|
قنصة تتحــول الى معــركة*** http://www.mekshat.com/pix/upload04/...67496_rthy.jpg في الماضي القريب ومنذُ عدة سنوات كان للقنص روعته وكنا نتشوق له ونعد الأيام والليالي لنستمتع بأجوائه الرائعة وكان هذا في الماضي القريب في ذاك الزمان كانوا القناصة أصحاب مبادئ ويساعد بعضهم البعض وفيهم فزعة وكرم وشجاعة وإخلاص وكل شيء حلو فيهم....! بعكس قناصة اليوم..!! أنا ما أتكلم عن كل القناصة..!كثير من القناصة فيهم كل الخير...ولكن فيه قناصة يقنصون للتدمير كل شيء بدأً بالتفحيط في البر والرفع على صوت المسجل وسياراتهم أصواتها مزعجة وركاب هذه السيارات فئة جاءت للبر بسبب المنتديات فئة ماتميز الحمرة من القميرية.:D إخواني بكل صراحة أنا كرهت قنص الطيور المهاجرة(النزل).......!! وبعد ما تقرءون سبب كرهي للقنص يمكن تعذروني..!! أنا قلت لكم إخواني أن القنص انضمت له شلل يهجمون على البر ويداهمون الأودية بفوضى عارمة وصاخبة..لايحترمون حتى أنفسهم يتملكون أشجار الطلح وينصبون الخيام فيها ..فلياليهم صاخبة وغير نزيهة وبعيدة كل البعد عن الخوف من الله...! من صفاتهم يقتلون كل ما تراه أعينهم..لايعرفون شيء من الصيد يطاردون القوقسي يحسبونه مهاجر..ويأكلون حتى أم سالم يحسبونها صفارى..وهذا شيء قليل من كثير وكثير من صفاتهم السيئة جداً..!! وهذه الصفات يمكن مع الوقت تتعدل ولكن هناك صفات يتعذر تعديلها وهي صفة (الجبن)للرجال...!! اسمعوا قصتنا مع أحد الشلل المالكة للأودية...!! الزمان..قبل ست سنوات... المكان..شعيب الفويلق اللي بين الرمحية والحفنة..!! كنت مع أخي الأكبر وأخي اللي أصغر مني وثلاثة من أبناء أخي الأكبر أكبرهم عمره 10سنوات.. إتجهنا لشعيبنا المفضل الفويلق ويسمى عند البعض البسيتين..هذا الشعيب الطلح فيه قليل حدود 20 طلحة ولكن يكثر فيها الدخل وخاصة اصفر عين:good2: بدينا الشعيب من اوله وكان فيه قنوص شرواكم اللي يصوت تقهووا واللي يقول الفطور..وكان هذا في أول الشعيب.... قلنا خل نروح للطلح الأخير الكبار اتجهنا له وليتنا ما اتجهنا...!! لقينا تحت بعض الطلح خيام ورحنا للطلح اللي ماعنده أحد..وقفنا تحت طلحة الا يوم جانا سيارة من الخيام وكان يسوقها شاب في العشرين ومعه آخر..وقف عندنا وبكل قلة أدب قال يالله انقلعوا..رديت عليه انا وقلت اخوي انت ليش منفعل ترى عيب تقول للرجال انقلعوا..رد علي كلام ماينقال..وفحط علينا وأثار التراب اكرمكم الله على سيارتنا وراح للخيام ثواني الا وجتنا كل السيارات اللي في الخيام حول اربع سيارات والبقية جايين يركضون ..لاحول ولا قوة الا بالله.. كانوا كلهم سكارى وفيهم ناس معهم بنادق ومصوبينها علينا ويهددون بإطلاق النار والغريب ان بعض اخوياهم يفرعهم عننا..وثارت من بنادقهم طلقتين في الهواء كان موقف مرعب بالفعل..سألتهم قلت يالربع وش بيننا وبينكم عشان تسوون كل ذالسوايا وتخوفون أطفالنا بطريقتكم ذي..ولكن لاحياة لمن تنادي..بصراحة إنقهرت.. وبعد معركتنا الكلامية مع السكارى إنطلقنا اللي البيت..تخيلوا يا اخوان مشت خلفنا سيارة لين الإسفلت مرة يوقفنا ويعزمنا ومرة يهدد..ياكثر صبرنا في ذاك اليوم الله لايعيده... وهذولا بعض من قنوص اليوم..!! ولكن الله يمهل ولا يهمل.. وبعد عدة أسابيع بلغنا نبأ أن أحدهم قام بقتل آخر من نفس الشلة..!! وفي نفس المكان...والمصدر من شرطة رماح...!!نسأل الله السلامة.! لاتلوموني لو كرهت الشيء اللي كنت أعشقه... في أمان الله... خالص تقديري لكم... الروقي |
| الساعة الآن 07:06 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir