منتدى استراحات زايد

السلام عليكم ورحمة الله وبركاته

ياريت تشاركوني وخاصة النحالين أهل الخبرة

السالفة طول الله عمركم، قبل سنة تقريبا. لاحظت خلية نحل بري في البلكونة، خلف الغسالة. بانيها على الهوز (لي الغسالة أو خرطوش الماي اللي تبون تسمونه). المهم، كان حجمها صغير يعني بحجم قبضة اليدتقريبا. تفاهمت مع الملكة على الأجار ووقعت العقد لمدة سنة. حسب علمي ان النحل البري صعب الإرضاء. ما يعجبه أي مكان، رحال وما يطول في مكان واحد. قلت استفيد لي قرشين ويمكن فوقهم شوية عسل.

الحين دارت السنة، وصارت الخلية ماشاء الله كبيرة وكثرو العيال وصارو مزعجين. يوسخون الغسيل ويدخلون البيت بدون أذن. رحت للملكة وقلت لها وحدة من ثنتين، أما تدفعين دبل الأجار. أو تطلعين انتي وعيالك. قالت أطلع أحسن. ومنها قامت تماطل معاي وكل يوم تقول بكرة. طفيت عليها الكهرب والماي بس بدون فايدة. مافي الا حل وحيد. هي الحرب ورب الكعبة.

اجتمعت أنا والنخبة من أعضاء العائلة وحطينا خطة الحرب. وبالتعاون مع اللواء أخي خبير المتفجرات، شبيت خيشة وحطيتها في قوطي. شديت الحزام، وهجمت. الموقع كان تحت الخلية بالظبط. استنفر العدو (النحل). انتهت الغارة الأولى بهروب 30 بالمية منهم. استرجعت القوطي وشنيت حملة ثانية. ونفس الموقع بس هالمرة ما قدرت اكشف المكان ولا عرفت كم نسبة الهروب. قرب وقت المغرب. قلت أروح أفطر وبعدين نرسل العوايانيية على قولة باب الحارة.

بعد السمبوسة والفمتو. رجعت العواينيية بخبر سيء وقررت أشرف بنفسي على الموقع للتأكد من صحته. وفعلا. رجع كل النحل ولا كأن شي صار. لا.. في شي صار.. ريحتي دخان وحراق.

للمعلومية، اطلعت على مشاركة الأخ قناص خلاوي. بس حبيتا شارككم الحدث.

أرجو المساعدة

العميد ركن

shutter

السعودية - الدمام