلعبون بالشروخ في الشعبان..بالله عليكم ذولا قنوص.. الله يا زمن فات كانوا القنوص كبيرهم وصغيرهم شهم شجاع كريم.. في أمان الله.. الروقي |
| الساعة الآن 03:20 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir