|
بوعبود سبب زلزال في القاهره بوعبود في القاهره السلام عليكم ورحمة الله وبركاته هذا الموقف أيها الأخوة الأعزاء الطريف الذي حدث في الواقع دون زيادة بس فيه نقصان . يقول والعهدة عليه أنه في ليلة ظلماء ياسلام على اللغة خلونا بالخنفشارية أحسن أتصل عليه واحد وقاله أنا بجيك مصر قال الله ايحيك طبعاً الواحد هذا من دارين صح أنه عمره في الأربعين بس عتيق مال أفــــــــــــل .. السالفة يالربع كانت في عام 1992م سنة الزلزال . الريال من كرمه حجزله في شريتون الجزيره وغرفة طالة على النيل في الدور التاسع وجاب له خصم طبعاً خيالي جده ما يحلم فيه .. وصل الرجال لقى السواق يترياه في المطار جابه الفندق وعاوز أي خدمة يا سعادة الباشه اليوم الثاني في الضحى المضيف زار خوينا ولا قابله في ممر الدور التاسع رايح الأصنصير مافي مشكله ؟ بس شنهو الهيئة ؟ لابس وزار وفلينة وفوطة على الكتف. بل ياهي صدمه المضيف افتشل فشيله ما عمرها بس مشاها هاه ابو عبود وين رايح ؟ رايح المسبح بهذي الملابس روح ألبس وبنروح سوى المضيف قال أكيد أن أخونا بيروح يتفرج على ..... لأن دارين ما فيه إلا البلابيل وياويل اللي يطل من نفسه متسنع قبل أحد يقوله . ومسابح خليطي مافيه . أخونا لبس فوق ذلك الزي حلوه ذلك الزي مشوها .. جلابيه مقلمه شاريها من الشروقي ... بعد المضيف مشاها له قال كل شوي أملي عليه يالله هو في مصر والمصرين لا جونا حتى الجمعة بالبجامه ومن غير ملابس داخليه ولاسجد الله يعين اللي وراه من بروابين الجعيمة . المهم ما طول عليكم راحوا المسبح والا المسبح لحوم تدهر أجانب على مصرين .. خوينا سبه شوي وقال الله ..... ولا بيفسخ الجلابية وذاك الوزار الملون أحمر وزرق واخضر أندونيسي الصنع نصه طلع هاه أش بتسوي ؟ والريال معزم ولايقول بتسبح .. والريال حق المسبح يراقبنا شنه بيقول ........... اخرقوا بره . يالخو في شروط للسباحة لازم تلبس ملابس السباحه مثل هالخمة .... قال لا أنا ما أستانس إلا لين تسبحت بالوزار من يوم أنا شباب. يا الجودي هذا في البحر والهارونية وبوعايشه وبوخميس والصفار والبقعاوي والوزير مو هنا . له جيف هنا أخير هناك الماي طبيعي يهد عليك من القلمه هنيه ما تدري من وين ايك ... يامعود امش فشلتنا وسحبته بقوه مبعده عن الحماس الزايد ومابقى أحد ماخزه وهو ما خلا أحد ما خزه حتى العجوز الإنجليزية ماسلمت منه .. يقول بل شوف وييها شلون مصفط ومندر شنه أرض الخريس. أقول عدت بسلام .. طل بسلام بعد ما راح ماي الويه كله من الفشيلة . يوم الزلزال وما أدراك مايوم الزلزال ؟ قبل المغرب المضيف راح عنده الفندق وفي الإستقبال جلس ينتظر قليل يتكلم مع أحد الموظفين وياتك الهزة الأولى الله لايوريك بل .. ألحين الريال فوق في الدور التاسع ... أدق عليه تلفون بو عبود .. الريال كان يصلي المغرب صارت الهزه هد الولي والتالي ويطل من البلكونه ويحس أن البرج كله يميل .. المهم قلت له حول مع الدرج وبسرعة وما صكيت السماعة إلا الريال فوق راسي بل شلون يت ولا متزحلق تسعه طابق وخدمه وميزانين .. ولا الشيفه الله لايوريكم والملابس فلينه علاقي مقضضه من كل جهه وحلمة صدره طالعه من العلاق من وسعه والشعر في صدره غابة أستوائية . والوزار إياه الأندونيسي بو طاوس ... شلون ألحين وين تودي ويهك من اللي يعرفونك خصوصاً أنه أمس ماعطي الموظف 100جنيه بخشيش ما أدري اش حقه عاد اش بينه وبينه الله أعلم.. الله يغربلك لوشاري بالمئة جنية درزن فنايل مهو أحسن لك . ماهي إلا ربع ساعة وصار الوضع عادي لا أضرار إلا في الأحياء القديمة طلعنا فوق وطلبنا شاي ولا يقول الله أخوك بغى يروح في الزلزال .. قلت كل شي يهون إلا الفلينه والوزار.. قال يا أخي أنا كيفي مارتاح إلا جذية قلت الله يعين أم عبود عليك شلون حولت بالسرعه هذي ؟ قال : ربك أعلم ... أنخرطت على هالدرج ولا انا عندك شلون ما أدري واللي جدامي تشقح ما خليت أحد جدامي ... الفوائد من هذي السالفة لابد يكون ضيفك لا يسبب الكوارث الطبيعية . أنك تشتري ملابس حق ضيفك . وتعطيه دورة في التعامل . ودوره في السياحة . خصوصاً الخروج من الفندق ومشاهدة الآثار . تشتري أقوى مكافح للصداع من الحنه اللي بتسمعها . ======= أحبابي أي مساعدة في الترجمة على الرحب والسعة ما عندي سالفه من الصبح أجمل تحية أبو االحزم |
| الساعة الآن 01:30 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir